樂壇小強Tommy仔中出張倚雯eva 生逾7磅巨B仔取名Caesar

煙肉仔共匪襲地球 2017-02-22 19:12:02

現年36歲嘅MK組合E-Kids成員阮民安（Tommy）榮升老竇！去年被踢爆同女友張倚雯（Eva）奉子秘婚，上月初，籮咁大個肚嘅Eva仲陪Tommy到中環Gucci掃貨(新聞連結：http://bit.ly/2lBoYYT )，事隔一個月，話咁快BB已經出世啦！Eva喺私人社交網貼B仔相，寫道：「2017-02-17 BB已平安出世啦！順產7磅幾的B仔！二人出門三人回家，感覺好奇妙haha！生仔十級痛果然名不虛傳，來回地獄也值得！」

B仔肥嘟嘟面圓圓，眼線好長又好多頭髮，似足老竇Tommy仔，《蘋果》致電初為人父嘅Tommy恭喜，不過堅持將屋企事低調嘅佢，依然對人盡皆知嘅秘婚同做老竇守口如瓶，只肯講Eva做咗媽媽，而唔講自己做咗老竇！Tommy話：「Eva嘅BB出咗世啦，母子平安，大家一直好關心男仔定女仔呢，其實BB係男仔，2月17日晚上出世。」
問到Eva生B痛到來回地獄折返人間？Tommy話：「都知道Eva之前一晚入咗醫院，一直等等等，因為佢係第一胎，要到適當度數BB先可以出世，真係等好耐、痛好耐！肯為另一半生BB嘅女士，真係非常之偉大，每一個男士都應該好好錫太太，因為呢個過程好辛苦。」
B仔改咗名未？Tommy話：「聽講BB中文名未改，英文名同花名就改咗，因為網上世界最緊要有朵先，英文名叫Caesar，即係凱撒，因為佢出世好多毛，成身都係毛，諗起猿人、馬騮仔，Eva好鍾意睇西片，所以諗起《猿人爭霸戰》猩猩男主角，古羅馬帝國又有英雄人物凱撒大帝，所以BB英文名叫Caesar，花名可能叫大帝。」
問到對BB有甚麼期望？佢話：「我諗大家對BB期望，真係健健康康，符符碌碌，開開心心就得，希望佢盡量享受人生。BB係3.77kg，聽醫生講算重B，Eva都會餵人奶。」不過雖然係囝囝，但BB床用晒粉紅色，連超人公仔、帽仔、鞋仔都係粉紅色，唔講仲以為係囡囡㖭！Tommy就解釋因為Eva好鍾意粉紅色，係媽媽嘅專用色，冇得改！
Tommy仲讚BB好腳頭識揀年份出世：「2017年係非常好嘅年，E-Kids第一次開賣飛演唱會，今時今日市道可以賣爆，呢個係奇蹟，BB真係幾好腳頭，因為年尾E-Kids再開騷，今次可能唔止一場，希望BB做番自己任務，係一個幸運小寶寶。」

傻笑子 2017-02-22 19:15:38

聽講未改名？乜個b佢冇份架？