〔On膠野〕是咁的，我是一個童貞魔法師

於LIHKG重新連載，再見高登

係好耐好耐以前，流傳住一個神秘既都市傳說：只要守住童貞到二十歲，就會識得用魔法，到廿五歲既話，就會變成魔法師，而如果秉著堅忍意志一路維持到五十歲既話，仲可以成為大賢者，但係呢個物慾橫流既社會，珍貴既魔法師已經消聲匿跡，成為可遇不可求的稀有人物……


但係… 屌你咩！點解偏偏要係我！我唔要做咩魔法師去拯救世人，我要破處，我要屌hi呀！



呢個係一個童貞男既掙扎故事，到底係破處先定救世先既殘酷物語…

<故事的開端>


係擠逼既車廂入面，有一個衣著品味毒特既四眼男子，面對住一個韓系型男喺度劣鳩既同時口中唸唸有詞。


無錯，呢個係度劣鳩既男人就係我，阿翼。


事先聲明我並唔係咩變態，我亦都唔想咁做，一切只因我係一個童貞魔法師。而點解會變成咁，咁就要由大約大半年前開始講起。


當時我仲係一個青春不再、單身無拖拍既毒撚，係一個社會上嘅失敗者：無父幹、無錢 、無車無樓，連女都無，身上最寶貴既就係對我不離不棄既貞操。


奇幻既事情始於一日我搭地鐵返工既途中，突然有一個陌生男人從後拍一拍我膊頭。我擰轉頭問佢咩事，佢就同我講話：


「先生你好有潛質，仲好有才華，如果你唔介意嘅話用你部電話黎掃一掃呢個QR code，了解一下詳情，我地先再約個時間傾。」


跟手佢就拎左部電話出來，一解鎖就彈出個QR code黎。我企定望清楚眼前呢個男人，發現佢同我一樣發出一陣陣毒撚嘅氣息，只不過年紀比我細幾年。眼見佢個樣人畜無害，又唔似想爆我菊，心諗住掃一掃個QR code都無乜損失，於是就做左我人生中最錯誤嘅決定，從此展開咗一段不平凡的經歷。


我掃完個QR code之後，個男人就係金鐘站落咗車，而我無再理個男人，拿拿聲睇下部電話彈咗啲咩出嚟，原來個QR code係一個網址。打開個網站既時候我仲擔心緊會唔會中毒之類，點知唔睇由自可，一睇就心都離埋：佢彈左個網站名叫咩「魔法師聯盟」…


我係心入面屌左出黎，原來又係果啲電話遊戲廣告。宜家啲銷售手法真係無孔不入、無奇不有，專向我呢啲毒撚埋手。之後我無再詳細睇個網站就已經到站，跟手仆咗去返工。


返到公司我一如往常咁俾其他同事奚落，但我已經麻木咗，對佢哋嘅說話冇乜感覺，主要因我為人寬厚，從來唔理佢地嘅冷言冷語同埋冷嘲熱諷，所以漸漸地相比起一年前我入職以黎佢地少咗單單打打。


公司大部分差唔多年紀嘅同事都已經結咗婚甚至有埋細路，比我年青嘅又拍晒拖，同輩中以我既職位最低，所以我喺公司已經慣咗無乜地位。我每日返工既目標就係準時收工，因為我好似好多香港打工仔一樣收工之後繼續進修，寄望有一日仲有機會可以向上流。

我宜家夜晚讀緊master而成績亦都唔錯，班教授亦都幾睇好我。如果我成績可以維持到水準，佢地仲會推薦我去做助教，到時我就可以擺脫宜家既困境兼同班仆街同事講拜拜。呢個就係我繼續留係公司裏面嘅第二大理由，而最大嘅理由就係我需要一份工去應付日常支出同學費，就算唔使養父母我都仲要養自己。


放工之後我趕去買個麵包就返學，返到學校趁未上堂就拿拿聲啃埋佢等上堂。咁我讀果科女同學比較多，而當中九成都係大陸黎嘅富二代。


佢地嘅話題全部都係圍繞住食玩買同旅遊，仲要全程普通話，所以我呢個毒撚一直都無埋到堆。無聊之際我就諗住上下網打發下時間，點知一開瀏覽器就彈返開果個魔法師聯盟既網頁。


我屌左一聲，但既然無野做就睇下到底係咩一回事。點知認真一睇，發現佢唔係一個電話遊戲咁簡單，簡直係類似一個詐騙集團或邪教咁。我仲記得大約嘅內容係講話：


「本聯盟招攬擁有寶貴能力既正義之士，一起用你寶貴而獨特既技能去保衛呢個世界。加入我哋之後會有一班專業團隊同資深既魔法師去訓練你哋，令你地學習到神秘既魔法，另外仲會有津貼去資助各位對抗邪惡。所有資金來源，都係來自熱心既捐款，我地並唔會收取我地成員任何會費。」


嘩！呢個咩世界黎㗎？騙徒癲佬專向我呢啲咁正直既人埋手，仲邊有天理？世上邊有咁著數同咁無稽既事？我無再深究落去，直到落堂之後如常咁衝出課室去搭地鐵返屋企。我一出課室門口無幾步，突然又有一個陌生男人走埋黎同我講：


「你係咪受到邀請？」


我當堂嚇一跳，再望一望眼前既男人先發現佢唔係我同班同學。佢見我無反應，於是再重覆問多次，我聽完之後都係一頭霧水。於是問佢到底係咪認錯人。


「唔係，係唔係有人叫你掃過個QR code？」


我一陣愕然，心諗點解佢會知道既？佢望住我一副大惑不解既模樣就同我講：


「睇黎你都係未睇清楚個內容，你最好都係今晚快啲去睇睇，最遲好聽日覆啦，你如果仲有咩問題既 ，黎緊放學之後再問我啦，我叫阿Ken，拜拜！」


唔通我比人跟？無理由㗎？我又窮又唔係咩名人，信用卡都仲係用緊大學時申果張，花咁多人力物力係我度都無回報，諗極都唔明，點知係當晚就出事喇…

<覺醒：一>


我仲非常清楚記得當晚瞓著之後，成晚不斷發夢，夢見五顏六色七彩繽紛既畫面，迷幻非常，我係夢中都覺得好暈好辛苦。想大叫又叫唔出，想闔埋對眼又闔唔到，好似經典電影《發條橙》中被迫睇片果幕咁辛苦，直頭暈到想大嘔特嘔。


就係我快頂唔順暈咁滯既時候，突然眼前全個世界被強烈既白光包圍，再全部集中射向我身上，之後我就醒咗，仲係十二月既冬天夜晚出咗一身冷汗。望一望個鐘，果時先係朝早五點，不過我已經全無睡意。而接下來既一日，奇怪既事情終於展開…


第二朝返工，一路上居然見到好少部分人既身上發出唔同顏色既光，或者係氣場，就好似龍珠入面變超西咁上下：紅色綠色藍色黃色白色都有。再細心留意下就發現只有係男性既身上先見到，同埋佢地起碼睇落過二十歲既。 我當時一直覺得到底係咪對眼出現問題，仲諗緊收工嘅時候洗唔洗去睇下醫生，不過返到公司之後我就再無見到任何顏色出現。


