「兄弟爬山，各自努力。」
導論
呢八隻大字，基本上個個上過連登嘅香港人都識講，但又係咪每個人都深思過箇中意義？
目的
跟住落嚟希望香港人可以一齊探討下咩叫「兄弟爬山，各自努力」，一齊理清各自思考盲點。
正題
其實八隻大字都離不開兩隻字 － 「尊重」。
代表你可以唔支持某一樣嘢，但你唔可以唔尊重同路人。
以往，無論係舉美國旗定係加泰集會，都實有支持同反對聲音，但輿論主體嘅氣氛亦係偏向互相尊重同路人，而且只要得知各位同屬抗共一邊嘅政治光譜，都會理性分析，友善提醒。舉美國旗嘅舉美國旗，不舉就不舉；去加泰集會嘅去加泰集會，唔去就唔去…… 靠嘅就係「兄弟爬山，各自努力」。最終結果有目共睹：兩樣嘢都係有利於香港嘅。試想象下，如果當初所有活動一早就俾人扼殺於幼苗時期，連一絲可能性都唔俾擁有嗰陣，係咪又對香港人有利？
不過回望現在，失望嘅係，無論係「兄弟爬山，各自努力」定係「不割席，不篤灰」竟然都容不下謹謹一句「香港獨立」。觀乎連登，就係一班人走去用恥笑同輿論壓力嘅方式去壓止「香港獨立」嘅幼苗發芽，連「香港獨立」一絲嘅可能性都唔畀存在，連一絲嘅成功機會都要奪去，又係咪真係對香港人有利？
當然，你可以用理性分析嘅方式、互相尊重嘅語氣對「香港獨立」作出友善提議，套用返我頭先所講嘅，就係你有得唔支持「香港獨立」，但你冇得唔尊重提出「香港獨立」嘅同路人（當然前提你仲當佢哋係同路人嘅話！）
最後，與其花時間恥笑「香港獨立」，不如槍口對外共產黨！切忌恥笑同畀輿論壓力落同路人，恥笑同輿論壓力呢兩樣嘢係留畀對手嘅；切記尊重同路人，尊重係留畀同路人嘅。千祈唔好調轉兩者！
埋齋
睇咗咁多，大家仲記唔記得當初嘅勇武派係點樣壯大？勇武派做完嘢，文宣組點樣不割席之餘而又幫手補飛？和理非又點樣爬山，各自努力？
同一個模式，點解唔可以套用落「香港獨立」到？
做唔到「不割席」，都起碼要做到「兄弟爬山」！頂多咪你又你講「時代革命」，佢又佢嗌「香港獨立」，唔洗獨派當賊辦嘅。
REPEAT，尊重！