另一半精神上出軌

岩岩發現另一半同fd 傾計話佢個心有諗住另一個人 但會控制 因為佢有我
攤牌完佢話對唔住 仲鍾意我
但我發覺佢仲有同果另一個人有來往，同埋有野收埋
我應該點做
一諗起佢地既對話 個心就好痛
我好少信人。。當信任完佢 竟然發覺佢呃我 我已經分唔清咩係真咩係假
有冇過來人可以分享點克服

之前聽說過，男人接受唔到伴侶肉體上出軌，女人接受唔到伴侶精神上出軌，你係男定女？

男。。其實我兩樣都接受唔到
我唔知佢算唔算出軌 唉 佢只不過瞞住我 冇同我講 同左佢個fd傾訴
佢話驚我諗多 冇同我講

如果佢唔瞞你，你接受到佢揾其他人包括異性傾訴嗎？

口上說接受

我試過精神出軌 我藍絲 詳情起我底
講真 鐘意人自己控制唔到
但比唔比自己繼續鐘意落去就控制到
佢都識講話會控制自己 咁即係佢都知係唔啱
同時有行動去阻止自己繼續鐘意

我個post好撚多負皮
話唔鐘意就咪拖住人呀 係咁鬧我都有
但其實我一直都好愛我男友
我都明白精神出軌果個只係一時好感
只係果個感覺真係好難以抗拒 好似啱啱識男友個陣咁 見到佢會心跳面紅
希望樓主唔好用其他連登仔眼光黎睇呢件事
有幾多個拍過拖都唔知 專一有幾難都唔知
佢希望嘅係想你理解佢 唔係要你審判佢 話佢錯

同埋個時我男友係知道件事
反而佢覺得我同佢仲未係算有野就算我開口埋口都係果個人個名 雖然佢會扮嬲扮呷醋
因為佢話相信我唔係啲咁嘅人
同埋我平時有咩事都會同晒佢講
而我呢啲事都會同佢講係因為我知道佢唔會嬲
唔會發脾氣唔會嬲 佢eq超高 從來冇嬲過我
所以我先咁放心乜野都同佢講 唔駛驚講完佢會嬲我
所以話唔定另一半會隱瞞某程度都係樓主責任

隱瞞唔坦白就一定係錯 我另一半都有試過同我講大話
我知道事實個刻仲要講到我錯咁 個刻真係好心寒
但希望你諗吓 佢點解要對你隱瞞 都係驚你唔開心
如果你知道咗之後唔會唔開心 咁佢仲有咩理由要隱瞞？可能咁講有啲反智 但拍得拖就係兩個人嘅事 冇話一個人錯晒
我自問好易嬲好易呷醋 所以冷靜咗之後覺得佢咁做真係無可奈何

係 佢做錯咗 但你係咪都係要捉住佢錯處黎咄咄逼人
定係原諒佢繼續對佢好 開開心心一齊過未來日子

講到尾 你認真諗吓 佢係想騎牛搵馬定係真心對你唔想你諗多所以先隱瞞
同埋你原唔原諒到佢做錯咗(隱瞞) 定係道德好高嘅 真接受唔到
我同你講 一齊咁耐 點都一定會有心結
但所謂心結都係因為你唔理解 嘗試企多啲其他人角度黎睇呢件事 訓練吓自己思維 open minded啲
唔只對呢段關係 對自己未來都有好處

其實男女都係 受軟唔受硬
就算我鐘意咗第二個佢都係對我咁好
好自然會覺得 我同第二個重新開始做咩 嘥時間
反正已經有個咁好嘅另一半

同埋樓主你呢個case 佢根本未去到話要同佢分手嘅地步 冇話要2揀1 佢好明顯係想繼續同你一齊 你就真係唔好冇啦啦嬲/發佢脾氣
如果唔係佢就會覺得精神出軌得冇錯

利申 開心踏入第五年

樓主千奇唔好信呢個留言
完全係典型港女+極度自我中心

精神出軌絕對唔係正常事
另一半知道咗之後嬲亦係合情合理
唔係咩另一半隱瞞你你都有責任
如果照佢咁講你另一半同人上埋床都仲得

精神出軌就係出軌
係佢完全錯哂 唔關你事
咩之後開心生活都係自欺欺人
呢條刺你會記一世

先分手，等佢再揀

我明白有時感覺好難抗拒，咁點解唔盡量避免
開頭知道有好感就要識收手啦

我都知果條刺會永遠係心
但一諗起同佢既經歷，我唔想走

其實好感好容易有
問題喺你另一半知佢開始對人有好感仲唔識保持距離
咁好易慢慢對嗰個外來人變成鍾意

利申 藍絲
自己以前同ex拍拖都試過對個新識嘅男仔有好感 覺得同佢好傾
但當有咁嘅意識我即刻盡量唔同佢contact
除非可能真係正經嘢需要（當時係同學 projectmate咁）
而事實證明所謂好感只係源於新鮮感
一斷咗就好清楚自己真正愛嘅仲係男朋友

所以既然你女朋友好似無咩意識要避
除咗佢要搞清楚究竟純粹好感定已經踩太深
你都要審慎地諗下點去處理好
就算真係同學同事都好 少啲呢啲時間以外嘅接觸 差別已經好大
認真地叫佢非必要唔好再聯絡
如果佢真係愛你佢會明
反之你就要好好諗下了

絲打你講得好岩
佢地同事黎 短期內冇得避
佢叫我信佢 佢會控制到
但佢做既野完全俾唔到信心我。。
仲要俾我見到佢地既對話

當時你有冇同ex講？

佢有講過佢有做過決擇
會揀我
但又要我俾時間佢
其實女人諗乜 都揀左點解仲要諗

我後尾有講 喺我好肯定我完全對佢無嗰種會發展嘅感覺後
但我講完後佢係耿耿於懷 會驚無咗我
加上佢以前嘅經歷呢件事間接令到之後關係走下坡
所以我覺得隱瞞係明嘅 唔想佢諗多
但你女朋友口話揀你 實際仲會同佢keep住傾閒計 真係好難令你信服
我已經係過咗去先同佢講佢都好擔心 更何況樓主你

其實傾少啲閒計唔係好難
但你又唔可以逼佢 咁樣只會越嚟越將佢推去佢同事到
當時我有同嗰個男仔fd明言因為男友唔想同佢行咁埋
咁個朋友都明
我覺得至少真係你女友要好企硬表明
始終感情呢啲嘢唔係口話控制就控制到
唔好對自己咁有信心可以對一個人堅定不移避嫌好緊要

咁呢啲你就要同你女友傾