高松四日三夜玩左八百幾公里痴左線遊記（自駕）

第一次打遊記，因為今次旅行實在太激太難忘，晚晚玩到天光咁滯所以想記念下分享下

《事前準備》

因為同3個fd去只夾得四日假而快運咁啱高松有平又啱時間所以就揀左高松，雖然唔知有咩玩

買完之後發現原來高松同四國係以風景同慢活為主，啲野又早收，就諗住不如揸車去遠啲，去埋神戶同大阪，反正4個人入去有3個都揸得，就造就了今次瘋狂之旅。

經過一番搜尋協商之後，最後得出以下行程

Day 1: 落機-拎車-金刀比羅宮-德島youme mall-德島麵王-住淡路島bnb

Day 2: 鳴門漩渦-神戶鐵人廿八公園-睇神戶勝利船-大阪食宵夜-淡路島bnb

Day 3: 祖谷蔓橋-小便小僧-大步危峽-高松機場酒店check in-高松市區-高松機場酒店

Day 4: 食烏冬-還車-番香港

《第一日》
搭9點機，7點搭機場快線，在香港站順手check in。4個人搭有優惠每人70蚊


Delay左大半個鐘，去到高松機場已經兩點鐘喇，跟手就去拎車出發去金刀比羅宮，俾日本人形容為一生人要去一次的神舍


今次靠晒呢架vitz

四點左右去到金刀比羅山下停車場，沿路有條表參道，兩邊有好多唔同嘅鋪頭，行完表參道之後就要上山喇


又凍又餓整串燒丸子真係不得了


呢張表參道相上網搵的因為無影到

由停車場去到本宮有700幾級，雖然沿路都有其他嘢睇但700幾級真係好累


回頭望下都好靚，包括日本妹


唔知係咪叫你笑住行無咁辛苦


金刀比羅狗 相傳係話以前日本人怕辛苦會派隻狗幫手


上到去 個景仲靚過個宮 香港唔知幾耐無見過
真係好靚，上到去睇左陣行左陣買埋御守就落山喇

LM

高松市區有咩景點
day3住祖谷個邊既溫泉旅館就正

高松市區有咩景點
day3住祖谷個邊既溫泉旅館就正

本身有諗過但第四日要十二點半還車 祖谷揸番過去都兩個鐘 以我地起唔到身嘅性格一定趕唔切

所以突登揀左間近機場同還車嘅酒店以防萬一

至於高松有咩玩就可以繼續睇埋落去呀

《繼續第一日》

落山之後都5點幾 自從香港機場7點幾食左個水手早餐之後就係上出前果幾串小丸子 已經餓到仆街 拿拿臨出發去綾川食迴轉壽司 貪佢又順路又平


我每次去日本都會搵呢間食 又平又好味停車場又大


普通好似係90-100yen一碟兩件 貴價野就一件咁
港紙8蚊食到一件長腳蟹/海膽/蟹膏 抵撚到不得了

食7咁食之後出發去德島市 德島市最出名係拉麵 眉山同阿波舞 但由於我地入到去都天黑同埋對阿波舞都冇咩興趣 所以我地淨係安排左行街同食拉麵

德島市入面d鋪頭其實都好早收 但上網見到市區出少少叫藍住町嘅地方有間you me mall 開到十點 又有好大個停車場 所以就去左喇


都係上網搵圖冇影相

揸左個零中左右就去到 入面都有好多野行 uniqulo/ global work / muji/ abc mart/ namco/ supersports xebio咁/ 仲有間超市同百貨 我會覺得佢似荃灣廣場咁嘅氣氛但大好多



行到人地收鋪就揸去市中心食麵王 麵王收12點我地11點3去到 門口買食劵入去搵位坐好快就有得食


最出名嘅窩蛋豬肉飯同拉麵
拉麵個湯較濃但份量同配料都好多同好好食

佢仲有個餃子都好出色 但第二晚食完大阪王將就覺得天外有天

飲飽食醉之後番淡路島bnb 沿途去全家補給下買下生果嘢飲搞搞下去到bnb都成2點 好在呢間係整套房子亦同屋主單左聲話會夜 佢覆番我幾點check in只要靜點就得喇 時間呢個都係我地嘅旅程好緊要嘅一個原素

