「你想去邊我都陪你﹗」
上星期煎Pang定欣孖住出席影視展，訪問時當眾打情罵俏，定欣指恨拍旅遊節目，記者問想去邊？定欣心心眼望住展鵬問：「你想去邊？」煎Pang甜爆回話：「你想去邊我都陪你﹗」定欣登時被電到暈陀陀，笑到花枝招展。
山頂密會斷正
不過在定欣出發吉隆坡拍廣告後，煎Pang就被被斷正與16年落選港姐單文柔密會，兩人摸黑上山頂歎外賣！當記者上前影相時，煎Pang表現驚慌，左掩右遮，反而女方較為鎮定，碌大眼望向鏡頭。方寸大亂的煎Pang開車速逃，倒車時更撞向後面的採訪車。事後煎Pang聲稱定欣只是同事，二人從來冇拍過拖，同時亦打死唔肯認新女單文柔：「佢係我stylist，嗰日佢幫我揀啲衫褲登台，要好多謝佢免費幫我。(點解上山頂傾？) 幫襯開嘅餐廳冇位，又冇地方泊車所以喺車傾囉。」
愁爆食tea
定欣和煎Pang早已是外界認定的一對，但突然傳出煎Pang竟然有個女友單文柔，難怪定欣咁傷心。唔使開工的日子，好姊妹又個個忙拍劇，定欣就與助手去鯉景灣食tea，不過見到佢一臉落寞，全程冇笑容，睇嚟心情相當差。
煎Pang一拖二同場
今年一月時，無綫拉隊參加公益金百萬行，出爐視帝視后煎Pang、定欣領隊參與，當時已經和單文柔拍拖的煎Pang做戲做全套，全程同定欣孖公仔，不時舉機跟定欣自拍，定欣冧爆挨實。單文柔等代表港姐出席，一男兩女來個大合照，真係一家親。
之後農曆年初四，煎Pang和定欣結伴到無綫高層樂易玲屋企拜年，當時一眾港姐包括單文柔亦在場。當港姐們不時搵視后定欣集郵，惟獨單文柔一直在屋外露天花園跟其他人自拍及聊天，煎Pang安排兩女同場，兩頭瞞認真膽大包天！
好姊妹力撐
可憐的定欣上錯賊船，幸好有「胡說八道會」一班好姊妹全力支持，據知杏兒睇到煎Pang單新聞後好嬲，即時撇低老公去開解定欣。當初定欣煎Pang互有好感，定欣亦體諒對方比較慢熱，工作又真係好忙，所以唔介意慢慢發展。點知煎Pang原來暗地裏媾緊個港姐，定欣怨自己蠢上錯賊船，杏兒見狀都戥佢唔抵，同班姊妹喺背後鬧爆賤男！
