希望可以結集連登仔既力量 比啲壓力學校 比返個公道事主
小一時已經成日俾同學整親，例如專登用腳整跌佢，用波掉佢頭，身...老師一直話睇唔到，只靠我仔單一面講好難相信事實，成日叫我地原諒別人，身上有明顯傷痕都唔理，我已經忍了一年，亦都將自己調整，教自己個仔要小心，又或者加緊留意危機，好不容易上到小二，上半年照舊被同學玩弄，例如去廁所從後摸佢patpat，同老師講，老師叫佢入廁格，我地都係以避嘅態度去面對。
今日發生一件令我感到好無助的事，小朋友係午息(大約係1:00-1:25)其間，俾一個同學用拳頭打肚，而呢個小朋友就係摸佢patpat嗰個小朋友，未打我仔之前嘅一日，即係琴日，呢個小朋友已經明言要打死我個仔，係班房高呼要殺死我個仔。(呢個小朋友亦唔係第一次打人，男、女同學都俾佢打過)琴日我個仔已經好擔心自己俾人打死（本身有焦慮症）咁今朝我送返學時已經同級主任講有d咁嘅事，我並唔係追究，只希望老師留意，當時級主任表示未發生的事不可以處理，叫我都不要過份擔心。我就點頭，離開學校。
直至今日放學，有一位同學跑出離話我知：
"姨姨x
我個仔名字）俾人打。佢而家係醫療室。"我就跑入去，醫療室無人，原來去咗校長室，我個仔一見到我就大喊，好激動，講唔到嘢....😭我無奈、無言...無人話我知咩事，我就攬實我個仔等佢喊，其間老師叫咗頭先話我知我個仔出事嘅同學入離，老師叫佢唔好亂講嘢，我就拖住嗰位小朋友問：
"可唔可以話俾我知咩事？"
小朋友講得好清楚我個仔點俾人打，老師好悪叫同學諗清楚先好講，仲趕走唯一可以做證嘅同學走，當時我好亂，但因為要顧及個仔情緒，我無理論，其後老師又再叫一位女同學入離話見到事實真相，女同學話見唔到有人打我個仔。講完就出返去。
其間我個仔不繼大喊，收唔到聲，我要求另一房間可以安撫我個仔，我個仔最後講到件事，被打，肚好痛，有紅有瘀，我要求校長處理，亦表示我接受唔到暴力行為，校長話可能我個仔未表達到，示意我回家再問，仲叫我個仔要誠實面對自己講過嘅嘢，我話我要求對方家長知道件事，
#校長話：
"#呢件事無人睇到，無可能信我小朋友！"
我好嬲，我個仔同時又爆喊，因為校長迫佢原諒人，話打佢嘅小朋友同佢玩，叫我個仔唔好將玩當打離嚇媽媽。仲問我要不要轉班？我問：點解我要轉班？我承認我自己當時好無用，講完「點解我要轉班」我流住眼淚轉身離開學校，無再爭辯落去...
離開學校門口，我問：
"點解媽媽今朝叮囑你唔好行埋去會傷害你嘅小朋友身邊？"
我個仔話：
"係佢行離打我！"
我問點解俾人打後唔等一時間要求學校打俾媽咪？我個仔話：
"已經落咗醫療室，一直坐一直喊到我離為止都無人理佢😭仲話：#校長捉我個房話：#如果俾我知你屈同學打你，#我唔會放過你！"
我聽到好心痛，點解校長會咁！我就帶我個仔睇急症，同時係醫院報警，呢個係我當時諗到唯一嘅做法，
警察話：
你報警無用，事實上10歲以下犯事都告唔到。
首先我並唔係想告個小朋友，我只想有一個人介入話俾佢家長知呢件事，我唔想再發生！我好無助，警察話最多幫我打俾學校了解返，#校長竟然同警察講我個仔表達能力有問題，學校真係睇唔到，唔可能信我仔嘅說話！
我同警察先生講：你個仔自閉，你可以同佢溝通下，佢唔係驚恐下對答係無問題的，頭先校長係學校匈佢，佢先講唔到件事，警察先生都表示好無奈，亦都愛莫能助。我哭求警察先生幫我備案，警察先生叫我明天揾到證人先再報警，我無言，我明白的..！
警察先生走後，我依然係急症室等候，其間收到警察先生來電，問我知唔知對方家長電話？我問到其他家長拎，俾咗警察先生。睇完醫生返到屋企，警察先生又再打俾我：話已經揾到打人嘅小朋友同家長，#對方都承認有打我個仔。
我好激動多謝警察先生幫忙，但警察先生話：只能夠做到口頭警告對方，希望我明白佢地職責問題，我好感謝警察先生，#至少證實我個仔無講大話，#無屈人！我好想聽日返學校同校長理論返件事，我真係唔想個仔被人再傷害，我會轉校，但呢段時間轉我知道唔容易...但未轉到校其間我應唔應該返學？可唔可以俾d意見我？我需要勇氣去面對...
希望你地明白我感受，打呢篇字我都未能平伏，我唔知自己可以做d咩...作為媽媽嘅我，我只知道我需要保護已經受傷嘅孩子....
個校長叫乜名？
