「分化」其實好簡單，有一句說話可以解單總結。就係宇宙級革命家毛澤東所講既：
『所謂政治，就是把我們的人搞得多多的，把敵人搞得少少的。』
特別係最後一句「把敵人搞得少少的」，就已經可以概括曬中國共產黨咁耐以黎既「分化術」。
就是要將敵人多而化少，分而破之。將敵人由200萬變成100萬，100萬變成50萬。到最後孤立少數主要敵人，一舉擊破。
2.為何需要分化？
要了解「分化」，就首先要明白：點解要分化。
世上有無限咁多兵器，飛機大炮，刀劍槍械，仲有嚴刑峻法。你點解要諗到用分化？
好簡單，因為如果你面對既敵人，係無辦法用上述武力同法制解決既，就唯有用「分化」。
『把我們的人搞得多多的，把敵人搞得少少的。』－－依句說話據講係毛澤東係延安時期寫低既（待考據，可代補充），延安時期大致橫跨抗日戰爭去到國共內戰。共產黨以延安為根據地，毛澤東同時面對緊國民黨、日軍、再加埋黨內唔同派系、甚至蘇共力量既壓力。
對毛sir黎講，軍力唔夠、人唔夠、甚至自己友唔夠，點做？分佢老母化。
當你既敵人係一大班群眾，你無辦法殺曬咁多人，拉曬咁多人。武鬥不行，就唯有文鬥，其中最強技術，就係「分化」。
3.分化的原理：敵意
去到依度，你或者已經諗到，到底分化係咩黎。其實好簡單，一幅圖可以表達曬：
係咪好簡單呢哈姆大郎。其實「分化」，最重要既只有一樣野：敵意。
聽落好似好玄妙，但其實大家由細到大都一定有經歷過類似既樣野：
A：我鐘意玩PS
B：我鐘意玩XBOX
C：on9仔先玩XBOX，A，我都係玩PS，你以後同我玩啦，唔好同B玩啦，你唔覺B ON9咩
A：屌，我一直都覺，佢打J成日睇三上悠亞，我覺得河合明日菜先正
假設依個世界唔存在PS／XBOX之間既分界線，A同B係可以共存，而C亦唔能夠勾起A既敵意，去離開B。
由此可以再推導更深一層既分化術原理：
事物有差別唔代表對立，但強調事物有差別，可以引致差別之間既敵意，進而分化。
面對一個團結而難攻既群體，只要有人劃底一條線，而團體入面所有人都無辦法消除依條線，甚至不斷討論到底條線既位置係邊（唔一定好似幅圖咁係正中心），引發兩派人之間既敵意。
到最後，依一個圓型／群體，就一定會被條線分割。換言之，姐係割席。
4.如何實際執行分化？
上面係理論野，講下實際野。
現實生活唔係個都玩PS同XBOX（我兩樣野都無），咁你點樣分化一大班人，甚至分化一班本身有共同目標既人？條線應該擺邊？
好簡單，當對方只有一個目標，咁你就要強行演釋目標既差別，然後強調差別既存在。
例如，有20個人都想去日本旅行。
本來打算一齊出發，結果有第21個人因為各種原因（妒忌／無錢／反日...etc），而唔想依班人去得成日本。
佢就開始同20人入面既第19個人講：「其實呢，我覺得識去日本既，一定係去大阪，東京真係唔抵去。你覺得呢？」
第19個人未必對大阪或者東京有意見，但當佢拎出黎同20人討論既時候：
關西派既第11人就開始吹奏大阪；
第6人係東京派，佢就開始反對第11人既意見；
第13人同第11人係朋友，佢就會幫口反對第6人；
第7人一直暗戀第6人，佢就又會幫手屌第13人同第11人：
結果，依20人最後要分開兩批人去，去大阪個10人，又因為訂唔切酒店而延期，只得去東京既一半人去到。
第21人又再出現了，同去到東京既個10個人，入面既其中1人講：
「其實呢，我覺得去識去東京既，一定係去原宿，涉谷真係唔抵去。你覺得呢？」
－－直到最後得番1個人。
第21就同最後1個人講：係囉，去咩日本姐，日本on9仔先去。
然後就無人再去到日本了。
聽落好似好荒謬，但如果真係發生，你會唔會有少少心寒？
因為第21人佢咩都唔洗做，唔洗子彈唔洗槍，就可以達成目的。
現實生活入面，情況當然唔會咁單純，你要分化對方，亦唔係一句「你覺得呢」就可以解決。
但無論任何行動、目標、想法，其實都有無限演繹方式。
只要你拎住其中一邊，再強調另一邊既差別，勾起兩派人既對立同情緒，就可以逐步瓦解對方，把「敵人搞得少少的」。
再引一段黎自毛澤東既文章《矛盾論》，解釋如何瓦解敵人：
