為左咩，讀藥劑？

藥劑學san 2019-07-17 09:56:28

《第三回：為左咩，讀藥劑？》

我相信剛經歷左放榜嘅中六同學仔，應該係最體會到要揀讀咩既掙扎。你有N科5**嘅，恭喜你，考得好嘅你當然可以任揀，但相信要係掙扎中作出抉擇嘅同學仔應該係佔大多數，可能你係爭一分先到lower quartile又想搏，又怕所揀嘅科無前途，讀asso又唔知邊間易駁返上ugc degree，爭少少又心思思想retake/repeat去搏下，又諗緊雙修asso同retake有無可能，我有學生更誇張地已經考慮到技術移民咁遠嘅事，但我明白到咁係無可厚非，只係因為而家香港嘅氛圍確實會影響到每一個同學仔所作出嘅選擇，係社會嘅錯，係我地嘅錯，因為我地大人無為你地去守護好我地嘅家，係我地走得太後，政治覺醒太遲，對唔住。

而嚟到今日，相信中六同學仔JUPAS都已經搞掂哂，asso/hd都已經留哂位，作好左自己嘅選擇，之後就係等放榜/開學。入到大學嘅就等reg day，報ocamp；讀asso嘅就等開學爆seed爆4升返上u；讀HD嘅就為自己工作鋪下路；諗緊retake/repeat就要問清楚自己係咪真係捱得到（我有retake過，想搵人傾下都可以pm/dm我）。

唔知你地最後係點落決定呢？係興趣定前途行先？定你既興趣本身就有前途咁美滿？而我更加想問嘅係，有無人擺左藥劑係band a？擺左嘅你，應該一係唔知自己想讀咩，又或者係滿腔熱誠想係藥劑界大展拳腳。前者同後者我都好佩服你，因為唔知道前景係點你都夠膽擺係band a；後者就仲勁，因為如果你有留意新聞，了解到而家藥劑行業嘅競爭咁大，藥劑師可能都要失業，都仲揀藥劑，你一定係好愛藥劑。

咁我究竟係屬於前定後呢？相信我個名已經答左你。咁你又會諗，點解我講到藥劑行業好似好唔掂，我都繼續去讀？而家嘅中學一定會講生涯規劃，而我當年其實係無人會講（可能老師講嘅時候我訓左），而係《第一回：引言》我都提過下，其實當時我剩係得化學讀得好，所以我目標就係大學讀化學或者讀藥劑，最後成績唔夠，所以就揀左前者。唔知鍾意讀化學嘅你，尤其係有機化學（organic chem）嘅你，會唔會好鍾意見到d好複雜同大舊既分子（molecule），覺得好好玩，而藥劑係人都話chem要好叻先讀到，所以先會咁吸引我去讀，一粒藥就可以係人體裡面發揮到功用，頭痛食粒必理痛（panadol）就得，對我而言，簡直係著哂迷。

由一個老師，變成一個藥劑學生，要跳出安舒區當然係唔容易嘅事，心有時都會覺得好累，但好彩都有不少同學係第二學位（second degree)入黎讀藥劑，都會叫做有個伴，而其他同學都好易相處，仲會照顧身為「超齡學生」嘅我，真係好感謝佢地。

咁點解藥劑咁唔好景我都要入黎讀？係我既夢想
係咪富二代唔憂生活？唔係，所以返part time返到傻...
唔驚搵唔到工？條路自己揀，XX唔好喊
有老師唔做去讀藥劑咁搏？你人生唔會有好多機會去追夢

我身邊同齡嘅朋友，都不少係買左樓，結婚有埋小朋友嘅都不計其數，而都有好多係話自己根本唔鍾意而家份工，只不過而家返唔到轉頭，為生活同家庭都無辦法，我絕對認同而且好尊重。我之前曾經睇過一段短片，係問一班臨終病人佢地最遺憾係咩，你又估下佢地會講咩，可以留下comment，睇下你地會唔會有佢地嘅覺悟。

香港有關藥劑既fb page同ig都真係屈指可數，其實只係想分享下讀藥劑嘅點滴，亦都想知下巴打絲打點睇藥劑學生或者藥劑師既工作，同傾下點樣可以令藥劑行業做得更好。如果想知多d同支持下，可以like以下個fb page
https://www.facebook.com/chemlsspharmdream
同 follow ig
https://www.instagram.com/chemlsspharmdream

Catsian 2019-07-17 11:30:33