食晏既時候我突然諗返起果個阿Ken講既說話，於是乎一個人食完飯就趕返公司開返個網站去睇下有無咩線索。果然係網站首頁既底部度發現仲有幾個分頁可以揀，其中一頁就係注意事項，禁入去睇果時佢係咁寫：


一. 係受到邀請後你既潛能將會受到啟發，按照各人資質及能力等因素影響，會於48小時內出現不同的醒覺症狀，此乃正常情況，切勿驚慌。


二. 請於受到邀請的四十八小時內聯絡我們協會的成員 ，我們會提供協助。你可以透過直接接觸我們的成員，或參考聯繫方式那一頁內的聯絡方法。


三. 就算你拒絕加入我們，已覺醒的能力並不會無故消失，而我們亦不會提供解決方法，特此致歉。


睇完僅有既三項，就覺得個協會好有問題，根本就係強迫你去加入。只要唔順佢地意思就會對你撤手不管。為咗解開我既疑慮，我禁入去睇具體聯繫方式，點知嗰果度只有一個gmail 郵箱。最後我決定係今晚放學時再睇下仲撞唔撞到果個呀Ken，到時我再向佢問個明白。


捱到收工我又開始搭地鐵返學，果然係離開公司之後我又開始見到啲身上發光既男人出現。 係我入閘既時候我留意到一個頭上無顏色既男人用奇異既目光打量完我之後，佢就開始跟住我入閘。我當時覺得好奇怪，點解無啦啦有咁多男人 會對我有興趣，到底有咩詐騙集團可以做到咁高科技可以令人睇到咁強烈嘅幻覺。

當我行咗入車廂見住個男人準備衝埋入黎嘅時候，有一個身上發出黃色光既男人擋咗係佢面前，舉起左手撥一撥頭髮，之後跟住我果個男人就停咗步，用不甘心既眼神目送住我既離去。係呢一刻我確信成件事並不尋常，混亂既思緒令到我唔能夠集中精神上堂。


落堂既時候我立即沖出課室，希望係放學嘅人潮中搵到阿Ken，盡快搞清楚件事。果然我一出課室就見到阿Ken係遠處企咗係度，好似等緊我既出現咁。我急步行過去，佢已經先我一步開口講：


「你宜家一定有好多問題想問，不過唔好咁心急，跟我搵個地方坐低先慢慢去解答你既問題。」


我迫於無奈咁應承佢。之後佢帶左我去最近既M記度坐低，跟手自己行去買咗杯咖啡之後就坐係我對面問我：


「你而家係咪見到附近有啲人同我個身上發出唔同顏色既光？計埋我總共有幾多個？同埋我發出既光係咩顏色？」


我望一望就發現係M記裡面，除左發出藍光嘅佢之外，仲有兩個人頭上分別有黃光同埋紅光。我答完之後佢點一點頭，露出一個滿意既笑容。之後再同我講：


「我可以確實咁話俾你知你仲係一個處男。」

<覺醒：二>


我聽完之後立即菊花一緊，唔通佢既目標真係爆我菊？但我個菊花仲係緊緊的好好的完整的，點可以俾個男人率先破佢處？佢見我一臉驚慌，居然仲可以淫笑住對我講：


「你放心，我地對你無任何不軌企圖。但你有無聽過咩係童貞魔法師？」


「佢到底講乜野？」我心諗，但我無直接講，只係搖搖頭表示不知道。


佢一面匪夷所思咁望住我，之後拎部電話出黎篤幾下，再開咗張圖比我睇：



我睇完第一時間諗：


「你唔係認真呀？邊有人會相信啲咁無稽嘅事？」


佢見到我嘅反應就知道我唔信。


「但係你解唔解釋到而家你點解會睇到啲咁奇怪嘅野？其實每一個男人只要係大約二十歲開始左右仲保有佢嘅童貞，體內就會開始醞釀出一股不可思議嘅能量，呢股能量會隨著年紀然增長，當增長到某一個程度嘅時候就會自然咁發出魔法既光芒。」


「有無咁神呀？」


「之後就會好似你咁，比我地組織既資深魔法師發掘。就正如而家你睇到人地身上發出既光咁，呢股力量係魔法師之間係可見既。就係你受到我哋邀請果一剎那，負責邀請你果位魔法師已經係你身體入面埋下咗種子，種子會隨住你潛在嘅力量而幫你引發出體內既潛能，而証據就係你可以睇到其他魔法師既能量。」


「咁你即係話我而家睇到身上發光既人，全部都係青頭？」


「無錯，你係，我都係。而每一種顏色代表咗佢地魔力來源既種類。」


就係講到呢個時候佢突然間停咗落黎，雙眼望住門口嘅既方向之後再同我講：


「你果然係非常特別，咁快就已經引黎敵人既關注，呢次就等我黎示範一下同敵人既戰鬥方式，留心睇住。」


講完之後佢就起身向門口既方向行過去，同時間門口果邊有個六呎高成個ABC咁款既型男行緊入黎。阿Ken橫放佢既左手係胸前，之後佢兩個就企咗係度互相對峙。就係一瞬間我見到阿Ken身上既藍光增強咗好多同仲閃咗幾下，之後個ABC好似企唔穩咁，伸手扶一扶旁邊張枱，之後用不忿既目光望一望我就轉身離去，成件事既過程只不過係數秒之間。


阿Ken一臉從容咁坐返我對面後又開始講解：

「呢個係我地同敵人之間的戰鬥，你都係快啲加入我地接受訓練，如果唔係你將會好麻煩。你要盡快學識保護自己，因為已經被激發出潛能既你會不斷比人追擊。而係我見過咁多個新人當中，同一日俾人狙擊兩次既就只有你一個。」


咩追擊，咩危險咩戰鬥，我都完全唔明，亦都唔清楚佢哋到底做咗啲乜野。但係我都想知：


「如果我畀人狙擊成功，到底會有咩後果？」


阿Ken沉默咗一陣之後嘆咗口氣：


「我勸你都係盡快加入我地先，我地慢慢會將所有野話俾你知。我留低我電話號碼比你，你一有決定就whatsapp我啦。同埋你無咩事都係快啲返屋企，萬一係無我地保護你既情況下比人狙擊成功就一齊都白費晒，到時我地都再幫你唔到。」


講完之後佢就起身走咗去，留低我一個茫然咁坐係度。就係呢個時候我老死阿賤whatsapp我：


「喂死仔你係邊度呀！得閒傾兩句嘛？」


但係我今日真係已經好攰，於是覆佢話呢幾日唔得閒遲啲搵你之類，佢又覆我ok就再無聲氣。


當晚一路返到屋企都相安無事，亦再無奇怪既人搵我。我加咗阿Ken個電話落聯絡人到，但無打算搵佢。我極力咁係個腦入面整理成件事，唔通一切都係真嘅？我好無聊咁google下「童貞魔法師」，網上既資訊一般都係講廿十五歲都仲係處男既話會學識魔法，但詳細嘅嘢就完全無提到。


