想野餐 識去一定去添馬公園｜香港好去處

新假期 - 好去處 on June 10, 2019 at 5:48 pm
香港人最愁就係土地問題，但係位處市區黃金地段嘅添馬公園就有一大片草地，坐得攤得連做瑜珈都得，唔搵埋朋友一齊嚟野餐吹水真係嘥晒，日落夜景一流，可以由朝玩到晚。添馬公園24小時免費開放予公眾，唔好嘥咗呢個咁珍貴嘅空間，趁呢幾日天氣咁好，搵埋一大班朋友去添馬公園啦！
撰文：Si｜圖：新傳媒資料室、Instagram

添馬公園大草地任踩唔嬲 野餐之選
政府總部附近嘅添馬公園一直係熱門嘅野餐好去處。位於金鐘嘅添馬公園佔地17,000平方米，交通便捷，金鐘港鐵站一出，過條天橋就到，喺咁擠迫繁忙嘅金鐘竟然有咁大片草地，仲有無敵海景，簡直就係城市中的綠洲。平時公園嘅草地出晒名只作觀賞用途，但添馬公園喺正政府總部隔籬，仲有行政長官辦公室同立法會綜合大樓，草地都可以任踩唔嬲，大家要好好利用呢片草地先得，除咗野餐，大家仲諗唔諗到可以做啲咩呢？



添馬公園景觀開揚，環境舒適，可以坐足一日。

大片草地分為多個小區域，就算人多都唔會好擠迫。

如果嫌野餐太靜態，喺草地做吓伸展運動都唔錯。（圖：IG@hkgreenbuildingcouncil）

莫講話野餐，喺草地紮營都得呀。（圖：IG@wwwwind)
華燈初上 日落夜景一流
去到添馬公園唔好坐一陣就走，行出少少就係中環海濱長廊，呢度嘅日落夜景都好靚㗎，享受吓徐徐海風，只要有三五知己一齊，由朝坐到晚都冇問題。添馬公園內有幾張雲石櫈，有聰明嘅網民發現就一就角度就可以拍出「天空之鏡」嘅效果，反轉晒嘅倒影非常清晰，同正宗嘅「天空之鏡」幾可亂真，小編覺得夜景嘅效果比日景更佳，建議等到夜晚先影。


有網民C Chow就拍左一段添馬公園日落靚景Time Lapse，拍出了添馬公園海景嘅魅力。



添馬公園平面圖。（圖：康文署）
添馬公園
地址：金鐘夏慤道（顯示地圖）
開放時間：24小時開放
交通：乘搭港鐵至金鐘站，由A出口步行約5分鐘即達
查詢電話：2520 2321

無伏！6月野餐注意事項 編輯推介野餐必備物品！
新假期 - 生活 on June 10, 2019 at 7:59 pm
最近天氣非常適合野餐，繼今日推介了添馬公園作野餐地點之外，編輯就整合咗野餐人士必備物品！咁就一定玩得開心又放心！趁呢幾日天氣咁好，記住搵埋親朋戚友一大班人一齊去野餐啊！
撰文：GW｜來源：新傳媒資料庫

1）飲用水、毛巾：
最近天氣非常炎熱，加上添馬公園將會係熱門野餐地點，人多擠迫嘅時候都特別容易流汗！所以補足水份是非常重要嘅一環！最好帶定大量飲用水補充水份，仲可以留意到時有無流動水站，方便補水啊！仲要記住帶毛巾抹汗幫助散熱，以免中暑啊各位！

2）衣著：
至於衣著方面，前文都有提到，因為天氣非常炎熱，亦有大量報告指出，穿著「白色」衫有助減少吸收熱能，將會令身體較為涼快，仲無咁惹蚊！所以大家記住要穿著白色衫去進行野餐活動啦！最好再帶多一件衫去替換！

3）雨傘：
雨傘既可以遮陽，亦可以擋雨，喺各種關鍵時候可以達到保護自己嘅效果，私心推薦黃色，夠搶眼！

4）食物：
由於野餐是長期進行嘅活動，活動期間會消耗不少嘅體力，所以一定要帶定足夠乾糧如麵包餅乾等，到時記得要補充體力啊！

5）口罩、太陽眼鏡：
由於添馬公園附近有不少大馬路，帶定口罩就唔怕吸入廢氣同塵埃，戴埋太陽眼鏡就唔怕太陽曬親自己雙眼啦～仲可以帶幾分神祕感添！

6）雪成冰嘅水樽：
天氣炎熱，用雪成冰嘅水樽可以提供散熱嘅作用，退咗冰仲可以拎嚟飲，況且野餐點可以無冰嚟雪嘢飲呢？

7）芭蕉扇：
烈日當空，帶定風扇仔就唔怕熱啦～大家記得帶定多兩三個，仲要叉足電，先可以保證進行到長時間嘅野餐活動啊！

8）行動電源：
行動電源（尿袋）可以提供後備電源比手機或者風扇仔，手機要叉足電先可以隨時留意最新嘅資訊，例如野餐狀況最新嘅Update，仲要用嚟聯絡身邊親朋戚友，齊齊野餐！

希望大家可以開開心心咁進行野餐活動，帶定多兩條毛巾抹汗散熱，最緊要係注意安全，祝大家玩得開心及順順利利，Good Luck！