好多人買股票或者做月供都會用一種指數投資既被動投資方案，理由係：指數投資能夠用低成本又唔洗用腦咁帶黎整體市場回報，亦可以將風險分散去唔同行業
又有好多人寫書話，不論主動式基金或自己選股平均咁計都唔可能跑贏市場，咁不如聽聽話話買個指數基金買入並持有就算
理論上，一個指數包含既股票數目越多，越貼近“市場回報”，因為市場回報就係所有投資人投資所有股票帶黎既平均整體回報，而隨住股票數量越多，道理上風險越低，最終只剩低市場風險
而當然指數既組成會直接影響你既指數基金既回報，咁香港最多人買就梗係盈富基金啦，追蹤恒生指數喎!! 大藍籌喎!! 有息收，長揸實冇死!!
下面呢堆廢話就係用2800盈富基金做一D比較
首先睇下指數既組成
國際指數的組成
一般指數既組成辨法都係按各地交易所上市股票既市值按比例咁排，市值大既股票佔指數較高比重，市值低既，就佔較少比重
例如：蘋果同微軟喺美股市場市值最大，佔S&P500指數最大比重
下表係常見國際指數同表示整體市場既市值
**由於一個指數組成既本身純按市值而定，同公司既行業性質或一個指數入面既行業比例無關，所以指數投資又叫被動投資，因為股票既選擇好公式化、機械化，冇個人既個人喜好加喺入面
恒生指數的組成
咁平時買盈富基金做投資都好被動架啵，條指數點行，隻基金咪點走囉，我地睇睇恒生指數既組成辦法
• 指數包括市值最⼤及成交最活躍，並在香 港上市的股票，亦包括H股及紅籌股
• 成份股經流通市值調整，以反映其可投資性
• 為免指數偏重個別股份，設有百分之⼗的 股份比重上限
• 四個分類指數: 分類指數: ⾦融 公⽤事業 地產 ⼯商業
• 成份股數⽬ 50
睇完都唔知講乜，總之唔係按市值排，而成份股數目max係50隻
由於恒生指數唔係按市值排，例如: 151中國旺旺 (市值約：800億), 3690美團 (市值約：55900億)，1810小米(市值約：3000億)，中國旺旺係恒指成份股，小米、美團唔係
相比之下，恒生指數既組成對比一般國際指數既組成辨法多左好多限制，對於邊隻股票應該加入指數，佢既比例又應該擺幾多，一定加入左人為因素
咁對投資者黎講，同樣係指數投資，唔同既指數組成辨法對投資回報有咩影響
資產管理公司
講投資回報之前，要明白指數就係指數，指數係冇得買的，我地只能夠通資產管理公司發行既追蹤指數基金黎複製相關指數回報，例如盈富基金既投資表現就係追蹤恒生指數既表現
關於資產管理公司，市場上有3大巨頭
Blackrock
Vanguard
State Street
3間公司佔市場佔有率70%，你認識既盈富基金就係由State Street管理
如果想追蹤標準普爾500指數既回報，可以買3140領航標普500
如果想追蹤標納斯達克100指數，可以買2834安碩納指100，安碩就係上面Blackrock既其中一條product line
比較
實際用指數基金同2800盈富基金做比較
藍綠線係2800盈富基金，橙色線係用作比較的指數基金
2800 vs 2825
同樣投資港股，先同2825標智香港100ETF作比較，第一次睇恒生指數同用市值計既港股指數做一次比較
資產管理公司：中銀國際英國保誠資產管理
相關指數：中證香港100指數
指數股票數目：100 (按市值計)
下圖係8年週線圖回報率比較，如果同一時間同時持有2800同2825，同樣都係買港股，但基本上持有2825 4年時間以後，都能夠跑贏2800
2800 VS 3169
既然恒生指數有大約70%生意係同中國有關，如果用2800同中國指數做比較又如何?
資產管理公司：Vanguard
相關指數：富時全球中國股票滬深股通指數
指數股票數目：1205 (按市值計)
今次用1年日線圖比較，唔係為左突顯過往一年3169相較2800點勁點叻，純粹係因為3169上市未夠3年，只好用1年圖作比較
2800 vs 3073
講起中國，有個概念叫大中華，講緊話包括香港、中國同台灣，又試下用2800同大中華股票基金比較一下
資產管理公司：State Street
相關指數：富時大中華港元指數
指數股票數目：439 (按市值計)
今次可以用返8年週線圖做比較，留意返3073個組合入面，有超過40%市值既股票喺香港上市，但只要持有3年半，就可以跑贏盈富基金
2800 vs 2805
不論你對中國既觀點係點，有樣野我地改變唔到，就係中國係亞洲既一部分，再試下用2800同整個亞洲股票指數基金做比較
資產管理公司：Vanguard
相關指數：富時亞太(日本,澳洲及新西蘭除外)
指數股票數目：1640 (按市值計)
以5年日線圖計，終於叫做唔洗跑輸比人地，冇贏冇輸，但以市場風險黎講，2800集中喺香港同中國50隻股票，2805就將個市場風險分險到整個亞洲，1600隻股票既風險點都低過得50隻股票既盈富基金掛，受較少風險賺取同樣回報，加上2805既組合入面，包含大家熟識既Samsung 、LG同DBS 星展，咁講唔知大家又會點睇呢
入場費比較
講完咁多無謂野，最緊要買唔買得起先，2800一手就大概13000蚊入場費，好多學生哥同新手會覺得比較大壓力，迫住去做月供股票，要比額外手續費同一定要用碎股價入貨，姐係買貴左
其實上面講既股票入場費都平過2800，可以參考一下
3169 領航中國就最平，$900已經有得玩，個組合買到過千隻股票
2805 領航亞洲就$2000入場，照正學生哥一手一手咁買都唔太吃力掛?
2825 標智香港就$5000入場，中銀有得做月供
3073 SDPR大中華就$8000，冇得做月供，但都平過2800好多
最後想講多句，恒生指數只係一個指數，任何資產管理公司都可以設計一個指數基金黎追蹤恒生指數既回報，如果講完上面咁多野你都係鍾意2800想做月供用碎股價黎買既話，我話你知2833係由恒生銀行自己打理既恒生指數基金，入場費$3000咋!!!
-----------------------------------------------------------------------------------------------------------------
上面堆廢話純粹係放假太得閒，為興趣寫出黎過下日辰，內容有錯請指教勿屌
Conclusion我就唔落啦，你地自己鍾意諗咩就諗咩啦
第一次開財經post, 請指教