魔法，哈利波特咩？無聊。諗下諗下我就瞓著咗。

<覺醒：三>


第二日如常起身返工，一路上對於見到身上發光既人已經見怪不怪，只不過間中會有一兩個人對我投以殷切嘅目光，令我渾身不自在。


當日到放學都風平浪靜，點知出到學校之後突然覺得比人跟蹤咁。我一邊留意住一邊扮無野咁行落地鐵站，而對方亦步亦趨咁跟落黎。我決定要睇清楚到底係咩人跟住我，於是係入閘之後立刻轉身一望，有個都敏俊咁外形同打扮嘅男人準備跟埋入閘。


我地兩個四目相投，一瞬間空氣好似凝固咗咁，但對方剎那間神色一變，掏出八達通馬上拍卡。


「嘟！」熟悉的八達通拍卡聲效。


「咔噠！」過入閘機的機械聲。


但，他人還是在閘外面。


回神時才發覺原來是阿Ken用手推了入閘機一下所以導致對方入不了閘。他隨即示意我快走，臉上沒有昨晚M記時的從容，神色緊繃地轉身，繼而左手橫放胸前。他又要代我去“戰鬥”了，而這一次本能在驅使我儘快離開現場，不容我再次觀戰。


我飛快步下扶手電梯，繼而衝上準備開出的列車。平常沒做運動的我因為緊張加上跑了一小段路而喘氣。突然又有人拍了我後背一下，我猛地轉身一看，才發現原來是我班上的一位女同學。


「你沒事吧？看你臉色不太好，是不是不舒服？」


一口標準的普通話，她，是大陸來的學生，名字我也沒印象。


「沒事，沒事。」我用一口港式普通話回應她。


「我是艾薇，你叫我Amy便可以。我見你平常上課非常用心，成績也很好，有機會時要向你請教請教一下啊，Wing同學！」她說完便伸出了手示意要跟我握手！


同女性握手！這個沖擊實在太大了！更何況艾薇她在黑色大褸下居然是低胸的襯衫，貼身牛仔短褲配搭長靴，雖然不及絕對領域但已經非常殺食。加上她一副林夏薇般的外貌，我差點站不住腳。


「不敢當！不敢當！」我邊笑著邊跟她握手，我個樣係佢心目中一定係好似傻仔咁。


最後當晚我裝咗微信，佢成為咗我微信入面第一個有聊天記錄既人。


直到佢到站落車同我講拜拜之後，我先發現我上錯方向，下一個站又要過對面再搭返轉頭返屋企。無聊之際我係咁睇艾薇係朋友圈入面既相，佢真係好靚…


咦！咪住！咁阿Ken呢？話晒岩岩佢都幫咗我頂一野，點都要關心下佢好。


「Hey！你點呀？」


雙剔後無反應，唔係出事呀？我好唔好返去搵佢睇睇呢？諗諗下都係唔好，根據經驗所謂既戰鬥都係幾秒間既事﹐而且尋晚見到果個ABC男輸咗之後都行得走得，咁應該唔會有咩事既，我都係快啲返屋企算。

返到屋企沖完涼又準備溫下書先瞓，點知拎起部電話就見到阿Ken覆咗我whatsapp：


「無事，不過聽日我保護唔到你喇。聽晚會有另外兩位成員去接你放學，你都係快加入我地啦，詳情果兩位成員會同你交代架喇。」


嘩！正所謂有強姦，無焗賭，咁就想我無啦啦加入？


但係，唔加入﹐我又擔心自己人身安全… 都係聽日睇下情況點先再算…


又到星期五﹐公司成班同事都無心機做野，個個都借機會將啲繁重既工作推比我，一邊笑笑口咁同我話：


「你真係好人既啫﹐咁肯幫人，一定會搵到好女仔做女朋友架！」係營業部既Lawrence。


「係囉，阿Wing咁得我地心，一睇就知好係好人黎啦！」老闆個秘書Sharon。


「好人咪要收好人卡？」同係會計部既Sunny。


佢地你一言我一語咁奚落我，見我無咩反應之後後開始傾收工去邊玩，星期六日陪男/女朋友去邊食野之類，我反倒樂得清閒。


六點一到所有同事都打咭收工走人，我照慣例十五分鐘後都熄燈鎖門趕返學，點知鎖完門起身一下見頭暈，心諗我少做運動啫﹐無理由咁虧架？點知落到樓下行出去搭車時，我發覺自己睇到多一樣野，而呢一樣野令我從心底感到唔舒服，甚至害怕。


睇黎我都要認真考慮阿Ken既建議喇…

<毒氣雙子>


我一出大廈就感到一陣心悸﹐之後不自覺咁循著發出令我不安氣息既對面街角一望，係人來人往既路上我見到一縷黑煙由地上持續升起。我再細心一睇，好似係由個男人身上散發出黎，而且好似只我留意到。


重點係，佢都發現咗我既存在，仲好似行緊過黎。


大驚之下我衝入去最近地鐵站入口走人，因為我發覺隨住果個男人既接近，我開始越加頭痛同嘔心，感覺就好似哈利波特中催狂魔接近時一樣。


我急急咁迫咗上返學校方向既地鐵，同時急不及待咁whatsapp阿Ken同佢講我既情況，希望佢幫唔到我都可以解釋一下狀況。無耐我就收到佢既回應：


「你能力已經發展到去第二階段，可以睇到一直同我地戰鬥既黑魔法師身上發出既氣息。記住遑離遠見到就要避開佢地，你一日未學識戰鬥都只會任人宰割。返到學校你就會平安，詳情由另外兩位成員同你解釋，Good luck！」


屌！咁即係點！我覺得又不安又無助，明明尋日都仲覺得應該無咩事，但係一見到「黑魔法師」既氣息全身既細胞都話緊比我知有危險，唔通我之前見過既韓男同ABC男都係咁既樣？同佢地既戰鬥比我想像中激烈？媽呀！點解我仲係A0！如果我一早破咗處就唔會搞到今時今日咁啦！


又好好彩咁比我平安返到學校，一路上離遠見到一、兩個黑魔法師我都運路行避過咗。由於衝擊太大既關係搞到我返到課室時都呆呆滯滯，直到電話一震時我先回魂。


我一睇，原來係艾薇既微信：


「Wing同學，你還好吧？看你神不守舍的樣子，不是生病了吧？學習重要，但身子要緊啊！」


「我無事，多謝關心！」我飛快地回道，同時向後一望，望到坐在後排座位的艾薇，點頭示意感激，嘻！


直到放休息時我先有時間去便利店買個麵包當晚餐，點知係我排隊比錢既時候﹐先係頭一痛，之後居然見到一個黑魔法師行咗入黎！


果個黑魔法師170左右高﹐戴住黑框眼鏡斯斯文文咁。佢望一望我之後就若無其事咁去雪櫃揀野飲。


點算好？唔通佢一早發現我仲跟住黎？佢想點？想係我買完野返課室時偷襲？唔得！我唔可以比佢得逞！於是我一用八達通比完錢後望一望確定佢仲排緊隊時，馬上9秒9咁衝返課室，之後我一路咬住個包一邊望實門口﹐生怕佢跟埋入黎搵我。


無耐之後又夠鐘上堂，我先至可以鬆一口氣。


幾經辛苦捱到放學，我仲諗緊點先見到果兩位成員。始終我知道咗學校入面都有黑魔法師既存在，就唔可以放心四圍單獨走動。就係我煩惱緊既時候，我隱約見到門口有道微弱既黃光。


