，介紹咗嗰喺立場新聞刊登嘅『極權求生錄』系列，入面介紹咗以東歐民族為主喺極權政府之下堅持抗爭嘅故事。佢哋唔夠人打，所以都係和理非，分別係佢哋係成個群體人人都keep住抗爭，成功做到長期戰。喺依家運動有種樽頸感覺嘅時候，希望大家睇下，討論吓。只要團結同堅持，和理非嘅力量都可以好大，一齊走落去。
當年東歐國家嘅環境好惡劣，以愛沙尼亞為例，蘇共統治期間大規模殖民，俄羅斯人高峰期佔愛沙尼亞人口三成。佢哋又逼害好多愛沙尼亞精英，安插俄羅斯人取代佢哋，以配合愛共政權控制晒成個社會。係咪有啲似曾相識嘅感覺呢？其實極權政府個套手段從來都無變過，不外乎威逼利誘同思想控制。打，你唔夠佢打，資源又冇佢咁多。唔講歐美援助個啲外在因素，弱勢嘅東歐人自己又做咗啲咩最後成功重光呢？『極權求生錄』系列入面嘅波蘭人，愛沙尼亞人甚至乎另外提到離鄉別井嘅猶太人都有一樣特點，就係佢哋會做好多嘢去維持佢哋嘅民族身份認同。波蘭人有「飛行學校」同團結工聯對抗蘇共，愛沙尼亞拒絕同境內嘅俄羅斯人交往，猶太人喺異地都保持自己嘅信仰習俗，透過教育爬上進入社會上層，獲得權力同資源去保護同胞。（細節可以睇後面『極權求生錄』嘅link）因為只要一個民族失去身份認同感，即使佢哋個人仲存在，但係文化上已經被滅族。族群只要一日未被滅，一日都可以同政權鬥長命。
事實上呢場運動就係由送中修例觸發嘅一場香港民族（本土意識）捍衛戰，大家覺得香港赤化緊，民主自由，人權公義呢啲核心價值受侵蝕，所以先企出嚟抵抗。呢樣係整場運動嘅初心，亦係大家香港人身份認同嘅核心。大家要意識到，呢場抗爭唔會止於五大訴求，就如反廿三條立法同雨傘運動咁，訴求只係整個捍衛戰嘅一部分，講到底都係為咗捍衛大家作為香港人嘅文化價值，反抗赤化。要意識到呢點大家先肯好似東歐人咁將抗爭變成生活嘅一部分，對抗滅族危機。
一路都有人講長期抗爭，所以依家咪有個發展緊嘅黃色經濟圈。但係大家都知香港人幾咁善忘，唔擅長跑長跑，所以都有人好驚大家會淡忘。下面提議俾大家嘅任務唔係咩新嘢，問題係有唔少人有能力但係唔肯做，好嬲完又少少嘢都肯唔做。做緊嘅人太少，就容易氣餒，件事缺乏凝聚力。成日話和理非好難再行前，依家大家有機會啦。記住今次運動一個好重要嘅宗旨「兄弟爬山，各自努力。」係各自努力，唔係得閒努力吖。大家都有自己嘅長處同技能，好似識設計嘅文宣線，揸校車嘅家長，甚或乎好似攬炒巴咁，主動涉足唔熟悉嘅外國戰線。最緊要係事無大小，大家都肯主動嘗試去試去做。跟住已經做緊嘅就要去同人組隊做，效果好啲又安全啲（特別係整連儂牆）。下面個啲純粹係提議，相信大把人有更好嘅idea，最重要係大家積極討論，俾啲意見。如果認同就直接（拉埋朋友一齊）去做。行動最實際。
依一刻就可以做:
禮拜日已經係區議會投票日，除咗一定要投票外，可以去問下參選人嘅義工隊仲有冇嘢要幫，好似派吓傳單做下搬運工，做最後衝刺。
積極參加吓手足發起嘅形式活動，好似配戴remembrance poppy，之前嘅口罩日，琴晚嘅和你唱，721紀念日嘅集會等等。呢啲係已經有人做緊但係唔少人覺得太膠或覺得無用而唔參與嘅事。形式上嘅嘢雖然冇即時嘅結果睇到，但係佢係心理同文化建立上嘅長遠作用，持之以恆咁做，可以團結大家同埋互相鼓勵。現有嘅文化，好似節日同習俗其實都係咁黎，對於一個群體係十分重要。
習慣組隊:由朋友同社區開始建立網絡，朋友搭朋友又好，參加地區活動又好，主動啲去認識同路人，組隊唔係勇武嘅專利。無大台壞處就係無組織，太鬆散。但係連登TG呢啲社交網絡，又好容易被帶風向，滲透同監視，所以唔少人都唔敢依賴佢哋去組織。而面對面雖然傳統但係穩陣。長遠慢慢擴大個範圍，喺各行各業建立網絡，睇落好似飲飲食食，得閒利用下自己嘅知識同技術幫下大家，大家分享下資訊，就可以不受注目咁存在。呢啲非正式組織，最後成為社會運動嘅中流砥柱。
多啲留意自己社區，提供自己社區紅黃藍嘅商店同組織名單，定時更新同修正，俾料whatsgap同其他黃色經濟圈，順便拓展做生活圈，杯葛任何奶共嘅組織。
毋忘義士，支援義士及其家人，如果係你社區嘅義士，不如主動去幫手了解吓，話俾大家知可以點幫。
毋忘警暴，backup好啲片段。
教育好重要，但係需要嘅資源同人手好大，無組織比較難做。簡單啲嘅可以多啲參與義務補習，幫下啲學生，小朋友。佢哋為抗爭犧牲咗好多，相信好多人都有能力教下佢哋讀書，補吓課咁。另外依家網上都多民間教室，多啲share同搞下放映會等多啲外面嘅人可以睇到。學生又可以學下課程以外嘅知識。大家都知猶太人出名醒目，因為佢哋好重視教育，尤其喺辯論訓練同培養下一代嘅學習興趣，有時擁有高等學歷嘅猶太人比例比佢哋所處當地嘅人仲高。依家國教同普教中，加上大陸娛樂文化興起已經成功影響好多中小學生。依家好在仲有一批當年反國教時期嘅一代年輕人為香港人企到最前。要抗衡同化制度，維持運動嘅延續性就要做好對學生嘅民間教育。
確立真香港人嘅群體主張同文化，將群體認同定義喺文化同價值觀到，包容唔同種族、宗教、思想嘅人。只要係今次運動嘅同路人，追求自由同公義，唔理你係新移民定南亞人，基督教定伊斯蘭教，和理非定勇武，都係自己人。目標一致，矛頭集中，將所有之前和運動間衍生嘅訴求總括喺大目標到，賦予每人各自之小目標和方向，以自己的方式「擁有」這場運動。
希望大家多啲諗下可以做啲咩，主動去傾。唔係淨係喺連登做冷氣軍師，紙上談兵。
