「一場說走就走的旅行」55天獨遊，初嘗西伯利亞鐵路(華東，內蒙，俄德荷法英，冰島)(2)

lm
樓主終於更

坦白講
我都承認我係sheffield時間真係有啲長
呢個城市真係冇咩特別好做
主要原因係因為我既朋友係度
佢地比好多引誘我

其中一個引誘就係日日都話帶我去lake dis
但日日都落雨 想去都冇得去

我抱住一早可以去lake dis既心情起身
一起身望住個天都知可以唔洗去架啦


由於仲未食過full eng breakfast
所以亂9咁叫左個早餐外賣
諗住試一試
我黎旅行竟然都有機會試下外賣


一打開 確實就有啲失望既
成個常餐咁 仲要冇左個沙嗲牛通
不過食左先講啦
我朋友就話唔好食
我就冇咩感覺 可能本身賣相唔吸引

去唔成湖區
所以今日可以話係冇行程
天氣又唔穩定既情況下
我只好係附近周圍睇下


由於我個朋友唔係住正市中心
所以我有機會試到呢啲生活
我都未試過行出屋係咁空礦
完全冇個種一起身就趕住做野個種感覺
大家都好悠閒


雖然唔係咩風景
又好似啲雜草
但叫做個大草景啊

係山區確實冇咩活動
雖然我識揸車
而我朋友都肯借比我揸
但話時話 點解唔借車唔借埋司機
即係車我識揸 但唔好整架棍波比我
搞啲咁既野 我得個自動波牌

連去個超級市場都要20分鐘車種
咁點搞先得架
一陣m記又30分鐘車程
佢話有架巴士 一個鐘一班喎
咁點玩啫大佬

由於佢要執屋既關係
我都只好被困係度
陪佢執屋 但我又唔係住度
都唔知啲野放邊 都唔知幫到啲咩

原來係外國啲動物真係周圍都有

竟然有松鼠周圍走
我就係咁影
我個朋友一啲反應都冇
可能見得太多


既然冇咩好做
我就先將手頭上既工作做好先
反正都掛住玩 積左幾日

加上佢地話今晚煮野比我食喎
又好似幾好喎
係香港好少機會可以食到朋友煮既野食
聽落幾吸引

巴打 仲等緊你冰島

樓主終於返嚟 唔使再買西瓜啦

我地係超級市場買左好多野
我到呢一刻先發現
原來我呢個trip真係好少食生果
所以我今次大手入貨
食番夠本

當然唔少得我最中意既汽水啦
呢邊牛油好平 所以我朋友都係用牛油黎整野食
磨菇都好平 正正正
橙汁一大支都好平 仲要好飲過香港好多好多
Pasta 又好平
點解好平咩都好平咁


我睇番張相 我都唔知我個朋友整左啲咩
好似係魯肉飯既醬
我記得撈飯係幾好食既

佢過落大雨今日是但煮啲野就算
我諗都係借口黎架啫
應該同落雨冇關係

但超唔好彩
我食完之後第二日 我係病左架
其實夜晚個陣 我都覺有啲唔妥架啦
呢個都係點解我會留係sheffield咁耐既原因之一
我估計都係感冒之類
少少發燒 少少頭暈

其實去左成個月旅行都預左有呢一日架啦
我諗我一去左朋友屋企
冇揸緊個信念 就比啲病菌入左
我估都估唔到佢屋企竟然有樂信感冒藥
仲要寫繁體中文既包裝
應該係香港帶過黎 而唔知放左幾耐

不過佢地真係對我好好
摩打腳出名係對朋友無微不至
只係我以為佢淨係對女仔先至係咁
估唔到我都有機會享受佢既關懷
哈哈

令我諗起高中個陣
我整斷腳都係佢照顧我
連拐杖都係佢去幫我買


由於大家都對尋日既早餐有啲失望
所以佢又親自下廚整早餐
係咪相對吸引番少少
喂 淨係呢份關懷都滿分啦
只可以讚

其實我地個早餐都已經唔係朝早食架啦
係晏晝黎架啦 食完我唯有再去休息左陣
呢part 冇咩好講


但條友冇啦啦又走去訓
成個晏晝基本上都係冇離開過間屋

正確黎講 我係48小時冇離開過呢個山區
訓醒之後 好番好多 即刻叫摩打腳帶我出城行下
黎左sheffield都未出過城


由於時間都真係唔早
晏晝4-5點鐘
食又唔係 唔食又唔食
所以我地搵左間coffee shop發左呆
過下啲頹廢生活
病左要飲朱古力幫手回下魂

剛好摩打腳要出去睇架車既裝飾品
買埋啲毒撚野 所以就陪佢行下

去long trip一定要自己帶藥呀 我就算5日旅行都會執袋藥去 腸胃藥 退燒藥 念慈um枇杷膏都係必帶
如果去啲凍或者易落雨攝親既地方 會帶埋葛根湯 作感冒沖水飲焗身汗好返大半

btw 上個po先追到一半 新po lm先

因為內蒙古去俄羅斯個陣
過關唔可以帶藥
所以個陣掉曬啦
同埋 我都唔知自己去咁耐
冇咩準備

下次要去下啦咁
咩季節比較好？

貝加爾湖 出名係睇冰
冬天去可能會震撼啲

6月睇既應該會係天藍藍湖又藍藍既感覺

係歐洲hea 都真係算係一種享受
但有樣尷尬既係
去得旅行 每日都好珍貴
每日都燒緊錢 每日都係珍貴既假期
如果拎黎hea 又好似好浪費咁

我都係坐左一個鐘多啲
見都差唔多黃昏就走人
番到去朋友屋企之後
我發現佢地都係痴線既
佢話有個大學同學約左佢食飯
今晚話帶埋我去伯明瀚食飯
揸兩三個鐘車去食餐飯
即日來回
完全感受個份同學之間既愛


我地真係起行係咪痴線架
我都抱住陪下朋友既心態
反正我都係去下旅行
識下新朋友絕對唔係壞事
只不過我仲病緊啫

終於等到你出Sheffield
你朋友住山區咁遠如果去city要幾耐?
利申：去campus要行半個鐘，但快過等巴士
Peak District都好靚，你有無去到?

終於有得睇好感動 繼續期待冰島

更新未啊？

推

推

推！

55日28K ONLY
做埋PTBF/GF?

推