狂賀!! 被篤灰後傳妻移民美國被拒警證實謝Sir放大假2周

積克鶳 2019-10-09 01:30:27

港人6月以嚟，面對警方濫權濫暴甚至向學生心口開槍，都仍未能申張公義，更加多次目睹警方涉嫌縱容黑幫、撐警人士恐襲平民，全城民憤可以話係谷到頂點。不過，莫非係驚終有一日要為自己言行負責，早前就有網民話公共關係科總警司謝振中謝Sir，太太已經有綠卡，佢就想申請埋做美國移民。多次去美國發言嘅香港眾志秘書長黃之鋒即刻「助攻」，話同美國方面講咗，要鼓勵謝Sir全家世世代代留喺大灣區呀。今日記者會謝Sir罕有唔見人，網民都好關心佢去向，八方聽講最新消息，就係傳聞謝sir申請美國移民被拒，睇嚟都係要繼續做中國人先喇。

每次警方記者會上被問到涉嫌性虐性侵被捕人士、行刑式近距開槍、射爆眼打甩牙、港鐵站內無差別棍毆平民同噴胡椒噴霧等等嘅暴行，警方都係答非所問，甚至只求掩飾包庇警員，「指心口為膊頭」都做得出。謝sir呢幾個月都經常語出驚人，例如8月尾荃灣有舉槍警一腳踢開跪地市民，謝Sir就話係用腳「推開」；有外籍警司將被警方私刑腳踢嘅「守護孩子行動」成員，形容係踢向「Yellow object」之後，佢就幫口話證實唔到警員有踢向被捕男子，唯一能夠肯定係警員身上「橙色炳長槍喺男子身上位置有搖晃過」。

次次咁樣幫警暴「漂白」，自然成為網民想美國《人權民主法》制裁嘅對象之一，有網民10月3號facebook群組撰文，話謝Sir太太已經有「conditional green card（綠卡）」，佢自己都等緊拎綠卡呀。網民當然唔捨得謝Sir背棄祖國啦，之鋒當日已迅速回應網民訴求，喺facebook話，「同咗華盛頓嗰邊講，希望鼓勵謝振中全家世世代代留喺大灣區，做個勇敢的中國人。」呢排共和黨海外事務組織副主席俞懷松（Solomon Yue），已經多次表明建議將香港某啲人員納入制裁名單，包括成個行政會議團隊。唔通今次真係之鋒「篤灰」成功？睇嚟而家，謝Sir張綠卡隨時係咁先喇。

PPRB話謝Sir放2個禮拜大假，但就無講明幾號先返工，至於移民嘅傳聞就無回應喇。據知謝Sir喺PPRB任期到本年底就完結，正常情況都會調到去其他新職務。如果真係俾美國呢個「外國勢力」拒諸門外，相信謝sir都唔使唔開心，可以學下去埋北京威威嘅「光頭sir」，成家人回歸祖國大陸懷抱，永享大灣區榮耀咪啱晒囉。

抵撚死啦dllm