他們在門口等我。

我拿起背囊走出課室，就見到兩位分別散發著紅光同白光既一高一矮一肥一瘦組合出現，他們的外表同打扮，呃…


我心入面同佢地改咗個外號叫毒氣雙子…


矮的自稱Leon，細長眼及咀加一頭油膩的頭髮，一瞼青蛙相，身上發出黃光。





高的自稱Aaron，一副睡眼惺忪的道友相及身形，髮型是不知哪個年代的MK長髮，身上發出白光。





Aaron一把搭著我的膊頭說：


「嗱阿翼，阿Ken講晒你既情況比我地知喇﹐以後就由我同Leon黎教你基本戰鬥技巧同我地魔法界既規矩啦！」


「我係理論派，等我email份基本注事項既pdf比你旁身先啦！」Leon得意地道。


好死唔好死艾薇同佢班朋友係呢個時候走出課室﹐佢見到我同佢毒氣雙子密密斟時露出古怪既神色，之後佢都係行埋兩步問：


「Wing同學，他們是你的朋友嘛？」


「不是不是，是來打聽關於我們科的資料。」


「是啊！你好捧啊！那麼我先走了，拜拜！」


「拜拜！」我的意識隨著艾薇遠去而飄走。


「喂！」Aaron喝道。


「咩事啊？」我回個神來。


「望咩丫，這些機會不是你的。」Leon似笑非笑地說。


「咪就係。」Aaron嘲笑著。


「笑乜野，你地先係毒撚！」我心諗。


「好喇，宜家跟我去實戰一次。」Aaron忽然認真地說。


「乜話？」我驚叫道。


「我係實戰派，放心，我地會睇實你。」Aaron說完後Leon沉默不語，之後他們夾著我往校外走去。


金翅仆街鳥…

<魔法初體驗>


係比毒氣雙子夾住既情況下，我地一齊向學校外行出去。


Aaron一邊行一邊同我講解：


「嗱，到時發現目標我就會叫你過去單挑。你行到去佢面前兩三個身位左右，望住佢舉起左手橫放係胸前，就會發動到結界，到時佢就會被迫應戰。」


「就係咁簡單？」


「就係咁簡單。結界一形成你就自然會感覺到，就係除咗你兩個外全世界所慢晒落黎，慢到好似慢鏡咁。之後你專心諗住一樣野，就係攻擊。咁你身上晚魔力就會跟隨你既意志去攻擊對方。」


「吓？就咁諗住攻擊就得喇？唔使唸咒語之類？」


毒氣雙子突然爆笑，之後Leon拍住我膊頭話：


「咁大個人就唔好咁多幻想啦！咒語！哈哈哈！」講完之後佢繼續笑到標眼水。


「有咩好笑？又係你地話魔法呀結界咁，咁講咒語有咩問題？」


Aaron笑完之後話：


「你岩，你岩。不過其實魔法呢，就無漫畫呀電影呀入面咁複雜。只要你用個腦落指令就可以，係現階段無咩特別野可以教到你。」


「你點擔保我一定贏？」我開始擔心。


「放心，Aaron佢係長勝將軍，最近創咗8連勝既紀錄。」Leon突然認真。


「係，無錯。只要你跟足我指示做，就一定唔會輸！」Aaron邊講邊拍心口保證。


講下講下我地就行到一個商場，毒氣雙子四圍望下感應下咁款，無耐就幫我搵咗第一個對手。


Aaron揮手一指，就指住個企係對上一層黑魔法師。佢背靠住欄杆無發現到我地，於是Aaron帶我由另一邊電梯上去準備偷偷接近佢，而Leon就負責戒備有無其他黑魔法師係現場。


「趁佢玩緊電話等緊女唔為意，上呀！」Aaron邊說邊大力一推。


我差點失去重心，向前衝咗幾步之後岩岩好係果個黑魔法師三個身位前面停咗落黎。佢一臉錯愕咁望住我，而我亦手忙腳亂咁立正兼將左手橫放係胸前，就係果一剎那間神奇既事發生咗喇！


我見到由我身體中心發出一個半圓形既透明屏障，迅速向四周擴散。而係屏障穿過黑魔法師身體果一刻佢講咗一聲：


「弊！」


而我一望附近既人都好似定晒鏡咁喐都唔識喐。唔係，正確黎講係喐得好慢，慢到幾乎察覺唔到。我轉過頭黎見到個黑魔法師好似有所動作，似乎呢個世界只有我同佢保持係同一條時間線上咁。


為免吃虧，先下手為強，我一邊望實佢一邊諗住：


「攻擊！！！」


只見我身上發出既白光驟然增強，之後好似一股海浪咁既形態沖向個黑魔法師度。之後個黑魔法師咩動作同口形都無做，係佢面前就有道黑牆由地而起，抵擋住我既白色洪流。

「Aaron又話我贏梗既？咁宜家點呀？比佢擋住咗？」


我一邊心諗一邊回望毒氣雙子，發現佢地同其他人一樣，都處於慢動作世界。


「屌！死就死啦！攻擊呀！！！」


我將雙手食指同中指分別指向兩邊太陽穴，就好似電影人啲人用超能力果時咁。


果然係我一念之下，更強大既白色洪流轉瞬間就將黑魔法師幅牆沖擊得粉碎，再席捲佢全身，之後洪流更化成一道沖天水龍捲般包圍住佢，而黑魔法師身上發出既不祥氣息被一點一滴咁洗刷走，伴隨住水龍捲穿過天花直沖天際而消失。


隨著異像消失，身邊既時間流動亦馬上回復正常。Aaron一拍我背脊話：


「我都話你贏梗架啦！」


我無理到佢，只係望住眼前既黑魔法師。佢好似之前見過既ABC男咁突然腳軟企唔穩，佢一扶後面欄杆企返好之後就怒啤我地。


明明佢個樣都係斯斯文文既廿五、六歲西裝友一個，梳個比比鳥頭幾型仔咁（雖然得可能無鳩柏豪咁高，得170左右），點解會成為黑魔法師？


無耐見到佢個披住Burberry米色乾濕褸既女朋友出黎拉佢入去比錢，佢先擺出一款勝利者既表情昂首闊步咁行入既舖度，從我地眼前消失。


「雞！全部都係雞！」Leon一臉鄙夷既神色。


「咪就係，條女貪你啲錢咋！戇鳩仔！」Aaron咬牙切齒道。


「死啦，乜佢地心靈咁扭曲架…」我心中暗驚。


之後佢地陪我一齊去塔地鐵，沿路上我都有好多問題想問，但又唔想比兩條毒撚笑。係呢個時候Leon拎咗佢部電話出黎問我有無用Telegram，我話有，之後佢問我個username係乜，話加我入群，我瞄到佢個鎖機畫面：係初音半身圖。


