公務員薪酬趨勢調查早前出爐,政府華員會就向政府獻計,提出全體公務員凍薪3年,但就引起唔少公務員團體不滿,其中代表5萬人嘅紀律部隊評議會職方代表就一於同華員會唱對台,話對於坊間有建議今年打算凍薪甚至減薪,表示強烈反對,仲話以1名人工2萬蚊嘅同事為例,即使加薪2%,都只係加4百蚊,只可買3盒口罩。
紀評話係過去一年,香港受到反中亂港份子同新冠肺炎的困擾,而紀律部隊係呢個咁動盪嘅時候,主動出任特務警察止暴制亂,背後就承受自己同家人被起底。而係今年初疫情最嚴峻嘅時候,入境處同事先後前往日本同內地接走滯留港人,海關同事無懼受感染風險,緊守每個關口,其他紀律部隊同事亦克盡己任。
紀評話,政府係香港最大僱主,而公務員薪酬調整一直係私人市場嘅指標,如果政府今次帶頭偏離機制減薪、凍薪,正好給予機會外間機構跟隨,令一眾香港打工仔一同減薪,各行各業均受影響,連鎖反應將削弱消費力,直接影響零售業、餐飲業和旅遊業等,進一步阻延經濟復甦,仲嚴重打擊紀律部隊士氣。
警察隊員佐級協會主席林志偉都話,代表逾3萬人嘅警察評議會尊重現行機制,認為唔應該偏離,換句話嚟講,即係唔接受凍薪同減薪囉。
source: oncc