「《水滸傳》上宋江三打祝家莊，兩次都因情況不明，方法不對，打了敗仗。後來改變方法，從調查情形入手，於是熟悉了盤陀路，拆散了李家莊、扈家莊和祝家莊的聯盟，並且佈置了藏在敵人營盤裡的伏兵，用了和外國故事中所說木馬計相像的方法，第三次就打了勝仗。列寧說：要真正地認識對象，就必須把握和研究它的一切方面、一切聯繫和『媒介』」
5.「我」係咪分化撚？
你或者會問：喂，咁東京真係唔抵去喎，我又真係覺得玩XBOX既真係on9（再次強調，我兩樣野都無），咁唔通我屈就自己？
唔通我提出相反既意見，唔通我唔同意某個想法，我就係分化撚？
答：仲記唔記得，上面講到，點解要分化敵人？
因為敵人係無辦法用武力解決既大型群體，目標一致會影響我方既利益。
咩係「敵人」？
敵人唔係你唔鐘意、你睇唔順眼既人、唔同意你意見既人，而係會影響你實際利益既人，同你爭女／仔，同你爭機位，同你爭奪政權既人。
你分化佢，就令佢無辦法同你爭奪利益，令佢失去敵人既資格。
調轉講，即使你係團體入面持有相反意見，如果大家仲係目標一致，仲係一個可以威脅對家既團體，不論你對東京有咩意見，你再鐘意玩XBOX，只要群體仲可以一齊行動，你提出再多既反對意見，你都唔係分化撚。
6.「我」／佢」係咪會引致分化？
分化點解咁勁，毛澤東點解用足一世，當然唔係咁簡單。
因為人人都可以被分化而不自知。
先問下大家一個問題，如果依個世界得兩個人，你同我，咁你點樣分化我？
無錯。係分化唔到。
要分化，就要有互相對立既敵意。
我對我自己點樣有敵意？你先搞到我人格分裂可能得既。
要分化團體，一隻手掌係拍唔響。
「分化」最無敵之處，係一班人入面，只要令有一個人或少數人有敵意（好似上面既日本旅行團例子），個份情緒就好容易散佈，令成個團體受感染。
甚至你本身即使唔係想分化人，只係想做和事佬，出黎講句：
「起，唔緊要啦，咪去完東京再去大阪。」
都可能會被關西派既人屌：
「點解一定要去東京先再去大阪先？明明大阪近啲呀依家。你係咪東京派既分化撚！？」
如果你沉不住氣，屌番轉頭，咁笑到最後既，就只有唔想大家去日本既第21人。
所以：分化撚唔一定真係敵人，只要有敵意，引致分化既，一樣可以係你同我。
7.如何防止分化？
咁係咪已經玩撚完？
或者你會覺得，分化咁勁，大家中左招都唔知，仲可以點？
毛澤東成世人經歷過大大小小的黨爭，係幾乎戰無不勝，仲要笑到最後。精通分化，係咪就真係天下無敵？
的確，只要對方係一個群體，而目標有多種演繹方式，當我方派出唔止一個分化撚，只要手段恰當，思路清晰，幾本上係無得輸。
當劃出對立既界線，帶動敵意，敵人只要on99生勾勾，開始互鬥，鬥顏色夠深，鬥接近中心，就會被分化。
由圓形變成半圓，由半圓變成四分一圓，再變到屍骨無存。
不過，天下間，無野係完美同無缺陷既，分化都係。
分化既弱點只有一個：胸襟。
唔係依啲胸襟，不過見你肯睇到依度，獎勵下你姐。
回歸正題，面對分化，唯有胸襟可以抵抗，要練功必先練心，
唯有胸襟，先可以化解分化既核心元素：敵意。
你要接受：
所有目標都唔會只有一個途經
所有行動都唔會只有一個方法
所有方法都唔會只有一個效果
所有理念都唔會只有一個演繹
所有目的地都唔會只有一條路
唔同人有唔同既意志
唔同人有唔同既能力
唔同人有唔同既專長
唔同人有唔同既手段
唔同人有唔同既表達方式
大家有唔同既口才、想象力、行事風格、做事節奏。你行得慢，我行得快，你鐘意坐車，我鐘意坐飛機。你鐘意三上悠亞，我鐘意河合明日菜。你鐘意去東京，我唔單止唔鐘意大阪，仲比較鐘意去歐洲－－但唔緊要，我地既目標仍然一致，無野分化到我地。
一個群體之所以令敵人無計可施，要不斷分化，正因為團體入面既人，有胸襟去兼容所有既可能性。
就算有任何撚屌係團體入面劃一條線，你都有胸襟去跨越依條線，無視敵意既起源，而唔係將條線另一邊既人，當係仇家，亦唔再當佢係同路人。
只要記得目標，記得令團體之所以為團體既意志，有胸襟去包容唔同意見既人，就可以令「分化」無用武之地。
記住，目標。意志。胸襟。
兄弟爬山
各自努力
