個agent都幾友善好肯答問題，同埋算係熟人，覺得有咩事搵佢跟都應該ok
但見條數都幾大，廿幾歲仔，想買到份可以保障到往後餘生，有咩病痛中癌中風衰起上嚟都夠錢應付住院、手術、化療、食藥開支嘅保險，竟然都要月供四五千
所以上嚟請教下各位買開保險嘅巴絲，到底應唔應該幫襯佢買，定可以有更好選擇（agent如果覺得你個份保更抵都歡迎出招）
佢比我嘅option係咁嘅：
1）危疾+癌保rider+住院治療+醫療融資+意外
危疾：月供千幾供25年，包癌、心臟病、中風個啲重病，保到100歲，一中招/死賠100萬（唔追通脹），一生人可claim 6次（如果係癌每次要隔3年先得），仲有少少儲蓄成分冇病冇痛到75歲可拎返百零萬
癌保rider：供到75，每年保費隨年齡上升，廿幾歲就年供一千左右，到七十就差唔多萬五一年，75後就冇得續保冇得包。150萬保額實報實銷再加其他檢查診斷之類基本全包
住院加醫療融資：
住院一晚可包1000左右，外科醫生手術費最多包52500，麻醉、手術室就最多手術費35%，cancer化療/藥每年八萬，附加醫療費包每年最多十萬。保費年年加，廿幾歲就一年3000左右。醫療融資就月供2000，供15年，保證利息4%，供一年之後啲本金連複息就可以蓋過之後嘅住院保費，所以就唔使再比上面筆數，好似仲有錢淨有廿萬有得拎返。
意外：
又係年年加，百零蚊一個月，上限50萬
咁計落呢，15年內就月供四千幾，之後10年三千幾（醫保融資供滿，危疾加其他），再到75都係大約三千幾（危疾供滿，癌rider+意外），呢段時間內應該有咩冬瓜豆腐都全包。75歲後就唔使再供，但只有危疾+住院去到82，癌同意外冇得再續。82歲後要再有住院保就要自己攞錢出嚟再月供千幾二千，但包嘅範圍唔多。
2）高級住院+醫療融資+意外
高級住院+醫療融資：基本上私院所有嘢包括病房醫生費不論級別全包唔限額，癌症化療食藥個啲每年上限250萬，其他保障每年800萬，終身上限3200萬。住院同手術仲有每日各1000現金保障。因為所有嘢都差唔多包哂所以都唔需要額外買危疾。價錢極貴，但如果買融資方案，今次月供5000供15年，淨係本金都差唔多可以cover到保費到65歲左右，之後每年保費五萬到十幾萬，連埋利息應該可以包到七十幾歲，如果揀每次自付8000保險包底，保費平啲，包到八九十歲都冇問題
意外保：基本同上
計落條數只係只係頭15年開支比較大，每月5000幾，但包到七十幾八十歲唔使再比錢，到時自己供返都係講緊月供萬幾，但中間個五十年左右完全唔使交保費都可以私院基本任claim，個五十年保費用上面1）條數計都百幾二百萬。而且唔會因為年紀大就唔保。不過就冇任何儲蓄成分，保險就保險，冇任何錢攞得返。
淨係呢兩個option對比之下2）筆數應該會比較少，頭15年趁後生冇家累比多少少就得，中間個幾十年嘅樓自己攞嚟投資下買股票買樓點都好過焗住供保險，住私院又唔使就住就住，保障會大啲。而1）份危疾唔跟通脹，三十年後可能一百萬都唔係乜嘢錢，老咗又冇癌保rider，淨返嘅住院保一出事都唔係好見使。
但平時身邊人都係月供緊幾百蚊保險，五千幾聽落又真係好乸利。所以想知道如果擔心將來會有大小病入院甚至cancer個啲一時間好難比得起錢醫，到底呢舊錢值唔值得洗
利申：如果月供5000暫時係超過平時啲人講保費計月薪5%-10%呢個range，但都唔算好吃力，而且做個行人工穩定有加薪，應該都比得起
唔係好熟呢啲嘢所以上嚟問下大家買開幾多，咁樣值唔值
你朋友真係唔熟唔食
