[首爾] [流水式遊記] [多圖少字] 五日四夜輕鬆遊

貼番個之前去完南泡菜國既遊記，比大家係K Pop以外睇多韓國少少。五日四夜全輕鬆遊，所以呢篇遊記都會非常輕鬆流水式咁記低啲無聊嘢，多圖少字，方便大家～

DAY1

經過大約四個鐘頭嘅機程再搭多一個鐘由機場出市區嘅地鐵，終於到韓國嘅鬧區明洞，酒店book左離明洞商圈十分鐘步程嘅樂天酒店，咁放低行李就行過去食韓國第一餐。(資料補充：機場出市區主要係地鐵或機場巴士兩種方法，本身睇台仔blog話搭巴士，但check完地鐵係又平又快啲，係弘大站轉一次線就得，咁就揀左地鐵。)


明洞商圈日頭都好多小食檔～


第一餐黎到梗是要食啲地道韓國餐開個靚頭先～明洞條街真係好多嘢食，我地幾個都唔識韓文，唯有齋睇圖揀～見到呢間應該係食安東雞就gogogo


先講前菜，韓國餐無論貴定平好多都會附前菜比你，呢張相嘅係酸蘿蔔同埋椰菜絲。酸蘿蔔就普通料，唯一特別嘅係椰菜絲竟然有似青提子味嘅醬汁，好得意。


主菜到！由於我地有人唔食辣，所以我地不停講住no spicy咁叫嘢。圖中係二人份嘅安東雞 (追加年糕同餃子)。個醬汁好濃好好味，啲雞都好入味又無骨，比我係香港食嘅安東雞好食好多，最好味係墊底嘅粉絲，入晒味好辣*！而年糕夠煙韌，但餃子係菜肉餃咁樣，都幾唔好食，最後要質我個fd食埋佢lol誤打誤撞都搵到間好嘢食lol
*(for番大家reference，我嘅食辣能力係譚仔5小辣同10小辣之間)


略略影下舖內環境～木系裝修


食完之後去個輕鬆啲嘅景點，東大門設計廣場DDP，係一個有Art Gallery，文化中心同Design Lab等等嘅超大型建築物，由名建築師Zaha Hadid設計。宇宙飛船外型已經好吸引，同埋我都想去睇啲博物館類嘅景點，所以出發前已經好期待。


建築物的確好宏偉，先係外圍行都行左好耐。Weekday嘅下午都好多當地人同遊客黎，老中青都有，同埋有兩個後生女係度唱歌賣藝，都幾悠閒。市中心可以有咁大嘅空間做呢類藝文嘢比人喘息下，地方大真好……


之前LED花海就係喺呢度整，而家雖然過左但都無拆走，唔係夜晚所以無咁靚，但我個fd話特登整呢啲嘢好膠


無開嘅小食車，造型好靚～


行完外圍就入去睇下，佢免費入場，但部分展覽要收錢，咁可以想入先比錢，唔錯唔錯～好多間館，求其入左棟，無乜人。


成棟嘢大約係一個螺旋形嘅塔，用上近乎全白嘅裝潢。


如果由-2F行到4F，就轉住圈咁行左533米
但問題係棟嘢係非常之無。嘢。睇！


空到跑步都無問題。



得幾舊藝術品，入場盛惠7000won嘅展覽


唔知係執左定係有大show先開嘅café



天台有鬼仔model影相



行過隔離Design Lab，係賣啲Design嘢嘅商店，但都唔算話好特別

幾間館都有唔少吉左嘅展覽廳，由一個無嘢做嘅receptionist看守，成個DDP好比到空洞嘅感覺我，時間多嘅可以係度虛耗下
無嘢行就走了，去隔離號稱廿四小時都有得掃貨嘅東大門批發mall見識下。
外圍望番DDP

睇過係咪咁多嘢買～？入到去，嘩，可能我對shopping興趣唔太大啦，覺得啲舖好大但無乜人睇緊，燈光又黃，款又無特別，衰過旺中潮特喎老細，老土嘅感覺直逼廣洲批發咁，柒到相都唔想影，兜左個圈就走番出黎，又話好多嘢買，玩呀大佬？


入去啲Mall嘅唯一得著就係可以高啲咁影DDP嘅外圍……


無買嘢就早啲食飯，另外兩條友都話要食重芝士嘅嘢，咁上網搵左陣就去一間都幾多人講嘅餐廳，叫詹姆士芝士排骨，搵左一陣先搵到……


前菜，Sor out focus，不過都唔是重點～


間嘢都幾多人食，左邊一大堆，不過聽到佢地講廣東話，又講聽日行程去38線，似遊學團


右邊就係幾檯韓國人，果兩個女仔其中一個生日，係咁影蛋糕


得一款嘢食，就係芝士排骨，有得揀普通份量芝士(14,000won)，多芝士(16,000)同非常多芝士(18,000)，非常多好似2人以上先可以叫。咁呢個就係 3人份嘅非常多芝士。


侍應會開左個火一直煲啲芝士


然後用夾同較剪攪兩攪


加上燒排骨再剪開


然後攪下啲芝士


最後夾起舊骨，用芝士蹺幾個圈，可以上碟～


三人份量(減侍應夾比我地果三舊)就係咁多，其實唔多排骨～
呢餐真係有少少失望，見到咁多芝士本來仲流晒口水，但係其實芝士還芝士，排骨還排骨，只係將兩樣嘢放埋一齊… 食個時就算將芝士捲多幾多圈都好，芝士都係融合唔到落排骨度……而且味道其實唔算特別好，不過總叫做圓左朋友狂食芝士嘅心願，呵呵


