有鑑於我身邊好多人都對研究生學位 (both MPhil and PhD) 都唔認識或者有誤解,於是我決定開個post以Q&A既形式分享下我作為香港本地研究生既生活
未來我亦會繼續以「PhD同學會」既系列名講解下研究學位既資訊,同時,如果我有時間整理下自己手頭上d文獻搜集的話,都會考慮寫少少科普既文章,增加市民大眾對basic science既認知
好! 開始啦喂!
-----------------(我係分隔線) ------------------
Q: 做科學研究生其實到底係學d咩?
A: 唔係廢話,答案係學做研究 想大家知道,我認為科研呢一樣野就其實係有d似一門專業技術,係需要投入大量時間心機先會熟練,姐係好似一個工匠咁,要日積月累既經驗先成熟。首先,做科研唔係剩係做lab,好多時間(起碼我係)用咗嚟閱讀文獻,姐係所謂睇paper,點樣揀咩paper睇,睇幾深入,睇完點樣聯繫返去自己既研究topic,等等既searching skills都係研究既一部分,如果唔睇文獻就無background knowledge,根本無可能發展到一個有潛力既研究topic出嚟做,大家唔好睇少睇topic呢個step,有好多人頭半年咩都唔做淨係睇paper,務求將自己浸淫係research topic果個field既世界入面。另一個重點就係學設計實驗,有background又有個題目,就要整d實驗出嚟做evidence支持自己個topic既論點,詳請點設計就每個field既study都唔同,但個設計既優劣就一定係非常重要嫁啦。仲有我認為最影響一個科研人員成功與否既,就係分析數據,點樣係誠實既情況下,將手頭上既data以最令人注目既方法編織成一個smooth既故事,從而support你個research topic,analyse得求其就會浪費咗data浪費咗資源,analyse得太誇張就有機會跌入學術造假既深淵。最後當然,hands-on lab technique都係其中一項要學既野。
Q: 辛唔辛苦呀? 好似好悶又工時好長咁
A: 悶就唔會,讀得研究既十居其九都係本身對學術唔抗拒既人,甚至係好有熱誠,姐係好似你問個足球員日日踢波悶唔悶咁,佢實係答你好鍾意足球所以唔悶,如果閣下睇完第一條Q&A覺得research好悶既,咁科學研究就真係唔太適合你。工時長就政治不正確既,因為理論上研究生係全職學生,所以唔可以叫做工時,係學習
Q: 學廚就識煮餸,學車就可以渣車,讀書都話可以揾到份好工,咁學做研究又有d咩實際成效呢?
A: 除非畢咗業攞住個MPhil/PhD degree出嚟繼續做research-based既行業 (either 係大學攞professorship or 去研究中心揾工),其實實際成效真係無。個人認為反而係會令你獲得一個好全面既logical training,同埋練到EQ爆升燈,講邏輯思維,唔通個個真係有邏輯思維咩,讀研究就真係有啦。
Q: 係香港讀research postgrad要俾幾錢學費?
A: 以往就係大約40k一年,同undergrad一樣。由18/19學年開始政府waive咗學費,所以就係唔洗交學費。另外仲會有postgraduate fund添 個funding既多少就間間U唔同啦,據我所知都係around 15k-18k per month。
Q: 係咪要做TA (teaching assistant,教學助理) 嫁?
A: 要,工作包括但不只限於:改卷、監考、帶undergraduate lab、改lab report。咁你可能會問,點解學生明明係嚟學野,又要幫返學校做野?答案就係因為收咗錢 (上面提過既postgraduate fund),無錯,係收咗美國佬既錢
------------------(我係分隔線) ------------------
分享就到呢到,如果大家有野想問既可以繼續問,太自爆既問題就不了
PhD同學會系列將會不定期持續更新,敬請期待