我盡量整合佐一下今晚各種帶風向言論嘅類型，希望大家一齊集思廣益，思考對策，提供建議改善我地嘅討論。緊記，對家最犀利就係分化，我地都要進化。
1. 真三毛鬼
一般只有文字轉述重大資訊，有時加句已fc就當source。言論中往往有隱藏嘅惡意，將矛頭指去某一立場嘅手足。
對策：純文字/證據不足post，全部人用不推文功能問source，直至有proof，期間可以善用起底功能，有時自己友會做標題黨，自問自己處於安全環境嘅，就幫手click入去睇睇d posts有無問題，確實身份後block。
2. 凡事block/鬧佐先嘅人
最近每個人壓力都好大，見到可疑言論躁底就二話不說block，甚至以人身攻擊（例如針對對方P牌）作為佢哋滅聲嘅理據，但佢哋往往無惡意，純粹因為擔心情況惡化先咁激動。
對策：覺得唔可靠嘅post，用不推文功能，提出引導性問題要求clarify言論，切勿一開波就屌人，以避免誤傷自己人，或filter佐有用意見。
3. 信任親友，覺得唔洗fc佢哋說話嘅人
好多來自親友嘅一手資訊，我地都會先入其中當真先，最後可能無惡意地炒車被其他兄弟當鬼block。
對策：出post前問親友，source係咩？出post後發現炒車，請去站務台要求連仔del走錯誤資訊嘅post，並向各位巴絲道歉澄清。
4. 擔心親友安危，將憂慮直接放上黎嘅人
例如訊號唔好，打電話無人聽，或者睇直播見到疑似自己朋友出事嘅危險情況，為爭分奪秒，未fc就發放表示有義士需要幫助嘅言論。
對策：每位義士，請向自己信任嘅至少兩個熟人提供自己嘅緊急聯絡方法，例如留底自己家人電話俾佢哋，提供多幾個途徑，俾關心你地嘅人fc你嘅現況。可以download依家免費開放俾香港人嘅parachute app，以作求救及錄影證據，詳情search app store。
5. 出於好心誤shared連登上面錯誤資訊上ig/fb，其他人又當ig/fb係source，share翻上連登當fact check佐
對策：除非有任何有力證據/資訊根本無咩辦法fc，請各位手足唔好盲目相信各媒介發放嘅資料，另外可以facebook inbox你地嘅懷疑俾做緊直播嘅新聞page，由前線記者做fact check，例如立場（811由於各地兵荒馬亂，立場inbox秒seen讀者有圖嘅訊息）。
6.post太長，直接睇最後一頁就當係結論嘅人
對策：善用圖片功能，睇佐有圖嘅留言先，再利用相關回覆自行整理重點，有時間的話可以打埋出黎俾大家參考。
整合佐好耐，好努力思考過先出post，希望大家每次出現異常情況嗰陣，都可以整理心情，總結當日奇怪嘅地方，開放俾大家討論。
小妹不才，希望大家幫手推post之餘，都提出更多建議，大家分工合作，見招拆招。
新官上任，我地都要學下點樣進步，我愛各位戰友，請求各位珍惜自己人，香港唔知仲有無下一個5年了，光復香港，時代革命！
