淺談淫審：扼殺創作自由的飄移龍門

【文／周小某（獨立漫畫創作者）】

香港漫畫鋪已經越唻越少，前日居然有間黃店漫畫鋪被舉報並「掃黃」，到底舉報人係仇家/藍絲/黑警，得當事人先知。由新聞相片可以發現，中招嘅11本漫畫都係台版18禁書，封條包到好似木乃伊咁；而罪名係「管有作發布用途」。同朋友傾開，大家反應係「管有都唔得？」「包左封條都唔得？」「係咪台版書當非法出版？」原來好多人就算成日買書，甚至本身會出書，都對相關條例好陌生。想趁機會講多次香港創作自由面對嘅其中一個難關：「 #淫審」。

首先，香港係受基本法保障有出版自由，無所謂非法出版。包括有isbn嘅商業出版、無isbn嘅 #同人/#zine 出版、同埋輸入嘅書都係合法。非法出版呢個terms目前為止都只係講緊中國境內。（國安法通過後就唔係咁講了）既然出版/輸入係合法，咁幾時需要用到「淫穢及不雅物品條例」？

呢個條例涉及嘅政府部門有3個，分別係負責提出檢控但無執法能力嘅「電影、報刊及物品管理辦事處」(簡稱電報辦)、負責評級嘅司法部門「淫穢及不雅物品審裁處」(簡稱淫審處)、同埋負責執法嘅「香港警察」(唔洗介紹啦)。

「電影」同「報刊/物品(包括藝術品)」嘅分級制度係完全唔同，分別係大家比較熟悉嘅「I級 / II級 / IIB級 / III級」同埋「第1類 / 第2類 / 第3類」，前者由電報辦評級，後者會送去淫審處評級。[1] 電影喺上大螢幕之前係必須經過電報辦評級，而報刊嘅出版/入口就【唔係必須】經過淫審處評級。即係你出書，唔需要審就可以直接賣，呢件事本身係完全合法，除非你本書屬於「不雅/淫穢」類別。

三個評級分別係：

第1類(非淫褻亦非不雅)：無管制。
第2類(不雅)：按法例規定包好封條，就可以向18歲以上人士發布。
第3類(淫穢)：唔可以發布、管有以供發布、輸入以供發布。即使對象18歲以上都唔可以。即係只可以管有for自用⋯⋯⋯

總結，出或賣一本書，你面對嘅關卡包括：

無封封條，有人「覺得」本書係不雅；
有封封條，但電報辦發現你寫漏資料；
封條正確，但有人「覺得」本書係淫穢物品；
正式審完，審裁團「覺得」內容淫穢；
或者審裁團「覺得」內容只係不雅但又「覺得」受眾係青少年etc

咁多年唻，有幾多作者因為「覺得」香港創作自由受到不確定因素限制，而放棄香港導致人才外流？我又想問，香港到底有幾壓抑，細個無完整性教育，大個都唔可以睇鹹書？真係難怪香港長期處於最壓抑狀態，情緒病患越來越多，真係祝大家精神健康。

http://thestandnews.com/culture/%E6%B7%BA%E8%AB%87%E6%B7%AB%E5%AF%A9-%E6%89%BC%E6%AE%BA%E5%89%B5%E4%BD%9C%E8%87%AA%E7%94%B1%E7%9A%84%E9%A3%84%E7%A7%BB%E9%BE%8D%E9%96%80/

淺談淫審：扼殺創作自由的飄移龍門

通街都係處