媽~ 好毒呀！

<黑魔法師的挑戰>


睇住Aaron加完我入群後，先知道所謂既群只有毒氣雙子同我三個人。


「咦？得我地三個？唔係會有個群係比成員入既咩？」我忍唔住問。


「你肯正式加入我地嗱？」Aaron又一邊拍著我背脊一邊問。


「宜家想唔信都唔得啦，同埋一有黑魔法師接近時我都會好唔舒服，又唔知比佢地打贏我會點…」


「唔使驚喎，你岩岩接近果條友都無事啦。你之前會因為班黑魔法師接近而感到唔舒服係正常既，宜家唔會架喇。」說完Aaron大大力地拍了我背脊一下。


「你已經捱過咗覺醒期，由魔法種子打入你體內開始，先係睇到我地魔法力量，跟住到睇到黑魔法力量，之後到基本魔法迴路係你體內生成，就會對黑魔法有基本抗性，唔會受到佢地威壓影響。」Leon一邊㩒電話一邊補充。


「嗱，終之一開始就由我地兩個睇住你，到你可以有獨立既能力之後就正式帶你去香港分部入會，到時你就可以享有一切福利架喇！你呢排無咩事都係唔好出街，出街都最好同我地報告下行蹤﹐方便我地事旦一個去睇住你。萬一有急事要單獨外出，你離遠見到黑魔法師就好避開佢地，直到我確定你識分邊啲對手你一定嬴，同邊啲對手你一定輸。」Aaron一面得戚咁講。


嘩！咁咪無晒人身自由？而且我都唔想同佢地兩個或事旦一個出雙入對呀！


最後佢地係我上咗返屋企既地鐵後就閃人，我就打開電話睇下Leon電郵比我既基本事項：


一．請保持處子之身

二．每日戰鬥次數只限一次，戰鬥後對方亦不能對你作出挑戰

三．戰鬥次數每晚十二點後歸零，如夜間外出請格外留意

四．魔力回復速度按各人體質及生活方式影響而有所不同，完全回復一般最少要廿四小時

五．請儘量避免手淫

六．主動向對方作出挑戰後不可取消，結界一旦形成後請最起碼進行防禦

七．受到對方作出有效挑戰後不可避免戰鬥﹐結界一旦形成後請最起碼進行防禦

八．請不要向他人透露有關魔法事宜

九．入門者請遵從指導者教導直至有獨立戰鬥能力

十．在以下場所內雙方皆不能發起挑戰：一切公共交通公具上﹑一切公共設施﹑學校（宿舍範圍例外﹚，墳場及一切宗教設施範圍內

十一．在以下情況雙方皆不能發起挑戰：其中一方的工作時間內﹑駕駛中﹑喜慶或葬禮等場合

十二．如離開香港後請勿對任何人發起挑戰


睇完之後我就明白毒氣雙子點解係學校入面咁大模施樣咁四圍行，原來學校係安全埸所之一，咁我聽日返學校自修室都無問題啦？

為咗唔想見到佢地，於是我決定唔通知佢地，自己一個返學溫書同做功課算，因為仲有一個月左右就要考試。


於是第二日我食完晏後就出門返學，沿路上我都留意住有無黑魔法師既蹤影，由於我平日唔係搭火車就係搭地鐵巴士﹐所以一上咗車我就可以安心落黎。最後無驚無險我就過咗個星期六，毒氣雙子問我去咗邊我都話係屋企無出街算。而之後星期日我都打算照辦煮碗，費事比同學見到毒氣雙子跟出跟入咁尷尬。


點知學司徒師傅話齋：會出事架嘛！





果日我如常咁返到學校，直到係自修室走時都無異樣﹐直到我出咗學校忽然想食M記，咪走去附近商場間M記囉。咁我一路上都有留意住情況，確定無危險先入去排隊。


就係我捧住份豬柳強餐四圍搵位既時候﹐突然見到一個黑魔法師行過黎我度，佢同我一樣都係170左右度﹐但人地一副幼框眼鏡文青打扮加埋黑色大褸成個哈利波特咁款，。我果時左手捧餐右手電話，又無可能掉低份餐走咗去咁樣衰。


就係我猶豫不決時佢已經走到我三步範圍內，只見佢舉起右手橫放胸前，轉眼間全世界都慢咗落黎，得返我同佢互相對視。


唉，大檸樂﹐唯有靠自己。

<險勝>


之前唔記得講，係結界形成之前，明明現實中雙方只係有兩三個身位距離，但係結果形成之後，雙手居然硬生生咁感覺有成最少五、六米距離。所以先有足夠時間同距離去作出反應。


本著敵不動我不動既精神，我靜待著對方會有咩動靜。


唔知過咗幾秒，只見對方咀角上揚，之後他身後燃起黑色的火焰，再從他兩旁向我直飛而來。


「防禦！」我並無忘記基本守則，心念一動，馬上在我方圓一米內從地面卷出一道白色水龍捲把我團團圍住，把對方放射過來的黑炎全部防住並一起直沖天際。


可笑既係此時此刻我仍然一手捧餐，一手拎住部電話，係個畫面中十分突兀，一啲都唔型…


透過水龍捲我依稀見對方個表情有啲奇怪，但係佢無放棄，反而加緊進攻。第三道黑焰從背後越過他頭頂一起攻過來，一撞到水龍捲時我感覺到它搖晃了一下。


不是撐不住吧？


不管了，我專心想著防禦，希望可以消耗到對方放棄攻擊為止。因為憑著第二次的攻防經驗，我感覺到使用魔法是有代價的，舉例來說，就像遊戲中要出魔法係會消耗魔力（MP）一樣。


