你的樣子如何,你的生活定必如何。
Your face, your fate.
做咗咁多年人,你自己又有無諗過點解每個人的樣會咁唔同呢？
無,你無諗過,因為你只係識自己顧自己,無諗過其他人的感受。
每個人的樣之所以唔同,答案就在於每個人的DNA各自都有些微的不同。
DNA又名脱氧核醣核酸,中文名的由來你唔知都唔緊要,我亦都唔會話你知；總之你知道有DNA依樣野就得啦。
DNA呢,你可以當為一組好長好長的密碼,而依組密碼只有四個英文字組成(A,T,C,G)
例如：ATGACCCCTTAA
正所謂魔鬼在細節,DNA當中其實內裡仲有好多細節,不過講得太複雜的話好多人會覺得好悶,所以遲下有機會先再講。
總之暫時黎講,你當住DNA係由ATCG組成的密碼先啦。
咁呢,再講深入小小,
ATGACCCCTTAA
係DNA依組密碼入面,身體的細胞會三個字三個字咁樣黎睇,即係咁
ATG ACC CCT TAA
每三個字母就代表住一個訊息,指引細胞去做某樣野。但先前都講過,魔鬼在細節,
有時唔同的英文字母組合其實都係代表着同一樣的指令。
例如 TAG TAA TGA
依三個唔同的英文字母組合就代表着同一個指令。
你問係咩指令？ 都係個句,本着深入淺出的精神,遲下有機會再講。總之你記住三個英文字母作為一個單位,一個單位就一個指令啦。
但唔講你唔知,每個人的每一個細胞(唔計精同卵同某幾種細胞),DNA入面的英文字母有成三億幾個,水蛇春咁長,叫人點玩呀？
但細胞好聰明,或者應該咁講,係創造細胞的人/神/鬼/不明物種好聰明,係細胞入面整左好多機制黎控制依三億幾個字母。
其中一種,就係靠認字母組合。係正常同大多數的情況下,再講一次,係正常同大多數的情況下,ATG依三個英文字母就會被認為係一組密碼的開端,例如
ACC ATG ACC CCT TAA
咁呢個細胞就會漠視ACC, 只會由ATG 開始讀起,讀到TAA就停。
ATG ACC CCT TAA
咁如果係咁呢？
ACC ATG ACC ATG CCT TAA
咁個細胞就會讀取成有兩組訊息
ATG ACC ATG CCT TAA
同埋
ATG CCT TAA
到依一刻,你可能會問,
Ok,講咗咁多,咁關個樣咩事呀？
咳咳...
DNA係無突變的情況,其英文組合理論上係會跟住你一生一世,係你啲終身伴侶。
如果我哋攤開兩個人的DNA,比較一下,就會發現過中的英文字組合大致上非常的相似,但奈唔奈中途就會係某個位上有一些細小的分別,例如
男神A： ACC ATG ACC ATG CCT TAA
中上男神B ： ACC ATG ACC ATG CCC TAA
依個情況下,學術上黎講叫做SNP
(Single nucleotide polymorphism)。
字面黎解,就係話其中一個英文字母轉左樣。
試想下每個細胞的DNA有成三億幾個英文字,就當你一萬個字母入面先有一個SNP,積積埋埋宏觀黎睇會有好大的分別。
正正就係依啲SNP的發生,每個人的DNA就會有唔同的差別,而依啲差別就導致咗每個人的樣如眾不同。
幾年前,有班科學家發現咗係DNA三億幾個字母,零零舍舍有五個區域決定一個人的樣子會變成點。
究竟係咪真呢？
這並不重要。
因為最終黎講,
你的PS技術如何,你的樣子定必如何。
從來開po都冇人睇
多謝