睇下樓主個女想學咩繪圖軟件
同埋有幾多筆直買繪圖板
我有 Wacom 嘅 Intuos Pro 同 MobileStudio 13
亦有部 iPad pro 10.5
我講講個人意見, 睇下對你有冇幫助
我正職唔係做設計同畫畫, 電繪只係興趣
我一直都用緊 Clip Studio Paint EX 做練習
臨摹練習嘅作品都係日本嘅插畫師
Clip Studio Paint 而家做到 Window, macOS, IOS, Android 跨平台使用
(Android 只限 Samsung Galaxy 系列)
但只有 Window 同 macOS 可以一次過買斷, 唔急用就等下先買,
因為每 3~4 個月就會做一次特價 50% off,
而 IOS 同 Android 要比月費/年費
Wacom Intuos 系列係傳統畫板, 新手要一段時間適應,
但長遠對條頸傷害冇咁大
而 Wacom MobileStudio / Cintiq 就係直接喺個 mon 度畫
比較似用紙筆咁畫, iPad Pro 都係一樣
(我未用慣 Intuos Pro 已經轉咗MobileStudio 13,
因為鍾意直接喺屏幕度畫畫嘅感覺多啲)
相比 iPad Pro, 個人鍾意用 Wacom 板多啲
因為 Wacom 枝筆嘅感壓比 iPad Pro 好
而且筆桿粗, 拎得耐隻手都冇咁攰
感壓又可以因個人喜好調校, 畫線稿比較有feel
不過 iPad Pro 方便周圍帶出街, 叉滿電可以用到 6-7 小時
我去畫室上堂都係帶 iPad Pro 多
另外 Wacom 啲板有分 Pro 同冇 Pro 兩種
例如 Cintiq Pro 有多點觸控手勢, Cintiq 就冇
同尺吋嘅產品, Pro 會貴差唔多一倍
個人建議有足夠預算就最好買返 Wacom
因為技術方面始終最成熟, 又係最多人用
之前睇過網上分析,
其他淘寶牌子都係用 Wacom 賣出嘅舊技術
我都去過深水埗試過其他牌子嘅高cp值繪圖板
相對 Wacom, 反應始終係差少少, 但價錢平一半係幾抵玩~
Wacom 喺深水埗黃金都有得試機
可以帶埋個女去現場試下比較下先再決定~
始終畫畫係講感覺, 畫得舒服先可以事半功倍
希望幫到你
