分享薪俸稅知識

小妹從事會計行業，見之前大家都有喺稅局和你stuck，但大家對香港稅制好似唔係好熟識，所以想藉此機會同大家分享吓。香港有3種直接稅，(1)物業稅; (2)利得稅; (3)薪俸稅。物業稅只係租金收入打八折乘15%，冇乜好講；利得稅可以好複雜；薪俸稅比較影響大家，同較簡單，所以以下會集中以Q&A嘅形式講薪俸稅。[註：下面括號()嘅數字代表係邊一條稅例，如(s8(1))代表稅務條例第8(1)條，有興趣可以上電子版香港法例自己睇全文]

Q1: 點解要分享稅制?
A: 你份人工超過免稅額就要交稅。CEO同職安真漢子都要交稅，但如果職安真漢子因為唔清楚稅例/唔知要點報稅，而交多咗冤枉錢，就代表政權收多咗錢。軍隊可以唔講法例，但以我所知，稅局依然係講稅例的。遵守稅例唔會令你交少啲稅，但可以令你唔會交唔應該交嘅冤枉錢

Q2: 邊條法例賦予稅局權力徵收薪俸稅?
A: 稅局根據香港法例第112章<<稅務條例>>徵稅，其中第8(1)條” 薪俸稅的徵收”提到
” 每個人在每個課稅年度從以下來源所得而於香港產生或得自香港的入息，均須予以徵收薪俸稅 ——
(a)任何有收益的職位或受僱工作；及
(b)任何退休金。”
簡單啲嚟講，就係喺香港打工所賺取嘅收入就需要課稅。所以之前有個post話軍隊打算豁免ot收入徵稅，係冇可能嘅

Q3: 幾時要交稅表？
A: 每年5月嘅第一個工作日就會發出個別人士報稅表BIR60，納稅人需要喺1個月內交回稅局(s51(1))

Q4: 我有打工，收入過免稅額，又收唔到報稅表，係唔係唔使填？
A: 如果要交稅但又收唔到報稅表，納稅人有責任喺每年7月尾前以書面通知稅局自己需要交稅(s51(2))。雖然法例寫要書面，但其實打電話畀稅局要求佢地寄報稅表都可以，下面Q14再講點搵稅局個電話

Q5: 我收到報稅表，但過哂期係都唔填，稅局吹得我脹？
A: 過咗期限都收唔到稅表，稅局會寄reminder畀你。你都係唔填，就會直接估計評稅。你年年都唔交稅表嘅，稅局可能會出傳票告你，要上庭的

Q6: 我點知自己一年搵幾多？
A: 你嘅僱主每年都要向稅局填報” 僱主填報的薪酬及退休金報稅表IR56B”，兼且要畀個copy你。除非你唔同意僱主報個數，如果唔係跟IR56B個數填就可以

Q7: 我搵一百萬一年，但喺稅表淨係填廿萬一年，稅局點知？
A: 上面講咗，你嘅僱主會向稅局申報你嘅人工，就算你報細數，稅局都會睇返IR56B個數。僱主冇誘因幫你填個細啲嘅數，因為你嘅人工等於佢地嘅開支，反而佢報大你人工都有機會

Q8: 僱主冇畀IR56B我，點算?
A: 僱主係需要畀IR56B嘅copy畀僱員，如果佢死都唔畀，你可以直接打畀/上/email稅局，叫佢畀份copy畀你

Q9: 如果僱主喺IR56B亂咁報我個人工，可以點做？
A: 如果係銀行過數出糧嘅，自己睇返銀行嘅紀錄，根據銀行紀錄報返收咗幾多糧，兼且另外搵張白紙，解釋清楚點解冇跟IR56B報稅，將銀行statement、解釋連埋稅表一齊寄畀稅局，話畀稅局聽你實收幾多。如果現金出糧，都係另外搵張白紙，解釋清楚，有簽收紀錄嘅就寄埋畀稅局

Q10: 有咩可以扣稅？
A: 主要有MPF, 慈善捐款, 個人進修開支, 居所貸款利息等。上呢個網https://www.gov.hk/tc/residents/taxes/salaries/allowances/deductions/index.htm自己睇

Q11: 有咩免稅額?
A: 上呢個網https://www.gov.hk/tc/residents/taxes/salaries/allowances/allowances/index.htm自己睇

Q12: 收到稅單，發現稅局計多咗人工，或者自己填漏咗扣除/免稅額，總之就唔同意啦，可以點做?
A: 留意返稅單第2頁個計算表嘅下方，”評稅主任附註”有冇解釋個人工點計出嚟，點解冇畀到扣除/免稅額。冇解釋到嘅，提出反對。反對一定要書面，喺稅單發出日期起計一個月內提出(s64(1))，並且講明你點解反對。可以上稅局網站https://www.ird.gov.hk/chi/pdf/ir831c.pdf下載反對表格IR831，填咗，簽好名，畀埋證明文件，交畀稅局。可以寄，可以fax，scan完再email都得(email: taxinfo@ird.gov.hk)。總之填好份表簽好名就可以

