列賓
2020-02-11 08:05:43
利物浦「埃及文明」鋒線穆罕默德沙拿、沙迪奧文尼、羅拔圖法明奴無堅不摧,但呢個夢幻組合面臨拆夥,英國《太陽報》爆料,指德甲豪門拜仁慕尼黑提出今夏用7500萬鎊(約7.5億港元)收購羅拔圖法明奴,接替即將32歲嘅射手羅拔利雲度夫斯基。
拜仁慕尼黑近年喺德甲優勢減弱,喺周一(10日)凌晨榜首大戰,主場僅同RB萊比錫打和0:0,繼續領先RB萊比錫1分。會方為延續霸業,已為下季組軍做準備,除咗力斟曼城24歲翼鋒利萊辛尼之外,依家想簽埋28歲嘅羅拔圖法明奴,打造一條更有活力新鋒線。
雖然羅拔圖法明奴唔似羅拔利雲度夫斯基係高產射手,但據悉拜仁高層好欣賞佢技術全面,屬於當今球壇最優秀進攻球員之一,而且呢位巴西國腳曾於2010至15年效力賀芬咸5季,對德甲非常熟悉,絕對冇適應問題,可以即食。
事實上,拜仁另一個收購目標利萊辛尼之前效力史浩克04,本身又係德國國腳,可見拜仁買人方針,好重視德甲經驗,所以願意付出7500萬鎊(約7.5億港元)搶購羅拔圖法明奴。
羅拔圖法明奴已經效力利物浦5季,捧過歐聯冠軍,如果今季贏埋英超冠軍,或者會考慮尋求新挑戰都唔奇。