【一屍兩命的經濟爆破】硬實力與軟實力，先有雞，還是先有蛋？
相信就算冇留意開經濟新聞嘅朋友都應該聽過「失落的二十年」，從事相關職業嘅人當然對呢個term熟悉非常。由1989年到2019年間，失落嘅日本究竟如何支撐落嚟，又或者呢失落嘅二十年，日本仔創造咗啲乜嘢，接下來我地一齊緊從上帝視角，夢回1989，重新認識一個神奇國家衰而不敗。
正所謂先破而後立、置之死地而後生，無論古今中外，一切神話嘅展開、結末都係由戰亂至克定，再由和平至鬥爭，人族從來都係將未來寄託於未來，而恰恰總會有人成功，雖然有人失敗，但終會從困局走出，起死而回生。先講結論，委員長認為日本經濟泡沫爆破帶來嘅衰退，其實並非全然係壞事(當然嗰班炒樓炒到變負資產嘅真心好慘)，反而為日本去病從精，真正意義地脫亞入歐。
呢失落嘅二十年，好多經濟學者都話日本如何慘、如何陰公，然後妄斷咁得出同美國簽貿易條約就=亡國嘅結論，呢個好明顯係錯誤嘅推演，實情明明就相而反之，因為同美國簽咗條約，日本先有機會脫離低級生產模式，轉型做第三產業、第四產業甚至第五產業嘅生產大國。大家望下依加嘅中國大陸，號稱世界第二大經濟體，但係貿易戰中仍然畀美國撳住嚟打，只能夠拖延時間，避而不戰，不值一提嘅紙老虎(當然呢隻紙老虎突然冇咗都會造成全球產業鏈斷裂，從而有大批貨交唔到單，一大堆靠中國生產嘅企業會執笠)，雖有影響力，但完全對美國嘅經濟本質——石油，造成唔到一星半點嘅動搖，只要一日美元係石油本位，一日都冇人挑戰到美國。
好回歸正題，日本呢失落二十年，真係失落嗎？委員長觀並非如此，相信各位唔多唔少都有打機，日本呢個遊戲大國，每年對內、對外輸出無數嘅產品，以SONY、SEGA、任狗等公司為首，係賺錢之餘對外國輸出日本文化，又令日本形象係世界中標奇立異而不失大國之風，除中韓以外所有人都認為日本係有一個友善嘅國家，國民有禮、建築優雅、文化悠長。呢啲看似微不足道嘅細節，正正係日本立於世界嘅不敗之道——世界認識日本、需要日本、喜歡日本。係軟實力方面，可謂無人能出其左右。
咁香港又如何學習日本仔嘅成功之處？其實不然，香港一早已經具備深厚嘅文化底蘊，我地擁有自己嘅電視劇、電影業、音樂界、飲食文化等等等等好多係我地日常生活嘅事物，都係香港嘅軟實力所在，只要新政府推而廣之，向世界銷售香港生活之優秀，天下萬國，無人不識。
咁硬實力又如何，日本仔深明大義，知道僅靠文化係無法服人，正所謂拳頭大就是道理，但日本又無法擁有自己嘅軍隊，呢一個係死結。故佢地另起爐灶，大興高端產業，何謂高端，即高技術、高成本，走在世界之尖端。以瑞士為例，就係輕工業，如汽車零件、藥物生產、鐘錶工藝等，呢一啲無法大量生產而依靠小量匠人製造嘅產業正係瑞士成為世界最穩定經濟體嘅緣故。
後來日本仿傚之，雖然因地緣政治所限無法成為瑞士咁嘅中立國，但佢地發展重工業、電子業，擁有大量高檔技術，連中國、韓國都頻頻派特工「借鑒」。多年發展，依加嘅日本已經成為世界之春袋，邊個郁日本=電子業收皮，唔係委員長亂蹹廿四，近期嘅戰績就有日韓小型貿易戰，日本限令原料：氟化聚、醯亞胺與氟化氫三種等半導體原料出售，韓國三星即刻收皮，工廠全線停產，根據韓國中小企業中央統計，因管制措施有所衝擊中小企業嘅韓國中小企至少達269間，此正是日本仔嘅厲害之處。故香港建國後必發展高端零件產業，一定要不計成本，勢成世界之春袋。
講住咁多，下篇我地探討下點解英國佬會放棄香港咁大個銀包，而美國佬當年不欲介入，到2019嘅今天卻突然入局？香港政治到底有何獨特地位，我們下回再見