Q13: 我而家先醒起5年前報大咗人工/claim漏咗免稅額，過哂一個月反對期，可以點？
A: 唔緊要，6年內嘅都可以追得返(s70A(1))。而家係2020年1月，屬於2019/20課稅年度，只要你喺2020年3月31或以前通知稅局，最早可以claim返2013/14年度嘅野。如果過咗2020年3月31日，最早只可以claim返2014/15年度

Q14: 收唔到稅表/稅單/有嘢想直接問稅局，可以點？
A: 睇返稅表/稅單，搵返個檔案號碼。檔案號碼係6x1-(你身份證號碼)。稅局第二科專門做個人評稅，有A至N咁多組。如果你個檔案號碼係6A1-A1234567，咁你係屬於第二科評稅組A組，直接打畀A組啦。組別電話可以喺https://www.ird.gov.hk/chi/cu_ol.htm稅局網站> 聯絡我們> 本局地址及辦公時間> 第二科搵到。得閒想直接上稅局都得，都係睇返自己屬於邊組，譬如A組嘅，直接上27樓搵主任

Q15: 我唔知自己屬於邊組，可以點?
A: 求其打畀是但一組，講個身份證號碼，稅局啲人會幫你check你係屬於邊組

Q16: 想改地址，可以點?
A: 書面通知稅局(s51(8))，可以download表格IR1249。https://www.ird.gov.hk/eng/pdf/ir1249.pdf

Q17: 成日寄野畀稅局都話收唔到，可以點?
A: 稅表一定要正本，貼好足夠郵票(至少$2)，寄畀稅局，寄完之後過多一個星期再打畀稅局問收唔收到。其他form絕大部份fax或者scan完再email都得。Email到taxinfo@ird.gov.hk就可以

Q18: 收到稅單，係都唔交稅，吹啊?
A: 過咗期都唔交稅，會有5%/10%嘅附加費，兼且稅局會直接鎖你銀行戶口/喺你銀行戶口扣糧，或者出信同僱主講你欠稅，要僱主扣糧，或者禁止你出境都仲得

Q19: 稅局會唔會將我嘅資料畀軍隊?
A: 根據第4條公事保密，稅局係唔可以將資料畀其他人/軍隊(s4)。

Q20: 有冇辦法合法逃稅？
A: 冇，完

總之有咩問題，直接搵稅局。可以claim嘅扣除/免稅額，記住claim! 同記住keep好證明文件至少keep 7年。

有問題可以問，我答到嘅就答。

我一個人嘅力量好小，你一個人嘅力量，講真，都好小，如果你話我聽你係誠哥咁另計啦。但唔好睇小自己，每一個人都可以盡自己嘅力量，做到嘅就做，堅持落去。我自己冇乜貢獻，讀會計冇用，但如果我將我所知嘅話畀你知，而你有得著的話，咁我就讀得有意義。知識傳播開去，希望傳開去，堅持落去。幾時會成功？我唔知。會點樣成功，我唔知。但我知一日未成功，一日都要盡力堅持落去。軍政府可以用催淚彈橡膠彈電槍網槍真槍，但人民可以有恆心決心堅持落去。當時覺得佔中失敗，但你永遠唔知當時認為嘅失敗，會唔會係將來邁向成功嘅一步。

唔係見到希望先堅持，係堅持先見到希望

萬事小心，星期日見

報父母同住其實查唔查到？

Q20: 有冇辦法合法逃稅？
A: 冇，完


講下點樣合法避稅啦

政府野 居屋 公屋 宿者 佢地知 或者 租約打厘印

例如 父母住公屋 你搬左去政府宿舍
或 父母居屋 然後 你搬左出去 份租約拿左去稅局打厘印

重有你申請供水 水費單

不過都要抽中先會查

早兩年有人中左 上左報紙

樓上講得啱 要查可以有好多文件睇

假設你單身 同阿爸阿媽住好合理
但如果結咗婚 報同老公兩個仔阿爸阿媽老爺奶奶爺爺嫲嫲一齊住喺一個400呎單位？
大家報畀税局個地址仲要可能未必一樣

唔好虛報 真係可以告的

覆埋#3 真係冇

進修費用如果已經claim左持續進修基金可唔可以填落去
同埋報進修費好似無要求要寄收據
到時真係查 有證書做證明已經ok?

佢問到你俾唔到嘅話就會取消番你個申請。
一係你保留收據
一係你夾定份收據俾佢紀錄。
同埋拎過資助果部分唔扣得。

咁如果考試
我考左3次先合格
頭2次考試費有無得免稅呢

想問幫屋企人比錢出手術費有無得減免
公立醫院 幾萬蚊

炒散洗唔洗報稅？

留名

冇

要

自顧人士呢？

好似樓主係咪漏咗e form 填稅表？
幾方法既…

進修開支之類呢啲
其實要唔要寄埋張單畀佢？

有架 佢都唔理你考成點

交租無得扣
供樓利息先得