作為一個唔會點上前線，膽小怕事的和理非，明白到今日真係講幾多次sorry都無用。
見到前線手足被補被虐打，控訴無門，咩方法都試過晒，但五大訴求仲未有一項落實，更甚是，被秋後算帳的人愈來愈多。
無錯，上星期日維園同港島嗰一片人海，真係令我好感動。
但，當我星期一再返工時，地鐵見到的仍然係一張又一張冷漠的臉。低頭碌機的碌機，或依舊企喺車廂中間郁都唔郁，但身邊的人可能就係星期日出過嚟的手足。面對住兩個咁嘅平行時空，你話點會唔心up——原來一到上班日子，我哋就打回原形.......
回想8月5日嗰次罷工，真係好一鼓作氣。雖然得嗰35萬人，但成效好大，好多鋪頭提早落閘。試想想，唔好話200萬人一齊罷，只要有100萬位和理非參與，罷工的威力一定更奏效！我見而家好多人都吹緊9月「持續罷工」的風，我真心覺得今次直情係我哋和理非報答被捕受傷手足的大好機會！
我由呢幾個星期開始，加入咗三幾個地區TG groups，幫手做吓文宣之餘，真係比好多素未謀面的手足感化到，真真正正相信——「罷工就是最勇武的和理非」。
和理非，9月一齊至少罷三日，甚至一星期，好嗎？
