轉自蘋果記者Facebook:
頭先我同攝記食催淚彈,食到好應,攝記直頭暈低咗,我就喪嘔。
示威者一見到,即刻過嚟攙扶同安慰我哋,見攝記暈低,就立即抬起佢走去遠離戰場嘅位置休息,沿途大叫「first aid!有冇first aid呀?」跟住又有幾個示威者走嚟幫我洗眼。
混亂間我跌咗個豬咀,有人竟然幫我執起保管,事後主動俾返我。
本來仲諗住要講自己係《蘋果》先會獲救,但其實冇人問過我做邊間,二話不說就過嚟幫我哋。
我唔知佢哋會否睇到呢個post,我只想講,真係好多謝你哋,其實「多謝」二字都不足以表達我嘅心情。但係,真係好多謝你哋。
希望有一日,我哋可以坐低食餐飯,好似普通人咁傾吓閒計,講吓無聊嘢,而不需再在戰場上碰面。