拖連奴射手麥斯盧比斯早年喺森多利亞效力期間，同伊卡迪係隊友兼老死，但後來佢老婆Wanda轉投伊卡迪懷抱，仲同伊卡迪生咗兩個細路，引發勾義嫂爭議，目前她同麥斯盧比斯嘅3個孩子，都跟佢一齊生活。自此，伊卡迪冇得入選阿根廷國家隊，一直有傳阿根廷國家隊唔少「大佬」都係撐麥斯盧比斯，球王馬納當拿更公開炮轟伊卡迪係「叛徒」，呼籲國家隊永遠唔好用佢，Wanda似乎就係用呢一點佈局玩嘢。
响接受阿根廷一間電台採訪時，麥斯盧比斯咁解畫：「呢張係私人照片，大概10日前，我前妻發畀我一個訊息，話我個大仔華倫天奴想去睇祖雲達斯對巴塞場波。我打咗幾個電話攞波飛，甚至仲可以睇賽前訓練添！點知練波開始前一個鐘，我前妻突然話佢帶唔到華倫天奴過嚟，所以我惟有自己去睇訓練，恩尼斯達、馬斯真蘭奴同美斯都過嚟同我打招呼兼合照。」
勢估唔到練完波後，Wanda竟然打電話鬧麥斯盧比斯安排不妥，於是麥斯盧比斯就揾咗件波衫畀美斯佢哋簽名，仲sent埋合照證明佢真係在場。所以有呢張合照嘅人只得麥斯盧比斯同Wanda。麥斯盧比斯表示：「我係見到馬斯真蘭奴同美斯，但我哋幾乎10年未見過，我可以影響佢哋啲乜？呢場鬧劇都係Wanda策劃嘅。」