換句話說要分出勝負，一係攻方成功攻破守方防禦，一係守方耗盡攻方魔力。


果然過多一陣，對方突然停止攻擊，我亦馬上解除防禦。睇黎係勝負已分？


咦？點解結界仲未解除？唔通戰鬥仲未完結？


睇怕係喇，對方突然舉起右手向天一指，之後緩緩吐出：


「轟雷。」


我馬上感到全身發麻，本能告訴我抬頭一望，弊！居然是落雷？幸好我馬上想著防禦，這次一個圓拱形的透明天幕在我頭上出現，接下了一道又一道的黑色天雷。


在結界內雷聲不絕於耳，但結界外的人仍舊保持著接近滯止的表情，彷彿身處另一個空間一樣。


天雷轟在天幕後消散之時仍然伴隨著霹靂叭啦的聲音，而且我開始感到魔力快要耗盡。難道？我咁快就要退場？


唉，又未嘗唔係一件壞事既，以後唔使對住毒氣雙子佢地。未幾我頭上的天幕開始出現裂痕，而我亦閉目準備好按受五雷轟頂…


突然間世界靜晒，再聽唔到任何雷聲，再下一秒我就再次聽到人聲鼎沸，張開眼先發現結界已經解除，而我後面都有對情侶對我講：


「個位你係咪坐架？」個女人一面厭惡咁同我講。


「哦，你地坐先啦…」我不自覺咁作出退讓。


我望一望個黑魔法師，先發現佢坐底咗係度抖緊。乜原來岩岩係我贏咗？係佢魔力見底先？


我暗自慶幸今次咁好彩，之後拿拿聲搵個離遠現場既位坐底食野，同時間通知毒氣雙子發生咩事。

Leon：「十二點前你好快返屋企！否則一過十二點對方馬上派人狙擊你就肯定輸梗！」


Aaron：「好彩對方都仲係停留係“形變”既程度，如果係已經掌握“質變”既對手你已經輸咗喇。」


Leon：「今次算你好彩，唔知點解對方儲存魔力唔夠你多，你都係乖乖聽我地講，如果唔係輸一次有排你受。」


我：「到底輸咗會點？」


Aaron：「見你都經歷咗兩次戰鬥，我地破例早啲同你講，聽日你放咗學之後我地見面再傾。」


睇怕今晚都唔會有結果，都係乖乖地等聽日再作打算，陣間都係快返屋企以策萬全。而且就快又要考試，我都唔想有咩意外。


第二日放學後毒氣雙子聽我講係校門等我，因為我唔想比其他同學見到我同佢地一齊，影響形象。


「兩連勝喎，叻仔！」Aaron再次大力拍我背脊。


「估唔到你有啲料到，唔怪之得組織派兩個人黎幫你啦。」Leon邊講邊陰陰咀笑。


之後佢地都係帶我去咗M記，跟住搵咗個角落位黎坐。


「我去買野食，Aaron你同佢講解下啦。」Leon講完就問我地食咩，跟手就走去排隊。


「你最擔心輸咗會發生咩事呢？」Aaron認真咁問。


「梗係，係咪輸咗就順便會脫離埋組織？」


「你就想，脫離組織只有一個途徑…」Aaron咬牙切齒咁講。

<哈利波特的秘密>




「即係點？」我明知故問。


「破處呀屌！」Aaron激動起來。


「細聲啲啦，嚇親人喇！」我邊講邊望四周有無人望過黎。


Aaron聽我咁講都即時低頭冷靜落黎，佢左望右望確定無人望過黎先抬頭同我繼續講：


「講返正題，要講輸咗會點，首先要解釋下魔力既來源係點黎。其實所謂既魔力，簡單黎講就係男人多餘既精力。所以基本守則叫大家唔好打j，就係因為打完j之後魔力會大幅下降。」


「精力？唔嗱係呀？你唔好講笑啦？」我感到非常震驚，但都忍住咗細細聲咁講。


「唉，你唔發覺無女性魔法師既咩？同埋呢樣野又唔係我決定既。咁輸咗之後會點呢？就係輸家會被對方奪去係戰鬥期間所消耗既魔力。」


唔怪之得次次見人輸都腳軟咁款啦，原來係剎那間就無咗咁多精力。


「咁後果都唔係好嚴重啫？無咗又會回復返既。第二日起身咪又係一條好漢？」我神情輕鬆咁講。


「你錯喇，說算你體質過人，第二日都係回復返八、九成。之後黑魔法師會認住會連續咁追擊你，日復一日咁當你係提款機咁用。如果無人幫你擋到，到某個程度之後身體入面個魔法迴路會被破壞，之後…之後仲好大機會變成性無能…」Aaron講完都滴晒汗咁，睇黎佢都好驚。


我陷入沉思模式，開始認真思考以後點應對以後既生活…


「咁可以點？成世都要戰戰兢兢咁生活？破咗處咪可以脫離呢種生活囉！」我突然醒悟。


「談何容易呢阿哥…」Aaron一臉唏噓。





我倆一時之間相對無言，直到Leon買完野食返黎先打破沉默。


「點呀阿Wing，宜家知道團隊合作既重要性未？」Leon一邊咬住杯可樂既飲管一邊講野，非常之MK…


「明白晒啦！一日未破處一日都要互相幫忙嘛！」我無聲無氣咁應Leon。


「又唔使咁頹既，生命滿希望嘛！你財下班黑…」Leon講講下突然間停咗落黎，我一望原來係Aaron對佢打咗眼色。


「喂，有野講清楚佢好喎！」我呢次無扮唔知，直覺話我知Leon本來要講既野事關重大。

但見佢兩個臉色一沉，經過一輪你睇望我眼之後卒之由Leon再度開口：


「無，呢啲野到你正式加入時會有人同你解釋。作為代替，我地就破例講多一樣野你知啦。其實全世界都有魔法師，而且歷史悠久，所以先發展到今日咁多規矩之類。而且由於好多時由於啲權勢人物都係魔法師出身，加上魔法師之間既戰鬥有結界魔法保護，所以先可以一直保持秘密到宜家。」


「咁又點？大致上都估到啦，當見到基本守則時我已經大概知道。」


Aaron見我一副不置可否既臉口，忍唔住講咗件真係令我震驚既事：


「但你又知唔知，哈利波特係根據我地魔法師既歷史而寫？」


我一臉驚訝，但諗下又覺得有啲唔妥。


「唔無喎，佢地有女魔法師，又有掃把同好多道具之類，同我地完全唔同既！」


Aaron聽到之後一臉得戚，之後繼續講：


「嘖嘖嘖，你睇野太表面喇！唔係咩都照講出黎就可以出到咁好賣既系列。話說當年JK（哈利波特個作者）係1990年時，有日係曼城因為火車延誤所以係火車站戇鳩鳩生勾勾咁等咗幾個鐘火車啦。點知比佢遇到個飲醉酒既老人家，果個老人家其實係已經到達大賢者級別既魔法師。佢因為一時飲醉咗所以同JK講咗好多關於魔法師既事跡出黎，就係咁，校長個角色就係JK個腦中出現咗，之後就有咗哈利波特呢套小說面世喇！」


「嘩！你唔好牽強啲！明明JK話佢心見中第一個諗到既角色係哈利架嘛！」我不禁驚呼。


「傻仔，把口係佢度梗係任佢點講。你唔發覺鄧不利多同石內卜一樣﹐到死都係處男咩？JK對個世界觀作出最大既改動主要都係多咗女魔法師同種族，仲豐富咗魔法效果同埋道具。其它好似學生係小學時開始學魔法係暗喻返全部都係處，而小說中既決鬥都係一對一為主。你試諗下，寫本全男班仲要係廿歲以上既處男之間魔法戰既書，有撚人睇咩！」Aaron講完次後底頭飲佢既熱朱古力。


我聽完呢一番話後實在芧塞頓開，原來我地既存在對個世界有咁大影響。

<魔法石>


之後佢地無咗講落去，話一切都係我加入時會有更深入既了解。而目前最重要既係我學識保護自己，同避免同戰勝唔到既對手發生戰鬥。


我都唔想輸，因為返工返學已經她攰，再輸埋多餘精力我都唔知點溫書做功課同應付考試，所以我好畀心機聽佢地講解。


「嗱！黑魔法師既魔力強弱呢就好易睇得出既。首先就係睇佢地拖曳出黎既黑氣有幾長，跟住就係睇黑氣有幾濃密，最後就係睇佢外表，我指有無黑眼圈之類，有既話代表佢身體狀態比較差，會影響魔力既發揮。」Aaron一副專家既口吻。


「咁你要學既呢，就係要掌握到點去分邊種程度既對手你可以應付到，邊種程度既對手你會開始無把握甚至會輸。就以尋日做例子，尋日果個對手就係你可以應付既上限。如果你分得出邊啲人無佢咁勁就可以放心一個人出出入入喇。可惜我地尋日唔係度，如果我地見到佢就可以幫你指出平時見到既對家有邊個安全啦。」Leon搖頭嘆息。


