大家好,小弟今年27歲,兩年前開始發現有脫髮問題
上網睇左好多唔同人講既治脫髮方法,當時就決定如果真係比我搵到個好方法一定要開POST同各位巴打分享返,大家當我吹水又好賣廣告都好
我只係因為應承左自己所以先係呢到開POST分享下,內容就信不信由你啦
是咁的,兩年前有一次去剪髮既時候,剪開果個髮型師突然同我講,你前額既頭髮好似愈黎愈少喎。我即刻好驚,唔通我咁細個就開始甩頭髮?
之後我就成日照鏡,又成日撥D陰去遮住,連我自己都覺得我D頭髮愈黎愈少
當時我就上網睇左好多唔同既方法去改善,又試過睇中醫,食左一排中藥,又試過戒J,早D訓,停止左做GYM等等,不過都可以話無乜效
完全搵唔到方法既我真係勁灰,晚晚返到屋企就係咁上網睇唔同人既防脫髮方法,但係真係無可能試哂,而且試完要好耐先知道有無效,我都驚試多幾個方法我D頭髮就甩到返唔到轉頭
最後我做左一個我覺得係我人生中其中一個最正確既決定,就係去睇醫生。我搵左一個都幾出名醫治脫髮既皮膚科陳醫生,厚住面皮咁去同佢講我甩頭髮。
陳醫生講野超快,但係對病人都幾好。佢同我做左個好簡單既檢查,又幫我抽左血檢查肯定我唔係其他原因脫髮,之後就同我講我呢D就係雄禿,佢話我而家有兩個方法可以做,就係食藥同埋用冷激光治療。
作為一個成日上網既廢青,我當然事前已經係網上搵過資料,知道西醫治療脫髮既藥物主要有兩種,就係Minoxidil 生髮水同埋口服藥Finasteride。但係因為見過有人話口服藥有機會引致性無能,所以原本我係期望佢開生髮水比我。
於是我問我可唔可以淨係試下用生髮水先?我唔係太想食藥。醫生解釋返比我聽,因為治療脫髮需要持之以恒,生髮水每日早晚都用會整到個頭好油同好立,會好難睇,會好難堅持落去,如果我真係唔想食藥可以試下用冷激光先。佢用6000蚊賣左部激光生髮梳比我,同埋話包埋以後免費幫我用儀器跟進我既頭髮生長情況(當然診金都係要比)。
跟住佢搵左個姑娘教我點用呢把梳黎生髮,一個星期用三次,每次用十五分鐘,睇落都唔係好難用,當然之後我又上網搵左好多資料啦,發現原來呢個激光生髮都有做過唔少醫學研究,而且效果都唔錯,都係美國FDA APPROVED,亦都令我信心大增,決定要堅持用落去。
於是每晚我都會用D時間,一邊梳頭,一邊開住youtube睇下片,其實時間都好快過,有時我驚唔夠有效我仲會梳夠半粒鐘。之後幾個月,唔知係咪心理作用,我覺得甩頭髮真係少左,而且前額都開始生左好多細毛出黎,直到三個月後去復診,佢用儀器幫我檢查左頭髮,發現我前額既頭髮多左同埋粗左,但係要堅持繼續使用先會見到有效果。之後我再返左去復診左幾次,每次都見到有改善。直到一年前,醫生話我都無需要再復診了,因為脫髮問題已經控制住左,我只要繼續用果枝激光梳就得。
而我自己都覺得有自信左,唔使再成日遮遮掩掩,雖然都係M字額,如果好大風/濕哂水都係會現形,不過相比起一開始既我,我已經覺得好好多了,我而家都有做返GYM同打J,但都無乜大問題。我都好慶幸當初有決定去睇醫生
我知道對好多人黎講,用六千蚊買枝梳係好貴,但係以我所知廣告話其實可以用到十年以上,計返勻其實都係平過食藥同生髮水好多,同埋重點係無乜副作用,相信好多人都會堅持到用落去。
不過大家都要對佢有合理既期望,如果D頭髮已經甩得好犀利,毛囊已死,相信亦都唔會有咩效果,同埋效果可能無咁快見效,要比多D時間慢慢黎,可能如果加埋食藥效果會更好不過我覺得自己暫時唔想食藥住,有一點可以肯定既係,起碼對我黎講,佢係幫到我止左脫髮既,至於我長遠用落去可唔可以再多少少頭髮我就暫時唔肯定。
希望各位脫髮友都可以勇敢搵方法解決自己既脫髮問題,唔好逃避,亦唔好咁快放棄,總會有方法,我當初都經歷過好挫敗覺得自己會變光頭,但係最後都搵到方法,我當初應承自己,如果我用既方法有效我一定要鼓勵返其他人,所以我好想用呢一篇經歷鼓勵下大家,共勉之。
有咩問題即管問,我答到都會儘量答