https://www.facebook.com/218575328195856/posts/2496841997035833?sfns=mo
一，好多人問我：「香港 End Game 會係點。」我唔直接答你，用推理去講我嘅估計。無錯，我又唔係 上帝，又點去用未來絕對正確嘅視點講目前，係咪？
二，先從北京嘅角度講。基本上，只要 what happens in HK stays in HK，佢哋已經接受咗短期內化解唔到矛盾呢個事實。
三，有人講，乜你唔係主張 #LeaveUsAlone 咩？What happens in HK stays in HK 咪好囉。我要講清來，Leave us alone 係北京唔好破壞香港既有結構同平衡，北京嘅方針，似乎係佢搞香港就得，香港搞到佢就唔得。
四，再具體啲咁講，即係唔出現咩「上海人撐香港人」「北京學生中大學生連線」，就係 What happens in HK stays in HK。
五，「吓，家陣班 #小粉紅 都好憎香港人喎。」Exac7ly。北京嘅思想防疫工作，其實早就開始。北京好強調，我哋香港人驕生慣養，受盡好處但唔感恩。點解要咁樣離間，甚至係要製造矛盾呢？之前我經常講，北京嘅文宣，對像係大陸人；佢理得你香港人覺得荒謬可笑。
六，北京最關心，一定係中共獨裁嘅合理性。某程度上，佢哋好積極用今次傀儡政府管治危機，去肯定返中共嘅一套極權手段。
七，我認，我擔心北京好似對付新疆咁對付香港。
八，另一邊廂，香港人。和理非，其實冇乜變數可言，有能力嘅都已經諗緊點走同幾時走。勇武呢？佢哋唔需要人多，一千幾百都已經可以繼續某程度嘅抗爭。
九，我又認，我最加擔心勇武會再進一步演變成再激嘅抗爭模式。好似 IRA 咁嘅「非正式民兵」，北京同傀儡嘅定義裡面，一定係恐佈主義。
十，公安條例唔夠辣？國家安全法囉？都幾肯定，假如勇武升級，宵禁只係小兒科。
十一，屆時，更多和理非會選擇移民，肯定。至於會唔會有和理非割蓆，其實已經唔重要。因為去到個一步，勇武已經有某種類似秘密組織嘅文化，會同外界有一定嘅隔膜。
十二，發展到呢個地步，究竟要等幾耐？我會話 soon enough。家陣被捕嘅抗爭者，都未正式進入司法程序，係咪。我好少預言，但當我預言，係因為我真係好擔心。直覺係，當抗爭者接受法庭審訊，又係另一個轉捩點。
十三，權貴建制仍然以為嚴刑埈法會有「阻嚇作用」。佢哋冇諗過任何動物 fight or flight 嘅本能；和理非選擇 flight，但勇武會相信只有 fight。
十四，即係話，依家唔止係放棄一代人，直頭係摧毀成個 institution 呀！
十五，遠在北京操控傀儡嘅，就繼續「制度自信」。
十六，香港人無論摧毀幾多個傀儡，北京繼續有源源不絕嘅供應。
十七，好，講點破局。唔少人覺得，問題核心係要美國介入，北京就會驚。從搏弈論角度分析，如果北京都假設香港人會行呢條路，佢哋嘅反制策略，就係再進一步高舉民族主義，將香港人都標籤成通敵嘅漢奸。
十八，所以，真正嘅破局，係要連大陸裡需嘅民眾都覺得，香港嘅前途關佢哋事。我知，呢個策略好難。不過，今日見到網上傳一個中大嘅大陸交換生寫嘅心聲，我又覺得唔係冇可能。重點係，我哋從一個點嘅道德高地去贏取呢班大陸朋友嘅認同及支持。
十九，再講一次，係難，好難。但就係因為難，所以值得做。
二十，假如我哋香港人比中共更得到十三億人嘅認同，咁我哋就一定贏。我發覺至今最大嘅思想盲點就係，將中共當作成十三億人嘅代表。
廿一，毫無疑問，大陸係好多人支持民族主義，支持中共，但任何意識形態都係雙刃劍，民族主義都係。中共係咪最識得舞呢件意識形態武器呢？我唔覺得係。另外，意識形態嘅操作，係極度 scalable 。香港人過去幾個月已經顯示出我哋文宣嘅絕對優勢；我認為應該開返呢條戰線。
廿二，中共核心，其實最多都係幾千人。記住，政治真係鬥多人。我哋可以扭轉局面，首先唔好失道德高地。