據本報收到消息，原來「鄺神」曾經與現年26歲，喺nowTV做過主播、現為nowTV政治記者嘅廖康如(Lilian)拍拖。佢哋喺2010年認識，當時鄺神喺港台擔任《政壇新秀訓練班》節目主持，而Lilian亦有幫港台做節目，大家都係熱血青年，可謂志趣相投，好快就擦出愛火花。2011年，Lilian曾於fb上載一班年輕人舉辨「RTHK YP x HK Prayer」活動相片，見Lilian小鳥依人咁貼住鄺神合照，兩人又做出心型圖案手勢，真係sweet到漏！而佢哋嘅拍拖節目亦有啲特別，唔係一般情侶食飯睇戲咁簡單，曾經一齊去見證菜園村最後一夜。
不過，鄺神同Lilian拍拖一直好低調，由於鄺俊宇係民主黨成員，而廖康如於12年做過無綫實習記者，之後轉去nowTV做主播，2014年調職做政治記者，角色上似乎有所衝突。今屆立會選舉，鄺俊宇在選前大打「告急牌」，投票當日從黨友涂謹申分得大量選票，意外獲得491,667票，被稱為「票王」，成為立法會議員。據聞鄺俊宇想專注事業發展，幾經思量後，兩人在選舉前已經和平分手。記者日前致電鄺俊宇追問分手一事？佢喺電話中話﹕「私人事我唔會答o架嘞，我唔答背後有一個好大意義，就係想保護身邊嘅人。我以為你(記者)會問我梁振英添，因為o依家同梁振英打緊仗。」問會唔會再推出愛情小說？佢賣關子謂﹕「你睇吓咪知囉。」
廖康如同鄺俊宇口徑一致，佢話﹕「我諗呢啲私人嘢就唔回應，其實社會公眾都唔會對呢啲嘢好關心㗎啫。(選舉前分手？係咪好大壓力？)我唔會回應我哋有冇分過手，或者有冇一齊過，呢啲私人嘢。」對於橫洲發展項目上，鄺俊宇稱被梁振英屈是「摸底」對象，問有冇關心對方？廖康如話﹕「係呀，你都關心吓佢啦，我諗大家都應該關心呢件事係點樣發生。」早前有傳聞指廖康如被nowTV降職，由主播做番記者，佢否認﹕「我諗一間公司轉組係好平常嘅事，冇出現過『燉冬菇』，係自己要求轉組，因為我一直想做記者，冇諗過要做主播，鍾意做前線採訪。」
