大家最近都好關注多功能智慧燈柱同中國嘅社會信用評分系統，擔心過幾年社會信用評分系統會喺香港推行，而多功能智慧燈柱就可以即時配合到社會信用評分系統，對市民進行監控，當中涉及嘅問題除左個人私隱之外，更涉及屆時可能、甚至必然出現嘅白色恐怖，以及會延伸出嘅、對自由嘅侵犯。
但大家比較少留意嘅一樣野，就係中國近年興起嘅「基因檢測」。
「基因檢測」呢幾年喺中國開始流行。呢到講嘅「基因檢測」除左講緊可以檢測藥物敏感、食物敏感、患病風險之外，更聲稱可以檢測性格特徵、行為特徵、欲望與忠誠度等等。
聽落幾好玩，係咪？
我以前喺微博（係，我間唔時有睇下微博）上睇到各種基因檢測嘅廣告時都覺得幾有趣，認為只係check下自己有幾易飲醉、祖先係咩族嘅人、對咩野食有敏感而自己唔知⋯⋯等等。
直到我見到呢個基因檢測嘅廣告。
見到呢個廣告嗰一刻，我當堂打左個突。
可能就咁睇，檢測到自己利他主義傾向較高其實都冇乜野。
但如果我地配合社會信用評分系統嚟諗呢？
社會信用評分系統會收集市民一切嘅個人資料以評估一個人嘅信用分數，包括位置、健康記錄、保險、私人消息、財務狀況、遊戲時間、信用評估信息等等。基因檢測嘅結果自然亦不在話下。只要政府一開口，你唔係信D公司會堅持唔披露顧客嘅報告呀嘛？
如是者，一但你做左基因檢測，政府就可以知道晒你嘅性格特徵、行為特徵等，甚至一D你冇話過要check嘅野。
咁如果中國政府將呢一項資料都加入去社會信用評分系統呢？
如果係咁，政府就可以玩優生學，可以挑選有利自己嘅基因
只要將帶有各種不利政府嘅基因嘅人（例如有反政府傾向、性格唔鍾意受束縛）信用評分降低，大家好可能就唔肯同呢D人結婚，因為對方嘅信用評分會影響到自己嘅生活、會影響到自己嘅小朋友嘅未來；又或者將帶有有利政府（例如政治冷感、保守）嘅基因嘅人提高信用評分，令其他人更樂意同呢類人結婚生仔。久而久之，呢D不利政府嘅基因就自自然然會被篩走，然後個個市民都天生係乖乖仔，hurray！
自我審查由對行為嘅審查發展到對基因嘅審查，厲害了我的國。
甚至乎，佢可以話呢種人唔可以結婚生仔，或者唔可以做公務員、高層⋯⋯佢完全可以做到納粹做過嘅野。
你可以話我諗太多，可以話我被害妄想，可以話我陰謀論。但睇返宜家中國國情，呢D野真係冇可能發生？我就覺得發生機率都幾大下。
而宜家呢件事開始殺到嚟香港。
今日碌碌下Facebook，見到一個Circle DNA 嘅廣告，話嚟緊會開始喺香港發售基因檢測包（唔講幾時啦，唔想大家去買），買完之後俾滴口水落去，再寄返去俾佢地。
呢間Circle DNA又係咩來頭？Google一搵就知佢中文名係「北京源圓基因技術有限公司」，根據公司網頁，呢間公司於喺2019年於中國北京成立嘅。
大家諗下，如果你買左，寄左滴口水過去，咁你嘅genetic information又會去左邊？
基因檢測呢家野當然有其好處。我見過有小朋友濕疹，搲到手腳爛晒，驗左血發現原來係敏感，處理左敏感源之後兩星期好返九成。但如非必要，我真心勸大家唔好貪得意走去玩
因為如果你反對香港裝多功能智慧燈柱，如果你憂心中國嘅社會信用評分系統，如果你擔憂政府全面收集市民個人資料玩白色恐怖，你唔應該輕視基因檢測呢樣野。
光復香港 時代革命
