https://hk.sports.appledaily.com/sports/20200326/XBYRQ5PPEDZSY4CVAQPZ5T6QZE/
求驗客手記:足智彩空歡喜
賭仔想止痕最快要四月尾
連馬會足智彩目前唯一受注嘅澳職聯,星期一踢完紐卡素噴射機主場對墨爾本城嘅比賽後,都宣佈延期,鍾意賭波嘅球迷,真係等了又等,唔知幾時先再有波賭。
不過足智彩網頁(圖)又𠱁大家開心嘞,列出四月頭有幾十場暫定受注球賽,包括德甲、日職、日乙、荷甲等,唔通真係咁快球賽就恢復正常?大家唔好開心住,足智彩只係根據之前各賽會嘅停賽期,放住暫定受注球賽,而且疫情一路未有緩和迹象,德國方面,德足總建議德甲及德乙賽事繼續暫停到至少4月30日,相信賽會會跟隨;日職賽會亦都表示,5月2日先重開日乙,5月9日重開日職,所以想睇日本波又好,賭日本波又好,都起碼要5月。足智彩之後更新網頁資料,暫定受注球賽終於冇放德甲、日職等比賽,不過仲保留荷甲、墨超、韓職等,但以目前情況,四月初呢啲聯賽重開機會都唔高,短期內真係冇咩波賭。