達爾文獎官方網站介紹呢個獎項:「為了紀念進化之父查爾斯·達爾文 (Charles Darwin)，達爾文獎 (Darwin Awards) 旨在紀念那些通過以最壯觀的方式，將自己從基因庫中剔除而改善我們的基因庫的人。」
2020年「達爾文獎」得主有兩位，除了日本網台主播 Tedzu，無裝備下攀登富士山跌死獲獎之外，仲有呢位澳洲20歲男子 Bradley Streeter。
澳洲城市芒特甘比爾 (Mount Gambier) 有個「花園洞穴」(Cave Gardens Sinkhole)。洞穴屬大自然景觀，洞穴淡水曾經供應全市食用。因為呢度具有歷史意義，而且風景優美，所以成為國家級自然遺產，係旅遊名勝。
2020年2月，澳洲男子 Bradley Streeter，凌晨12點同朋友倚住欄杆欣賞洞穴期間，突然雙手壓住欄杆話要做倒立。點知一時錯手，跌落深30米嘅淡水洞穴，消防員搜索至凌晨3點，先搵到佢嘅屍體。
當地市長話，呢個景點嘅位置絕對唔危險，咁多年亦無發生意外，所以對於 Bradley 嘅意外感到遺憾之餘，亦覺得有啲驚奇。
「達爾文獎」評委會，就向 Bradley 頒發「A Slack-Robatic Effort」大獎。
呢件事，不其然令人諗起飛鵝山瑜伽男女，如果佢哋跌咗落山，唔知會唔會得到達爾文獎呢?
