剛戰告東尼連下三城,有人覺得練馬師冠軍之爭何其激烈,筆者卻不以為然,因為小弟早就講過,過去數年練馬師冠軍蔡約翰,少則贏七八十場,多則贏近百場,上季大摩發起挑戰都贏到75場,可見今季絕非一個高水平較技,只要摩東蔡任何一個馬房有心去追,三兩下手勢就會追近,且看今日大摩會否贏到五十大關,成為第二個挑戰者。
今次賽事有兩組三班1200米,當中第八場形勢甚清晰;「淺草飛」未來港前贏至一哩,前仗1200米純因步速偏慢捱回一席第四,今次賽前曾因小問題缺課本來不甚可取,但此駒小休後加配眼罩試大閘,走勢遠勝之前,撞正弱組可憑一哩氣量及卡士力剋對手。「美麗友盈」及「順意寶」係全組僅有兩隻季內贏過三班嘅馬,要拖一票。「運來福星」一連兩場輸形勢,季內賽績硬淨,只要步速正常就有機會。
尾場簡直係明星馬混戰,「小太陽」抖近三個月再跑,期間例課冇缺,睇嚟只係唔想三歲仔搏得太盡,不過上場三班慢步速僅勝,升班偏熱又唔值得揸膽。「幸運快車」外地高獎金兩歲賽按韁大勝,嚟到香港微傷操到今日先跑,型格靚極唔好唔出,下季蔡廐短途大賽棋子,冇咩意外二班都係過客。「當家猴王」上場輸多少進度,轉彎路程更合發揮。「牛角仔」始終贏過二班田草1200米,抖夠兼曾試大閘,唔好睇小。
波蛇原來有寫馬