噚日舉行嘅九龍大遊行,部份示威者晚上轉戰旺角,警民又對峙。網上一段片段就顯示,喺旺角匯豐總行對開行人路,警員同示威者發生衝突期間,有警員向示威者大聲爆粗呼喝:「咩呀,認X住我呀!」、「隻揪呀!」,成為網上熱播片段之一。平日有做開健身嘅人民力量議員「慢必」陳志全,今日就喺facebook話,知道好多市民都想同呢位警員隻揪,但佢就叫大家唔好同佢爭,「我會去信警務處處長,應約隻揪」。
慢必話呀,自己未必打得贏呢位警員,但希望全世界可以睇到香港警察驅散示威者時,喺眾目睽睽之下,如何刺激群眾情緒、知法犯法,公然違反《公安條例》,挑釁市民打鬥。佢呼籲知道呢位「撩交打」警員叫乜名同幾號冧把嘅網友,可以話聲佢知喎。八方就好奇,巿民「應邀」同呢位警員「隻揪」時,呢位警員會否出示委任證?