[消防大佬勸警長文]
[簡直是勸說/遊說的典範]
[給反分化的大家參考]
係FB見到有三粒花的消防大佬出左篇勸警長文。本身見到消防大哥出文已經值得睇，睇完內文發現，嘩！果份厚度﹑親和，呢位消防大佬真係高人黎！所以忍唔住一定要貼過黎同大家分享。
我諗，呢種待人接物的方法同態度的示範，對所有一直思考緊「對抗分化」和「維繫合作」的各位手足，係一個有價值的參考。(我呢個月見到好多手足都一直有好努力咁做緊﹑學緊「親和」呢件事，包括我自己，每次見到都真係幾感動。)
全文如下：
我呢對膊頭又殘又舊，睇落唔係咁Sharp醒，我一直覺得膊頭有三粒花唔係乜野咁威猛嘅事，反而成日都提醒我公僕有幾大責任。
各位警察朋友，望住自己套制服，諗下邊個出糧俾我地，當咁多市民唔滿意嘅時候，大家係咪可以考慮下自己係咪有不足嘅地方呢，係咪可以虛心D接受下其他人嘅意見呢。（如果你肯放低成見，上網睇下所謂黃屍所講嘅野，又或者好似林行止呢D咁有公信力的傳媒人寫嘅野，你對成件事可能會有唔同嘅睇法。）
最近好多網民成日話應該加消防救護人工，坦白講，加人工邊個唔想，但呢刻唔係講呢D野嘅時候，希望大家唔好係呢個時候講呢個問題了。我真心覺得警察要面對同處理嘅工作比我地複雜好多，比我地高人工係無可厚非。如果唔加人工，什至減人工可以讓香港社會平靜下來，我個人好願意。
不論作為示威者或消防人員，我都好希望能與警察以互相體諒嘅心情去合作。03年前嘅遊行，示威者係為警察送水嘅，你們還記得嗎？多年黎喺你地當中散播仇恨，將你地推向同示威者完全對立嘅到底係邊個呢？表面上講要政治中立，但企圖利用你地解決政治問題嘅係邊個呢？破壞法治係唔啱，但係邊個迫使示威者犯法，搞到你地咁忙要成日執法呢？表面上好似好支持你地，大大聲講道歉係天荒夜譚果個，煽動左你地出黎打市民，結果有人要坐，大糧都無埋，佢真係支持緊你地，定只利用你地為自己再上一層黎鋪路？
警隊一向係紀律部隊之首，公認係最醒嘅紀律部隊，你地一定明白自己係俾人擺左上枱，騎虎難下，但再咁落去只會更泥足深陷，更加萬劫不復。接受成立獨立委員會還自己一個清白（老實講，你地遮曬委任證，獨立委員會都查唔到你地，只會查到落order俾你地嘅人。咁大單野，無兩三年都未查完啦），何必要同跣你地嘅人一齊搭沈船，讓你同你家人受人白眼，被社會唾棄呢？
希望各位悟已往之不諫，知來者之可追，實迷途其未遠，覺今是而昨非。