由於就咁食芝士排骨唔夠飽肚，我地追加左一份炒飯 (2,000 won)
侍應會將預備好嘅食材拎過黎，用返同一塊煎PAN幫你將D食材炒埋一碟
黎韓國食嘢真係要有食辣嘅心理準備，炒飯混雜左唔少泡菜粒，不過辣得黎又幾惹味~呢個炒飯好味過芝士排骨！


店內環境，食材就係喺呢個廚房入面準備架喇～


食飽飽之後我地就係東大門搭返地鐵去明洞～
其實最近我地酒店嘅地鐵站係乙支路三街站，不過又想行下明洞，所以就搭去明洞再行返酒店～
明洞真係好旺～無論日夜都人來人往 (夜晚推埋各式各樣嘅車仔檔出黎更加熱鬧)


呢間就係我地酒店嘅正門～有好大個鞠躬嘅發光男人做地標～附近似商業區， 所以夜晚都幾寧靜，加埋呢段時間韓國嘅天氣好舒服，涼浸浸，其實係附近行下都覺得好好FEEL

第一日嘅行程完滿結束左，期待第二日去樂天世界！！

東大門設計廣場其實都幾好行

可能我無比錢入去睇D展啦，只計免費區域的話我覺得內容唔夠～不過個場地係舒服既

DAY 2


今日一起身就好肚餓喇～即刻衝去明洞大覓食！
見到有間地鋪特別多人，價錢又合理，睇圖又覺得好似唔錯，就揀佢啦！(而家香港都有呢間野了)


由於有尋日食安東雞嘅經歷，我地已經係google translate打定走辣嘅韓文，今日落單時再好威威咁同侍應講要走/少辣，佢都聽得明～可惜世事不盡如人意LOL



呢度提供好多款炒雞扒，我地揀嘅係章魚雞扒 (10,000won)，三人份即係30,000won (係，韓國係咁叫野係……餐牌上面嘅價錢只係講緊一人份量，我地3個人嘅話起碼都要叫2人份量再加野or直接叫3人份)


炒之前個樣～睇落都唔係好辣姐！


加多個白飯～1,000won



炒完之後…… 變晒色 LOLLLL
不過又真係好好味嘅！難怪成間店Keep住好多人～佢有兩層，都坐滿晒

後記：呢度有個小型自助沙律吧～其實都係得泡菜同椰菜絲加醬汁……
食完呢餐先知道前菜嘅重要性，就係解辣。因為韓國菜嘅食物係已經用左辣嘅調味料去煮，就算嗌左no spicy都係唔會唔辣嘅，當你頂唔順果時，可以用前菜去中和一下，而且仲可以有唔同味道去點綴一下，味道豐富啲lol



跟住就向樂天世界進發喇～！
搭左大約半個鐘地鐵就去到蠶室站，好白痴地我地去到樂天百貨都要搵左好耐先搵到樂天世界個入口LOL
其實只要見到圖中呢堆仿羅馬許願池再一直去前行就會見到入口……唔好行左入去Food Court/百貨果邊



入口～
票價分兩種：一日票同入場票
一日票可以玩到嘅設施少D～入場票幾乎可以玩晒全部遊戲設施咁滯 (不過都有D自費活動，例如鬼屋Tomb of Horror)


價格收費可以參考(而家唔知票價有無加到，請以官方資料為準)：
4點/7點之後入再平D～


入場劵，但係入邊好似唔係好見到呢啲人物lol

拎左入場劵之後記得第一時間dl fast pass嘅mobile app，叫「LOTTE WORLD Magicpass」，如果search唔到問information拎個QR code scan，係唯一拎fast pass嘅方法！每一張入場劵可以拎3次fastpass，我地好晏先知，咩遊戲都比人拎晒，如果無pass，基本上每樣好玩嘅都要排一粒鐘，所以一定要拎左fast pass先！！


樂天世界有分室內同室外，室內區係世界最大嘅室內主題樂園。真係痴線咁大，係個建築物入面有好多機場遊戲，都幾嘆為觀止。


呢個view望曬全個室內區，好靚～


室內區其中一個最有趣嘅遊戲 – 熱氣球，係地面坐上熱氣球之後升上高空然後兜一圈，好似一個橫向版嘅摩天輪


呢張見到熱氣球升空後兜緊圈，同埋成個室內區有唔同主題放埋一齊，好有趣。
熱氣球要排多過一個鐘，太耐啦唔排。

係室內區玩左：

少少濕嘅轉轉船


有幾個衝位嘅急流飛船，我fd坐前面成個patpat濕晒 lol


騎馬馬用手槍射個screen，見佢係fast pass拎到飛嘅野同埋有啲攰就入去坐下～


室內區仲有兩個大型遊戲叫「法國大革命」同「法老的憤怒」，圖中呢個就係過山車「法國大革命」，我第一次見室內嘅大型過山車(西九龍中心唔計啦)，仲要係建築物中間穿梭……玩開過山車個fd都話好似就撞咁好恐怖下唔玩


過山車同樓層中間嘅人最近距離就係咁近，男仔趷高伸隻手一定摸到佢地，又無圍欄，無出事我只可以話好彩韓國人民質素都保持到係正常水平……

睇個色好似好辣咁....
有冇去動物園？好似係有小狐狸睇！

係我呢個旅程第二辣既野，應該有譚仔5小
無去動物園呀，係首爾市中心?

我都唔知喺邊，都係睇旅遊書立眼見到

黎緊我都去首爾，除左排骨芝士仲有邊度可以食到芝士既野，

利申 : 半個芝士控