「所以呢，你宜家需要既係係我地既陪同之下，不斷實戰，直到掌握到對手強弱為止。」Aaron又拍我背脊。


「儘量啦，我都無乜印象尋日果個黑魔法師既黑氣係點就開咗戰。」我無耐咁講。


就係咁，直到我三月考試前，佢兩個差唔多日日陪我放學，星期六﹑日都有事旦一個跟出跟入，終於係我考試前幾日大致可以自己掌握到黑魔法師既強弱，唔使再靠佢地既幫助。係考完試後，就係難得休息既復活節假喇。


但係佢地又點會比我抖丫…





果然係我考完試後，毒氣雙子就通知我話可以正式加入佢地，要帶我去做入會手續咁。唉，我唔想放假都對住佢地呀！


終於係復活節假期既其中一日，毒氣雙子約咗我係香港中央圖書館度等。傍晚六點零左右，我係附近某巴士站等緊佢地出現。


「阿翼，我地行喇！」Aaron拍住我膊頭講。


「去邊呀我地？」我側住頭問，想同佢保持距離。


「圖書館呀！」Leon一邊食住甜筒一邊答。


「喂！人地七點關門，宜家都六點半先入去算咩意思先？」我忍唔住問。


「行啦！陣間你咪知！」Aaron笑住咁講。


就係咁，我好無奈咁跟佢地入去圖書館，之後佢地帶我一直上到十樓，果時人地都清緊場叫人走。


「走啦，人地關門喇！」我不耐煩咁講。


但佢兩個無理我，仲帶咗我入研討室坐底。


「咯咯！」是敲門既聲音。

之後有位年約三十既職員行入黎，從佢身上發出既藍光就知道，佢都係我地既一份子。


「你好呀阿翼！我係香港區負責人之一，我叫Simon！」個職員邊講邊伸出手示意同我握手，同時間我留意到佢左手拎住個公文袋。


「Simon你好！」我同佢握手示好之後就睇佢地有咩想講。


只見Simon佢將個公文袋放咗係檯面，伴隨住一下低沉既響聲，就知道入面裝咗件重野。毒氣雙子佢地繼續坐係度唔出聲，好似大家一齊睇Simon表演咁。


Simon之後打開個公文袋，再係入面拎咗個木盒出黎，木盒上面印住金色既「HK」兩個字母。就係呢個時候毒氣雙子都企咗起身，仲伸出左右兩隻手，跟住連Simon都係咁，一剎那間就成咗一個三角形，接下來我就感覺到一股無形既波動由檯上面既木盒發出，之後感覺就好似平時同黑魔法師開始戰鬥時張開結界既感覺好似。


「我地宜家已經係結界入面，不過呢個唔係平時戰鬥用既結界，而係用黎隔絕魔法石魔力唔比人見到既結界。」Simon笑住講‧。


我望望檯上面個木盒，唔通佢講既魔法石就係入面？


「你打開個盒，之後用雙手將粒魔法石握係入面，再想像將少少魔力灌輸入去，跟手再打開雙手，入會儀式就算開始咗。」Simon指住個木盒同我講。


我好小心咁打開個木盒，之後見到一粒雞蛋咁大左右，好似石春咁款既黑色光滑石頭係入面。我慢慢咁拎佢出黎，除咗重甸甸既手感之外，仲有股金屬既冰冷。我將佢捧係掌心，之後合掌握實，再想像將魔力灌輸入去。


好快就見到自己身上既白光集中咗係兩隻手掌，而且感到粒魔法石好似有吸力咁，將我身上既魔力吸走。


「好喇，你可以打開雙手喇。」Simon提道。

我慢慢打開雙手，只見粒魔法石唔再係黑色一舊，而係發出同我身上一樣既白光。


「Aaron，睇黎你又多一個同伴喇。阿翼，你可以將魔法石收返埋入盒喇」Simon臉露微笑。


當我放返粒魔法石入盒之後，佢地就放底手，同時間我感覺到結界已經解除。


「岩岩到底係代表咩事？」我問。


「你都見到除咗黑魔法師之外，我地魔法師身上發出既光有分藍﹑白﹑紅﹑黃﹑綠啦？」Simon緩緩咁講。


「當魔法迴路岩岩形成果時，所有魔法師身上發出既光都係白色既。但經歷過幾次既戰鬥之後，再經過魔法石既引導，就會浮現出果個魔法師魔力既本質。而你既本質同Aaron一樣，都係罕有既白色。」


唔知點解係Simon講完之後，我打咗個冷震。

<危機>


Simon無理會我既感受，繼續長篇大論咁講埋落去：


「其實咩顏色好對現階段既你都唔多重要，因為宜家我地首先要同你講清楚兩件事。一就係會員福利，二就係單獨作戰時既技巧。」


「乜對戰時仲有其它要點既咩？點解咁耐以黎佢地都唔同我講？」我望一望毒氣雙子，之後又望返Simon。


「因為有佢地睇住，我地先放心唔講，呢個係一路流傳落黎既規定，直到正式加入先會再同成員講。入返正題，會員福利就係呢樣野。」


Simon係褲袋度拎咗張成人八達通出黎，之後遞比我，我接過時仲感受到佢既體溫。


我想嘔呀！





「呢張有自動增值既八達通係比成員坐任何公共交通工具時用，如果發現你用黎買野之類既消費時我地會取消個自動增值，以後都唔會再畀個張你。」Simon一臉認真咁講。


「咁好？返工放假幾時用都得？」我問道。


「係，幾時用都得。另外第二樣野，就係對戰時既秘技。當你一旦唔小心同比你強大既黑魔法師對戰，仲有一個方法可以提昇你既魔力，就係用魔法杖。」


吓？我當時心諗，唔通真係哈利波特咁，拎枝魔杖出黎就可以射底對手？點知就係下一秒我已經幻想破滅。


Simon佢企咗起身，跟住伸咗左手入佢褲袋，跟住係我面前用左手係褲入面手握青龍，繼而開始劣鳩。


「嘩！你係度做咩呀！」我嚇到彈起身兼倒後兩步。而毒氣雙子則繼續氣定神閒咁坐係度，好似咩都無發生過咁。


Simon佢笑咗笑之後就停咗落黎，跟住佢話：


「岩岩就係我所講既方法，係結界內一邊咁樣用你自己枝魔杖，一邊口唸你經常用黎鬧人既野就可以短時間提昇你既魔力。魔法既世界雖然無小說咁精彩，但係魔杖都仲有既，同埋魔法陣都係。岩岩我同佢地兩個就用咗個簡單既魔法陣去隔絕魔法石既魔力以防外洩。」


「吓？你認真架？」我額角滴汗。


「非常認真，我地都唔想你戰敗，由今日起，佢地唔會再跟住你。直到你累積更多經驗，我地會再召你黎教你更多知識同歷史，甚至派任務比你。放心，任務有酬勞。」


「咪住，我仲想問一個問題先，其實點解我地同黑魔法師戰鬥？」我突然間醒起，於是馬上問Simon。

「無論係我地定黑魔法師成功開啟結界，維持結界所消耗既魔力都係由兩個人去均分。而黑魔法師係贏咗之後，會吸收雙方所有係戰鬥中除用於結界外所消耗既魔力。換句話說，會變成佢地多餘既精力。但係我地贏咗之後，只會吸收返雙方用係結界上既魔力，但係黑魔法師就會咩都吸唔返。」Simon慢慢咁解釋。


