咯咯咯咯咯 你咯乜撚野呀黃子華？

喺我語境「咯」「囉」有時係有分別嘅。

「囉」音 [lo1]
—約咗兩點佢三點鐘先嚟到囉。
—我咪話咗聽日會去買新電話囉！

「囉」音 [lo4羅]
—係囉(lo4)，咁奇怪嘅(ge2)？

呢兩個讀音都唔可以用「咯」取代。

「咯」音 [gok3] 或 [gok6]
—隻雞咯咯咁叫。（擬聲）

「咯」音 [lok3]
—都話我冇做過咯！
—唔食都食咗咯，唔通叫佢嘔返出嚟咩？

呢兩個讀音都唔可以寫做「囉」。

而「囉／咯」可互換時就係喺讀 [lo3]、意思略等於書面語「了」嘅時候。
—（問）食咗飯未呀？（答）食咗好耐囉。
—今次弊咯！

而「咯」亦唔似「噶」咁有明顯嘅地域性，雖然我手頭基本上冇用廣東話寫嘅刊物，但網上都唔難搵到一啲：

例一，2018年星島
https://hk.news.yahoo.com/%E5%91%A8%E6%B0%B8%E6%81%92%E5%86%8D%E5%A9%9A-%E8%B6%99%E9%A0%8C%E8%8C%B9%E6%93%94%E5%BF%83%E5%9B%A1%E5%9B%A1%E5%8F%97%E5%BD%B1%E9%9F%BF-075300883.html
「如果有就大鑊咯。」

例二，2009年蘋果副刊左丁山專欄
https://hk.lifestyle.appledaily.com/lifestyle/columnist/daily/article/20090110/12071987
「點知當日股市上午已經跌，下午開市後繼續跌，星期四又跌，一萬六千點可望不可即，○九年升幅冇晒咯。」

例三，2007年壹本便利
http://88guagua.blogspot.com/2007/12/blog-post_08.html
「嘩！如果FBI係荷官，遇（着）黎姿就弊咯。」

呢三例都係讀 [lo3] 而用「咯」。所以話香港人只會用「囉」唔會用「咯」，呢個明顯有違事實，起碼撇除雞叫擬聲詞，喺（一）讀 [lok3]、（二）讀 [lo3]、可與「囉」交換用時的確有寫做「咯」嘅例證。

咯 真係蝗蟲字？

真心唔知

「囉」有多過一個音，「咯」亦有多過一個音。我理解到嘅係，有人不滿套戲字幕喺應該用「囉」時用咗「咯」，但「囉」「咯」本身都係有其獨有嘅讀音／意義不能被另一方取代，唔關大唔大陸事；至於重疊嘅讀音/義項上，香港其實兩字都有用。假如當事人接受呢點，咁唯一可以導致不滿嘅就似乎係「讀成 [lo1] 但寫做咯」（但我有啲懷疑）。但如果當事人其實唔接受我講嗰兩點，咁佢不滿可能係因為「讀成 [lo3] 而寫做咯」，又或者係其他原因。我冇睇過部戲，唔知佢實際講緊乜。但單單一句「香港人會用咯？我剩係知大陸仔先會用咯」我就認為肯定錯，以我認識讀成[lok3]——好似「我都話冇做過[lok3]」「都話唔知[lok3]」嗰個 [lok3] 一般會寫做「咯」而且冇代替品。

我睇完以為入左學術台

咯咯咯鬼太郎

唔好意思認真咗，只係咁啱見到有人將「咯」同「噶」拉埋一齊嚟講，又有啲「大陸仔先會用咯」之類嘅驚世言論先至多口講句。我都好想知究竟呢道講緊嘅係邊個「咯」，可惜到而家都未有人釐清，搞到都唔知好唔好入場一探虛實。

囉同咯兩個意思同發音架喎
關大陸字鬼事

當學野

半年一句聲都冇出，套戲臨上就話自己賣樓拍戲d連登又信到足

黃子華應該代言染髮產品
’立即變黃又得‘

香港唔用「咯」？噉你點打lok3呢個音？

小學中學大學都無人用過呢隻字

呢隻驚洗唔洗一個角色升曬幾個job
我見有啲rpg係你升幾個job會有能力疊加

又學到野

仲去睇都傻，擺明爛片

真係大陸字黎

弱智就出少句聲啦

如果開認真 Mode 我就會問，你究竟邊年讀小學、中學、大學？所謂「冇人」，係指你朋友圈子裏面冇呢個字，定係你接觸嘅所有書報刊全部都唔見有呢個字？

正如出 POST 嗰位，信誓旦旦咁話「大陸仔先會用咯」、懷疑佢自己「跟唔上時代變化」、「仲話光復香港 光撚到咁簡單既字都守唔住」、認為用咯係「大陸拼音狗」。我細個睇 Exam，行運超人漫畫大概係 94、95 年出現，當其時我啱啱升中學。但當時嘅漫畫都有用個「咯」字。


