--------------------------------------------------------------
經過一晚考慮，仍然好想帶返屋企，唔想佢一直CC縮縮仲俾其他狗咬，3月2日再次去到呢間野，再問一次佢既健康情況，店員再次保證100%健康，睇左狗仔既肛門腺、眼、耳、鼻、牙，都未發現有咩問題就俾左錢帶回家（問過價最後用$25000帶走），未計係間野度買左一包royal starter既糧，一塊廁板一包尿墊，其他立雜$2000多。
返到屋企2日狗仔開始好活潑開心返，並非係寵物店時咁安靜（靜到狗仔返到屋企第一日全家都以為佢有抑鬱），過多3日即係3月5日，就發現狗仔開始係咁R耳仔同咬紅腫左既腳掌，一直以為傷口結緊蕉痕，所以幫佢戴住防咬既圈圈就等傷口好，無特別做啲咩。
除左耳同腳掌既問題，我仲發現狗仔間中有「鵝叫」，飲水成日都會好似嗆到咁咳不停。
我問返店員（啊魚），佢話狗仔氣管比較幼，有俾開靈芝佢食喎，叫我帶佢返黎沖涼（我男友以前返寵物用品店話佢一定係想再劏我一筆，我諗下連耳仔傷都無好好照料真係會俾靈芝佢食？加上臨時有野做，所以最後就無返去間野）
--------------------------------------------------------------
直到後來撻野大撻左，我覺得唔對路，（當時寵物店話佢3月1日先沖完涼，要等2星期先好再沖）等到2星期就即刻帶去俾屋企附近朋友屋企開既寵物用品店沖涼），朋友一睇就話似係類似真菌感染，試左一枝醫真菌既噴霧未有改善我先帶去睇醫生，結果係生癬，而且會傳染人，因為已經發臭比較嚴重，所以枝噴霧唔夠強去醫。
除左隱瞞生癬呢樣野之外，最令我震驚既係，醫生睇佢d牙話佢肯定無7個月大（我屋企人同朋友都有講過狗仔好似大隻左啲），我問醫生咁係咪會再長大，醫生話一定會。
我俾張針咭醫生睇，醫生睇個出世日期（8.8.2019）就話無咁大，仲話怕係連打左邊針都係假既，suggest我打多次，我亦同意了。 最後打左第一針，開左抗生素，癬藥同杜蟲藥俾狗仔。
返到屋企實在太嬲，我拎寵物店俾我果張針咭好仔細咁望，發現出生日期果度有改動過既痕跡，於是打去張針咭間診所查詢（想知到底狗仔邊日生日先可以同佢慶祝），結果診所有同我講無狗仔既紀錄，針咭上既編號無寵物店既唔係診所既，狗仔唔係帶去診所既都唔會有紀錄，張針咭係寵物店搞既
（咁即係張針咭隨佢點改？）
--------------------------------------------------------------
狗仔重新打針時磅重1.47kg，（寵物店張針咭連狗仔重量都無寫過），今日再磅已經1.7KG，真係teacup咩？生癬又唔知係咪teacup賣2萬5？
我唔介意洗多啲錢醫好佢，都另外買左一堆補品俾佢補身體，但係好憤怒間店呃我係咬傷，貴都算仲搞到狗仔拖左咁耐，嚴重左先睇醫生，無6.5個月大又唔講，難怪寵物店一直同我講狗仔食starter糧係想谷肥啲仲要我浸糧俾狗仔食，我一直都奇怪點解6.5個月仲要浸糧，試過俾無浸既糧俾狗仔食佢食到嘔
而家間寵物店堅持狗仔係有6.5個月（而家7個月大）
亦係針咭日期出世
但醫生做乜要呃我先？
我淨係諗到間寵物找細狗報大數，體型細當Teacup賣貴啲咋喎
