在此要鳴謝多位網民同元朗人嘅幫助，特別係有位街坊目擊到事情嘅較早階段，填補咗唔少空白。事不宜遲，報告內容如下：
（一）事件起因：有可能係白衣人散水經過西鐵站時獸性大發，但仍未能排除係計劃好要襲擊西鐵站
（1）雞地非法集結
當晚約8點，大批白衣人喺鳳攸北街休憩處（落雞地條天橋嘅盡頭）聚集。由於呢個地方喺7月16日曾經舉辦「黑警惡行觀賞會」，引嚟部份街坊不滿，加上元朗黑夜前一日，部份元朗人已收到訊息，話有人7月21日晚嚟元朗聚集，所以有可能白衣人當時喺呢個地方耀武揚威，係要對付一旦會嚟元朗嘅示威者。
然而，從唔少片段可見，的確有後生仔、黑衫嘅，喺雞地一帶被白衣人追打，所以我地可以合理地推斷，如果呢班白衣人見到有黑衫人喺港島遊行完、返嚟元朗，佢地都可能兩句唔埋就郁手打人。而正因為呢個原因，當晚10點打後，陸陸續續有人喺元朗站派衫、換衫，避免著住黑色衫出站。
（2）進入西鐵站
10點32，有街坊喺鳳攸北街見到白衣人散水，互相講byebye。當中大部份人坐的士／坐車，部份行上通去新元中（形點II）天橋。同一時間，有位街坊話佢見到telegram派衫消息，所以10點半左右到咗元朗站派衫，當時車站無異樣，佢仲遇到兩個同樣喺度派衫嘅人。但去到10點33，有白衫喺新元中落嚟，見到其中一個派衫嘅女仔著黑衫，就大叫「黑衫𠴱個企喺度」。呢個女仔就即刻入閘、衝去女廁，而班白衫就跳晒入閘，去女廁圍毆佢。呢個應該係第一輪襲擊。
目擊者喺被白衫指嚇之下喺啲轉角位暫避咗一陣。下一個再有確實資料嘅時間，已經去到10點40。當時有白衫在閘機外同閘內人士口角，隨即十幾個白衫跳晒入去打交。（警察話，佢係10點41接報元朗站有打鬥）呢個應該係第二輪襲擊。
去到10點44，林卓廷開始做live，當時已見到有人受咗傷，地下有血跡，本報告相信就係第一輪／第二輪襲擊所造成。當時live的畫面已經唔見白衣人，現場人士亦都同林卓廷講，白衣人已經離開。港鐵話，佢地喺10點47報警。
（3）由閘外到閘內
根據林卓廷個live，喺10點47嘅時候，好多白衣人再次出現喺西鐵站中間位置；目擊嘅街坊話，佢地係由E同F出口（新元中嗰兩個）入嚟，然後佢地開始隔空攻擊閘內嘅人，到10點51立場新聞都開始live，之後嘅事大家都清楚。以下特別提三點：
（i）警察話10點52兩名軍裝警員到場了解情況，而網上片段亦可見有兩個軍裝由G2出口離開。由於當時林卓廷同立場新聞都開咗live，但完全係聽到有人講話有警察，所以可以合理推斷，呢兩個軍裝應該連行近閘機、向現場人士了解未必有，就直接離開。
（ii）10點58，係閘機外、便利店對出左右，白裙女子倒地（佢後來向明報確認懷孕）。不足半分鐘，出咗閘機嘅立場姐姐亦都被一個大叔追打，打到佢瞓低都未停手。
（iii）閘機外兩名女士先後倒地之後，喺10點59，閘內市民對閘外白衣人射水。但11點00，白衣人大舉攻入閘內，令林卓廷、市民等成班人撤退上月台，然後就係白衫追上月台、打埋車廂乘客嘅事。
（二）不實說法：根據有限嘅資料，可以推斷以下三個說法都係錯嘅
（1）黑衫人先撩者賤？事實係遊行人士返到元朗，都紛紛換走黑衫，避免遇到白衣人會惹麻煩甚至被打。反而係有個女仔著住黑衫喺西鐵站派衫，就無啦啦被白衣人喊打喊殺。
（2）林卓廷帶隊搞事？事實係佢嚟到嘅時候，應該已經發生咗兩輪襲擊。雖然佢之後有不停挑釁白衣人，但都唔會改變當時襲擊已經發生咗呢個事實。
（3）白裙孕婦被水跣？事實係佢同立場姐姐都被人打低之後，閘內市民先射水還擊，同時試圖保護閘外被人毆打緊嘅人。
