兩個幾月前佢發現自己有左 我地傾左好耐最後都係決定唔要 就去左家計會排期做人工流產
比左個期佢係平日黎 我就同佢講我應該攞唔到假（無幾耐前我屋企有事已經請左兩日）
佢一開始話唔緊要 佢可以搵朋友接佢 但差唔多手術前兩個禮拜左右開始佢突然情緒起伏好大 日日都喊 話好驚問我係唔係真係唔可以陪佢 咁我唯有話放工即刻去陪佢
做完手術個日都覺得佢無咩事 淨係係我屋企訓左兩日就繼續返學返part time 而家過左個零月 覺得佢好似對我冇曬要求咁 咩都話唔緊要
好似有一次我心情唔好 佢扮嬲叫我氹 我好大聲鬧佢你可唔可以唔好咁港女 其實一講完我已經心諗仆街啦今次 點知佢呆左幾秒之後同我講對唔住 然後走左入廚房整野比我食 我當時仲好白痴咁心諗佢做咩變到咁乖咁聽話
兩日前佢突然比左段千字文我 同我講其實佢到而家仲成日會諗起做手術當日既事 最初都以為可以自己搞掂自己 點知其實件事真係好痛苦 當日咁多個女仔得佢一個冇男朋友／老公送佢 入手術室既時候突然諗起無人係出面等佢 十幾個鐘冇飲過水冇食過野 麻醉過左之後其他女仔全部有人送飯 佢自己朝早買定左個麵包 但唔記得左帶水樽 好彩有個姑娘即刻攞左杯熱水比佢
其實我聽到都好心痛 我唔係突登唔陪佢 佢都話其實佢明 但係覺得唔知點面對我 個個fd都話我抵死 但我真係請唔到假 唔代表我唔關心佢唔愛佢 我可以點氹返佢啊
（唔洗問我到底係巴定絲啦 依個AC已經變左公廁）
