FAQ 常見問題
1．點樣加張八達通落iPhone？
• 購買全新八達通
圖1：使用銀包app購買新卡
圖2：使用八達通app購買新卡
你可以喺iPhone上買一張全新、不記名嘅成人／長者八達通。留意最低消費係港幣$150，當中包括$50按金同$100預設儲值額。當然，你可以入多啲錢落去，最高儲值額係$3000。如果經銀包app買卡嘅話就用返Apple Pay內嘅香港萬事達卡、銀聯卡或Visa卡畀錢。如果用八達通app買卡，除咗可以用Apple Pay之外，亦可以用O! ePay餘額或轉數快找數。
• 轉移現有實體八達通
圖3：轉移實體卡至iPhone
圖4：轉移實體卡至Apple Watch
你亦可以用合資格嘅iPhone（見Q10）將合資格嘅實體八達通（見Q16）轉移落iPhone或Apple Watch。你只需輸入卡號碼最尾四個數字，然後將八達通卡放喺iPhone頂端位置就可以開始轉移，成個過程需時大約兩分鐘。實體卡嘅餘額、按金同大部份原先登記咗嘅服務（見Q7）會自動轉移。
註：個人八達通或已登記自動增值嘅八達通，需要輸入生日日期同身分證最尾四個號碼。
2．轉咗落iPhone之後，張實體卡仲用唔用到？
實體卡一經轉移即時作廢，而且唔可以反向轉移，即係唔可以由iPhone轉返落實體卡。八達通建議你剪爛原本張實體卡之後掉咗佢。
3．有冇按金？可唔可以負錢？
同普通租用版八達通一樣有$50按金。只要交易前餘額係正數就可以負一次錢，最多可以負$50。
4．嘟卡時使唔使解鎖或者驗證？
如果設定咗做特快交通卡（Express Transit Card）就唔使用Face ID、Touch ID或者密碼驗證，亦唔使預先解鎖或者喚醒iPhone。同一時間只可以設定一張八達通做特快交通卡，如果想用另一張嘅話就要喺交易前手動揀返。如果冇設定咗做特快交通卡，就要喺每次交易之前驗證。
5．可唔可以入多過一張八達通？
可以，但要留意Apple Pay本身嘅卡片數量限制。2017年或之後推出嘅iPhone或Apple Watch最多12張，2017年之前推出嘅iPhone或Apple Watch最多8張。卡片總數包括信用卡、扣帳卡、預付卡同交通卡，票證（Passes）唔計。
6．會唔會影響Apple Pay信用卡交易？
唔會。特快交通卡同預設卡係分開嘅，換言之係唔會影響到信用卡交易。
7．自動增值、月票、屋苑出入嗰啲有冇影響？
實體卡入面大部份原有服務都會自動轉落iPhone，亦可以如常登記所有服務。少部份轉移唔到嘅服務需要重新登記。
可以轉移嘅服務包括：
• 最近交易紀錄
• 自動增值服務
• 八達通日日賞
• 公共交通費用補貼
• 屋苑／商業大廈／校園門禁系統
• 校園管理系統
• 屋苑／商業大廈／校園專用巴士服務
• 新渡輪月票／假日來回票
• 新巴／城巴車費優惠
• 港鐵乘車優惠及服務
（包括輕鐵個人八達通積分優惠、港鐵全月通加強版、港鐵「即日第二程車費九折」優惠、港鐵特惠站優惠、MTR Mobile登記賬戶）
轉移唔到嘅服務包括：
• 停車場時租／月租服務
• 港鐵泊車轉乘計劃
8．點樣增值？
圖5：使用銀包app增值
圖6：使用八達通app增值
除咗插卡式嘅增值機之外，任何其他八達通增值地點都可以為Apple Pay內嘅八達通增值。另外亦可以用Apple Pay內嘅香港萬事達卡、銀聯卡或Visa卡增值（見Q9），或者經八達通app用O! ePay餘額或轉數快增值（最少增值$0.1）。注意：入咗去嘅錢唔可以轉返出O! ePay。
9．可唔可以用信用卡增值？有冇手續費？
可以用Apple Pay內由香港發出嘅萬事達卡、銀聯卡（UPI）或Visa卡增值，每次最少增值$100，手續費全免。
註1：暫時唔支援以「拍住賞」（Tap & Go）增值。
註2：已測試以滙豐Red卡增值，並冇4%網上簽帳回贈。
10．支援邊部iPhone／Apple Watch？
圖7：支援型號一覽
• iPhone 8／iPhone 8 Plus或之後型號
（iOS 13.5或以上版本）
• Apple Watch Series 3或之後型號
（watchOS 6.2.5或以上版本）
註：iPhone XS、XS Max及XR或之後型號，進入慳電模式（Power Reserve）後五個鐘內都用到特快交通卡。
11．iPhone同Apple Watch可唔可以用同一張卡？
唔可以。每張卡同一時間只可以喺一部裝置上出現，如果兩邊都想用就要有兩張卡。
12．入咗落手機咪會畀人監控晒所有嘢？
八達通只會攞到交通卡所需嘅資料，唔會睇到你部手機上面所有嘢，詳見Apple Pay私隱政策。
13．唔見咗部電話點算？
可以經Find My iPhone鎖機，張卡會即時停用。你亦可以經iCloud刪除咗部機上面張卡。
14．換電話、洗機會唔會冇咗張八達通？
唔會。所有交通卡都係跟你嘅Apple ID，就算剷咗都可以隨時加返。換機嘅話，只要喺舊機剷咗張卡，再喺新機加返張卡就得。洗機嗰時張卡會被自動移除，洗完機再加返就得。張卡被移除之後，餘額同按金都會被儲存，除非你退卡（見Q15）。
15．點樣退卡？
可以經八達通app退卡，按金同餘額都會退返畀你。你可以揀經轉數快退落銀行戶口，或者直接退落你嘅O! ePay帳戶餘額。要留意，喺銀包app入面「移除」卡片並唔等於退卡，只不過係從你部幾上面移除張卡，張卡仍然儲存喺iCloud，可以隨時加返。
16．邊種八達通可以轉移？
• 租用版成人／長者／個人八達通
必須印有9位數字八達通號碼，即8個數字加1個括號內數字，例如12345678(9)。
以下個人八達通唔支援：
• 客戶年齡在12歲以下的個人八達通
• 已加註「殘疾人士身份」的個人八達通
• 已加註「學生身份」的個人八達通
• 員工個人八達通
• 已購買羅湖／落馬洲／迪士尼月票的個人八達通
（若學生身份或月票服務計劃已過期則除外）
其他唔支援嘅八達通：
• 銷售版八達通
（例如八達通配飾、特別版八達通、八達通手錶）
• 銀行聯營八達通
（例如Citi八達通信用卡）
• 八達通流動電話卡
• Smart Octopus
17．顧客重要提示
https://www.octopus.com.hk/mobile_app/smart-octopus/terms_and_conditions_tc.htm