（三）警方七宗罪：根據有限嘅資料，可以推斷警方犯咗最少七個錯
（1）無視白衣集會嘅危險性根據區議員麥業成，佢喺7點30已通知元朗警長，鳳攸北街嘅白衫係手持木棍；而係9點幾，都有街坊喺現場一帶被人追打。由此可見，呢個不但係名副其實嘅非法集結，而且非常有危險性，而呢個危險性係大家都可以預視到！警察唔係唔知，而且有證人提供相，可見10點26有架警車經過鳳攸北街，佢地都唔派人去現場，及早防範事情失控。之後白衣人無論係有心去西鐵站搞事，抑或只係散水時經過，個結果都可以話係由警方造成嘅。
（2）接報警員置市民生死於不顧：既然警方都話，兩個軍裝警10點52到場後，評估過覺得有100人打鬥，所以要求增援，咁佢地點解可以任由呢100人繼續打鬥？如果兩個軍裝警都驚危險，咁無警棍、無槍嘅市民，咪仲危險？更何況就算兩個軍裝警未必控制到個場面，喺增援嚟到之前，佢地係咪都應該留喺站內監察住個形勢？一個咁危險嘅現場，打死人都可能發生，警察喺度最少可以舉槍示警喎！真空期間無打死人，警方其實只係撞彩。
（3）警察到場無截停疑犯：既然警方知道有白衣聚集，兩個軍裝警又視察過現場，加上佢地11點16嚟到嘅時候啲白衣人向G2出口跑，點睇都有嫌疑啦；警察初初到場，亦唔會知會唔會搞出咗人命，即係隨時有人係殺人兇手。咁都唔截停幾個查問，套下資料？呢次嘅放生，等同埋下伏線，令白衣人有恃無恐，之後再打多一次人。
（4）警察搞市民都唔去搵疑犯：大批警察到場後，竟然係同閘內、閘外市民理論。雖然好多人已經情緒爆發，不停鬧警察咁遲先嚟，但都無阻佢地分派人手去追截白衣人。點解冇咁做到？當時亦有市民好準確地指出，白衣人在站外樓下，警察要去的是他們那邊，不是在站內同市民糾纏。
（5）警察離開元朗站後完全消失：根據片段，大批警察喺市民一片謾罵聲之中，11點44從J出口離開，而警察就話佢地係11點50離場。香港電台記者11點52，喺J出口下面見到指揮官李漢民，質問佢幾點到場，佢仲串串貢咁話「冇睇錶」，當時仲有一大班警察。但係8分鐵之後，閘係00點00，從蘋果live見到有市民喺J出口地下（即係李漢民剛才位置）同少量白衣街坊爭執。呢輪爭執維持咗7分鐘，然後市民撤退返上西鐵站，飛天南突然倒地昏迷，之後白衣人怒髮衝冠，上返J出口同站內市民互掟雜物，呢度時間、兩次衝突，但一個警察都冇！其實警察明知無拘捕白衣人，而站內又有市民，好容易碰上然後再起衝突，但佢地既然安然再次讓警力真空，結果就係到00點28，白衣人將成個J出口鐵閘強行搵起，然後入站、入商場追打市民，多人因此受傷。
（6）警察再次任由白衣人逃走：根據live，白衣人喺車站同形點I打到人頭破血流之後，00點32再次從J出口離開。而一條車Cam可見，00點33大批白衣人從J出口電梯底離開，當時有多架警車，但完全無警察上前阻截佢地。呢班人打完人，就咁喺警車面前走晒！
（7）入村調查都唔敢帶人走：大班白衣人在凌晨1點幾開始，喺南邊圍村村口聚集，警察拖到3點36先入村調查都算，16分鐘之後佢地出返嚟，一個人都冇帶走，連帶去問話嘅人都冇。到4點06，好多白衣人坐私家車離開南邊圍村。雖然佢未必可以即時鎖定疑犯，但大可以帶啲人返去48小時問話，咁都唔做，唔係放生？
元朗黑夜疑點重重，但警方三日後交代嘅資料，就只有呢幅簡陋嘅圖表，仲要唔係出嚟見記者，而係拍條片擺上網就當交代咗。
雖然呢份報告唔全面，但民間獨立調查委員會已經盡咗力。希望大家能夠參考、善用，多多廣傳出去！具體時序，請見附表。