好唔公平既設定，贏說贏少少，輸就輸得一乾二淨。


就因為係咁，搞到我宜家對住個韓系型男一邊劣鳩一邊好似撞邪咁講屌你、仆街。


點解我會咁大意會比佢伏擊到？因為我約咗個女仔係度等緊佢。如果唔係咁又點會比佢有機可乘。最可惡既係，當我見到佢張開結界前果一刻就知道我打唔嬴…


結界張開後我留意到一樣野，就係我約果個女仔已經係不遠處行緊黎，佢就係Sally。


專心應付番目前既情況先，只見個型男舉起右手懶型咁向我一指，佢身上既黑氣沖天而上，之後突然聚合成一把有如尖沙咀鐘樓般巨大既黑劍，之後劍身慢慢轉動直至劍尖指向我時﹐型男一聲：


「去！」


屌，御劍咩！咁中二病既！個心岩岩笑完佢，把黑劍便由他頭上向我直飛而來。


我心念一動，面前的空氣中出現無數冰晶﹐剎那間一道透著白光的巨大冰壁便形成，擋在我跟黑劍中間。


「啪！」


黑劍深深的剌進冰壁中，而冰壁亦出現了一道大大的裂痕，但總算止住了劍的去勢。眼見型男仔神色輕鬆，左手一併舉起，再度叫一聲：


「去！」


弊！黑劍馬上開始破冰而進，而冰壁的裂痕亦越來越大！我望望結界外遙遠Sally的目光，好像在望向這邊，又好像不是。但無論點都好，我都唔想係心儀既女性面前劣鳩呀！


就係我左思右想既時候，黑劍已經快突破冰壁，直指向我眉尖。


屌！死就死！我要保留精力同女女去街！而唔係畀你班黑魔法師去扑野架！


於是我馬上伸咗隻左手入褲袋…

<激戰>


無錯！正如大家一開始睇到咁，我好純熟咁係度劣鳩，同時間係度咒罵對面個黑魔法師。


隨著我劣鳩既速度加快，四週圍既出現多既微細既冰晶，並開始填滿緊大部分既空間。型男眼見異變即時臉色一沉，不過見黑劍的去勢未受阻礙，仍然保持不動。


就係下一秒，冰晶不旦填補了之前冰壁的裂痕，而且把冰壁補充得越來越大，甚至把整把黑劍困在其中，而黑劍則好像琥珀中的昆蟲一樣，再也沒有動靜。


哼！我仲唔嬴！我望望結界外既Sally一邊心諗：「等我，我好快就搞掂同你行街。」





點知我一回過頭望返個型男，就見到佢合埋雙手，之後大聲喝出：


「時之劍！」


之後之冰入面既黑劍劍身上突然現出無數細小既時鐘，之後全部快速咁游向護手位置，繼而合成一個巨大的時鐘。


「加速！」型男喝道。


佢一講完，原本時針同分針都指住十二點既指針開始轉動，並越來越快，就好似快進一樣，同時間黑劍開始在冰壁中緩慢前進，而我亦感受到魔力係度急速消耗緊。


點會咁架？加速？控制把劍既時間？唔通個型男就係佢地所講既到達「質變」境界既黑魔法師？唔得！我唔可以係度輸架！我仲有成日街要行，我仲要送人返屋企架！


但可以點做？係我焦急既同時把黑劍劍尖已經刺穿冰壁，以極緩慢既速度刺向我眉心。睇黎唔夠時間去耗盡對手魔力，只可以另想辦法。就係我快要認命之際，腦海中突然間浮現出四個字！


「絕對防禦！」


我大喝出黎，雖然比對方更中二病，但我實在諗唔到其它方法。


奇跡發生了！我大喝之後，整個空間除我之外都被瞬間出現的無數冰晶凍結咗，甚至連黑魔法師都係。


更犀利既係，黑劍護手上既大時鐘都停止運轉。呢個狀況維持多一陣，整個結界都瓦解消失，之後見到型男一臉錯愕既表情加企唔穩既身影。


邊個知道今日呢一戰，令我日後捲入一場同黑魔法師間既全面戰爭…


我無暇理會個黑魔法師，一心只掛住Sally，於是馬上抽返隻左手出黎，再向住佢個方向行過去。


「Hi Sally！」我好開心咁同佢打招呼。


「Hi Wing…」佢好似無咩精神咁。


「你見點呀？係咪有咩唔舒服呀？」我係度表現出我既關心，呢次仲唔加分？


「無…我呢排返工攰啫。」佢無精打采咁回應，睇黎佢真係好攰。


「知你返工辛苦，同你食返餐好既，陣間開心返啦！」我要同佢打氣！


「嗯。」佢點頭應完就無再出聲。

我陪住佢一齊行去我一個月前訂定位既日本餐廳，今晚我地食壽司呀！呢間壽司店非常出名，仲要係日本師傅打理，所以價錢都…


不過唔緊要，最緊要Sally開心！


Sally無出聲咁一路行，周不時望下附近啲舖頭，睇黎佢平日返工真係忙到無時間行街，唔知今晚食完飯佢會唔會同我行街呢？哈！


「阿Wing，訂咗七點鐘兩位。」係餐廳門口我一馬當先咁去拎位。


入座之後我地坐咗係吧檯位，今晚訂咗由師傅拍板既高級壽司套餐。


眼見師傅用純熟的技巧握出一碟又一碟精巧的壽司，Sally亦非常雀躍咁影相post上ig。當我一拎電話準備影底佢個可愛樣時，佢即時話：


「你想做咩呀？」


「無，我想幫你影底個開心樣啫。」我急忙回答。


「唔好啦，我今日個妝化得唔好呀。」佢答完我之後，佢就拎起碟壽司自拍。


乜唔係個妝化得唔好既咩？算啦，佢點話點好，最緊要佢開心，係咪？


我望一望個日本壽司師傅，再望一望兩旁客人既眼神，都彷彿問緊我地：


「影撚夠相未呀？」


超！浪漫同開心既野，你地識條鐵咩！


但點講都好，間壽司舖既水準真係一流：大拖羅肥美甘甜入口即化﹑海膽鮮甜飽滿，連考究功夫的玉子壽司及一眾貝類壽司都非常出色。


「おいしい！」我忍不住同師傅講。


「ありがとう！」師傅笑住同我講。


「個師傅做乜同你講多謝呀？」Sally一邊飲荼一邊問。


「無，我讚佢啲野好食啫。」我講完心諗，唔知佢會唔會覺得我識日文好型呢？雖然都係睇日本動畫學得果幾句。


「吓？係咩？我覺得一般般啫。」Sally淡淡然咁回應。


一般？唔通Sally佢食過更好既？係日本食既？到底幾時？我係佢facebook同ig都無見過既？佢同邊個去食呢？


「呃…唔好意思呀，我仲專登帶你黎。到底點一般法，等我下次注意下。」我細細聲咁問，好怕畀壽司師傅佢地聽到。


「無，咪同元氣果啲差唔多！」Sally無降底聲量，兩旁既客人一聽到爭啲連口中舊壽司都噴埋出黎…