殖民時期嘅建築係好靚，特別係中環一帶，英資林立。開埠始期殖民政府將臨海靚地一塊一塊咁賣畀英資佬，中環嘅風貌有如東方倫敦。因應經濟發展要滿足商家需求，重建更高更大嘅商廈另外大勢所趨，對於本土草根嘅香港人根本就係無需過問，但隨之而來嘅經濟效益卻造就香港八十年代嘅光景。拆樓重建從來都係英國佬管治香港嘅模式，拆舊立新，利潤先行，係針對性嘅問題解決方式。英國佬從來沒有刻意去拆殖民建築去殖民化，反而係透過不斷重建建立宗主國嘅權威。然而對於香港人，睇歷史照片中嘅中環會嘆息香港曾經有過嘅美，但有邊幢建築係真係聯繫到你嘅情感同回憶？一代不如一代呢個諗法，隨着城市建築一代一代被拆下，香港人自小就培養左對自己年代嘅優越感。‘The past is a foreign country; they do things differently there.’ 每個香港人都有着屬於佢哋回憶中，美好嘅舊時光。
反觀淪陷後嘅香港，受着社會道德嘅壓力，保育成為一大課題。但係如何判定何謂古蹟，係港共政府嘅角度好似從來唔關香港人事。折皇后碼頭，拆中環天星碼頭，拆囍帖街，以至將會被清拆嘅中環郵政總局，全部都係我哋一代或父母一代香港人曾經日常往來歷史建築，係屬於香港人有回憶嘅古蹟。港共政府拆掉重建填左一個十年都唔知填緊啲乜嘅中環海濱，一個扮歐洲街嘅地產發展項目-囍歡里，同埋保育左一個從來冇人去過嘅景賢里。港共政府從來都以父母般嘅管治模式去話畀香港人聽 : you have no stake in the society。
何謂香港人嘅古蹟？ ’Define heritage as a verb related to human action and agency, and suggests that it is a process concerned with the legitimisation of the power of national and other cultural/social identities.’ 當你每次遊行行到去中環搭船走嘅時候大家又有冇想起過呢片海港嘅前世今生？
赤鱲角機場及玫瑰園計劃，可以話係英國佬留俾香港人最後禮物。一條由中環新填海區離開香港嘅路線，通過青馬大橋去到杳無人煙嘅大嶼山。呢條路線彷彿好似出咗一條50分嘅城市規劃題畀港共政府去答，而港共政府嘅答案就係明日大嶼。當疫情過後，香港人去旅行之期；留學生開學之時；老移民離家之際。再去機場嘅路途上，不妨思考下何謂屬於你嘅香港遺跡。
