隔牆有耳：鄧家彪唔知價唔做嘢
有閒情紋眉不如撲口罩 - 李八方
今次抗疫之戰，民間比政府走前百步，前日香港眾志成功班到十萬個口罩畀香港人，一夜之間成功賣晒。八方就聽聞，建制陣營查實都有向「外國勢力」撲口罩，不過唔係咁成功。或者因為咁，鄧家彪噚日出咗個酸味甚濃嘅fb post，質疑點解「一個口罩成本兩毛錢，點解賣$98」。
好多網民喺篇文留言，話願意畀低廿蚊跟機，同鄧家彪買200個口罩，又有人話證明條Bill真係唔識㗎，連藥房賣緊咩炒價都唔知。
工聯會孤寒派罩
吸咗近5,000個嬲嬲，鄧家彪可能想反擊網民話佢做嘢，兩個鐘後出咗張相，話婆婆一直重用口罩，於是送佢一包新口罩。網民見到包口罩非常薄，質疑得一個口罩，寸爆鄧家彪口罩成本兩毫子，點解咁孤寒？八方向沙田街坊打聽，原來工聯會噚日喺區內派罩，一袋有三個口罩，但只係工聯會會員先有，街坊都好嬲咁話，唔夠口罩嘅話之前建制派就唔好捐15萬個口罩畀湖北啦！
八方認識嘅區議員，呢排都忙住撲口罩、做街站檢疫，大呻攰到就快「burn out」，有時頭都未梳就要落街站。不過鄧家彪呢排似乎心情唔錯，因為網民發現佢紋眉，堂眉粗到變咗「印仔眉」，仲有網民笑佢條眉做乜變咗「王小虎眉」，亦有網民質疑係咪工聯會有CSI口罩，所以鄧家彪仲有時間打理自己條眉，唔使去撲口罩。
李八方