圖中呢次大件事「咯」個「咯」喺我嗰語境亦係讀 [lo3] 音、即係有時可以同「囉」交換嗰個。

我亦唔會認為一個九十年代已經有香港漫畫用嘅字，去到今時今日可以話「十個香港人十個都用囉」、可以將使用「咯」字視為對「囉」字嘅侵蝕（反而你講「噶」「嘎」呢啲我都同意）話咁就係「守唔住」。我甚至坦白咁講，我認為講呢番話嘅人有啲無知。

所以，我會思疑嘅就係，出 Post 嗰位仁兄似乎出現咗一個九十至二千年代之間嘅粵語現實斷層。問題就係，佢「冇香港人用咯」，係建基於佢九十年代之前，定二千年代之後嘅語言經驗？

而你嘅「讀小中大學都冇人用咯」固然係一個線索，但唔講清楚時間（即你幾時讀小中大學）其實就冇乜參考價值。假如個時間點係指八十年代之前，咁似乎就係對九十年代嘅粵口語文體缺乏認識。但如果根本九十年代你都未出世，咁所謂「小中大學冇人用咯」，反而可能係唔知點解九七之後「咯」字喺一代年青人之間被消滅，唔知道其實香港九七前已經有用「咯」嘅事實。

（BTW 講到今日都仍然未知套戲裏面用嘅「咯」係喺邊個字義上出現）

又好似佢聲稱「睇咁耐戲只會見到『囉』」，於是對戲中嘅「咯」字感到極強烈不滿。我本身唔係點入戲院睇戲，所以冇辦法由此推敲到佢究竟係喺邊個年代「睇咁耐戲」都從未見過「咯」字而令到佢見到個咯字時咁反感。但係咪啲戲嘅字幕從來唔會出現「咯」字？咁就肯定唔係。例如 1990 年嘅《賭俠》：



片段中劉德華講嘅係「嘩，唔玩咯 (lo3)」，可見香港電影並唔係冇用「咯」嚟轉錄 [lo3] 呢個音，而呢個似乎係爭拗所在。

同一套戲中，亦都有「囉」字嘅出現：



荷：「煙仔唔受個喎！」
星：「買煙賠煙之喎。」
荷：「唔得㗎。」
星：「唔得嘅咩？對唔住囉 (lo1)！」

呢道嘅「囉」係轉錄 [lo1]，即係二音係有分工嘅。

所以出 Post 位仁兄話佢「睇咁耐戲只會見到『囉』」，咁似乎意思係佢可能未睇過《賭俠》，或未睇過戲院上影版、VCD 廣東字幕版、數碼年代之前電視重播（等同 VCD 年代廣東字幕版）嘅版本，即係佢都幾後生下。另一個可能係，佢喺九十年代已經冇留意粵語書寫嘅使用情況，對於香港嘅粵語書寫情況停留喺八十年代，而嗰陣真係冇人用「咯」。

話時話，八九十年代有好多用粵語口語嚟出版嘅書刊，亦有唔少電影係字幕用粵口語轉寫，但而家真係非常之難搵得返。首先數碼電視、DVD Blu-ray 玩隱藏字幕，唔會用返以前嗰啲燒死咗廣東話字幕嘅菲林片（ＶＣＤ年代同以前電視播嗰啲戲一樣都係用上映時嗰套菲林片直出，字幕係一樣嘅）（更衰嘅係，而家係一個 version 全球發行，畫面冇得轉 language，連以前啲廣東話場口都變成書面語，例如九品芝麻官嗰場「嗌交王」牌匾喺電視播都要變成「吵架王」），網上亦都極少有人會 upload 當年啲廣東話漫畫、電影 VCD 上網（之前有嘅都被人舉報冚晒，新嘅就全部係啲冇內嵌廣東話字幕，或者內嵌 DVD 式畫面語字幕嘅版本，好多仲係簡體字添）。呢個對於香港粵文化嘅研究同保存都係一件壞事。

但話分兩頭，喺咁嘅情況之下，我都可以隨手就搵到上面啲例子去指出九十年代嘅香港電影、漫畫以至之後嘅書報刊用「咯」字，將呢個字講成「香港人絕對唔會打」「大陸仔先會用」，似乎就太過牽強嘞。

證明而家後生嘅中文水平真係低左好多