入到屋搞個熱水爐好耐都唔識搞 每次熱水都係好快就冇 每人平均匆匆沖左五分鐘就算

食下生果吹下水搞呢搞路之後 3點半左右就訓

亦係三晚最早訓嘅一晚

《第二日》

今日一早去睇鳴門漩渦 睇鳴門漩渦得潮漲潮退兩段時間有得睇 而當天就係9點半左右同黃昏5點左右

睇漩渦有三間公司揀 睇自己需要啦

うずしお汽船 -- 細船，可以超近漩渦，冇咁定
鳴門觀光汽船 -- 大船，多人，定，可以連埋渦之道買
漩渦觀潮船－咸臨丸 -- 淡路島上船，大，特色帆船

我地係揀左最細最近果間うずしお汽船，搭9點半果班 去全家買左幾支嘢飲幾嚿飯團就揸去碼頭喇


只能講太自然好神奇 亦一個非常值得來參觀嘅一個地方

睇完上觀景台hae下抖下就出發神戶喇
亦係今次旅程重點環節
神戶勝利船

留名

《繼續第二日》

睇完漩渦即刻揸上神戶 個零鐘車之後就到左第一個景點 新長田鐵人廿八公園


沿路會經過連接淡路同神戶嘅大橋同摩天輪


第一次踏足本洲非常興奮


喺新長田駅泊好車後 去到鐵人廿八公園 雖然唔係fans 但幾個麻甩佬見到咁大隻公仔都係好興奮

食完飯之後出發去御畸公園睇神戶勝利船對新潟天鵝 話說本身plan神戶嘅時候只係因為想食神戶牛 但適逢見到原來果日有主場比賽 仲要係開季第一場主場 就plan埋落去喇 拿拿臨上網買波飛買泊車劵


球場氣氛相當好呀 出面有好多唔同嘅攤位 大家好有秩序咁排隊入去 果日第一場主場仲每位球迷都送打氣波衫一件


有成三萬人入場差唔多爆滿 氣氛相當之高漲 太遲入場得番龍門後面坐 但個位相當靚 仲好近咁睇到兩個入波

最後2:1贏左大家都好開心 致勝嘅第二球仲要係全場球迷出力打氣入波嘅 終於感受到主場優勢係咩
香港真係可以完全收皮

睇完場波出番三宮食今晚嘅晚餐

神戶牛

上網搵到間又平又好食嘅餐廳 叫grilled missho
套餐有前菜 沙律 餐湯 石燒神戶牛 神戶牛漢堡扒 同咖哩飯 都係5500yen 抵撚到爛


其他冇影相 神戶牛燒得好香 唔係好薄果種入口即溶 但都非常淋身好食 醬都無落加兩粒鹽已經好食到不得了

不過呢餐都係成個旅程排第二嘅一餐 最好食嘅反而喺之後嘅行程

食完晚餐就揸埋去大阪 9個字車程
去大阪嘅原因係純粹想過去行下食下宵夜 因為大家都未去過同番淡路夜晚都冇嘢行冇嘢玩冇嘢食


好城市嘅大阪自然多人好多建築物高好多車多好多 亦喺呢個城市見到三種呢兩日都冇見過嘅人

雞 古惑仔同香港人

行左陣就去磯丸食宵夜 唔知係咪超級旅遊區嘅關係 呢到嘅店員冇咁好禮貌 亦可能係咁啲野都冇咁好食

食埋大阪王將之後就揸番淡路 佢個餃子真係好食 皮薄餡靚 外脆內軟

揸番個幾兩個鐘車番到淡路涼都冇沖累到淨係刷左個牙就訓左

訓覺果陣係4點半 即係呢一日足足玩左廿個中

冇更新 ?