50日30縣日本背包遊

2018-04-13 福井、和倉
第22日
part 3

我今晚住嘅地方，就係大名鼎鼎！日本第一！
一個人每晚要近六萬日元嘅最頂級日式旅館──加賀屋！





再喺馬路對面轉角隔四個街口嘅普通溫泉旅館「花ごよみ」


話雖如此但溫泉旅館就係溫泉旅館，一泊二食一個人住一晚都要成11,880円
係我全個旅程住得最貴嘅一晚




其實我本來都有諗過住民宿算數
但既然嚟到和倉溫泉又唔住溫泉旅館都真係好白痴，豪俾佢！

check-in放低行李之後都已經差唔多六點
趕喺晚餐前出溫泉街行個圈



去到加賀屋旁邊嘅碼頭睇日落，可惜雲量太多




睇完日落返去浸溫泉，浸完啱啱夠鐘食晚餐
「花ごよみ」嘅最大賣點就係晚餐
雖然我只係訂咗最平嘅梅プラン，都一樣既精緻又美味
唔好睇佢每樣份量都好少，食完飽到好似食自助餐咁









因為太飽所以出去行吓幫助消化




抬頭一望，去到咁偏僻都唔係好睇到滿天繁星嘅景象
可惜

支持下, 想問下樓主咁玩法
應該大半使費都係乘車
同埋乘車時間唔計訓教都去左大半吧

其實唔係

車費雖然都唔平不過有JR pass可以用，淨係要俾私鐵同巴士錢

而由於去嘅多數唔係大城市，鋪頭景點五點鐘左右就收晒
所以可以有效利用哩段時間搭車轉移住宿，如果唔係有特別原因我都會食完晚飯先搭車走

全套裝備都係輕carry就可以咁玩
唔想搭咁耐車,都係分區咁深度遊岩我多d

分區玩其實搭車未必會少咗
例如住上野去川越單程一個鐘但要來回，咁就兩個鐘
福井去和倉好似好遠，但只係搭單程都一樣係兩個鐘
而且有固定據點重難深度遊啦，想去遠少少來回都可能講緊五六個鐘

plan過好多次，有女人行李係最難解決
局住住宿唔好斬太散

2018-04-14 能登、速星
第23日

前一日搭完七尾線再喺溫泉旅館住咗一晚
其實我嚟能登嘅目的已經完成咗
但咁早去到富山都冇嘢做，所以睇吓附近有咩地方好去
本來有諗過輪島，不過巴士班次太少睇睇吓發現唔可行
最後喺旅館拎咗張旅遊指南，近近哋揀咗入能登島水族館閒逛


本來都有期待過早餐有乜食，不過期望愈大失望化大
旅館個早餐同前一晚個晚餐比實在太大落差


俾成千yen車費去到水族館發現中晒伏
巴士班次重少過輪島趕唔到就唔洗走
入場費又要成千幾yen
而且個主館竟然維修緊，雖然少咗個主館但入場費不變
去旅行唔做好資料搜尋真係會好柒
早知去輪島去金澤去冰見去高岡都好過去水族館

不過嚟都嚟咗唔通唔入咩，頂硬上

能登島水族館嘅重鎮係大水槽內嘅兩條鯨鯊
揀啱時候會見到工作人員現場餵食





此外有企鵝巡遊




芝麻海豹




海獅&海豚表演





餵海豚

能登島水域生態展




水母廳




一隻完全唔郁嘅日本大鯢(大山椒魚)



魚群展覽




水獺


海獺



珊瑚




花園鰻


斑馬海鰻


Marlin&Dory


係咁多，個水族館好細好快就行完
如果唔係好鍾意水生生物我覺得冇必要嚟
而鍾意水生生物嘅我建議去其他同樣價錢可以去到嘅更大嘅水族館

午餐喺園內餐廳解決，連個餐廳都好伏
1000yen lunch set原來係一個唔好食嘅拉麵再加大大碗淨咖哩飯

10分我俾1分，嗰1分我係俾個分量
我覺得自己煮個公仔麵再買包即食咖哩倒落啲即食飯上面應該都差唔多

朝早決定去水族館應該係全個旅程最大嘅敗筆

2018-04-14 能登、速星
第23日
part 2

收拾心情返溫泉街
臨走前買咗幾隻生蛋放入溫泉，煮個真•溫泉蛋食




再買支能登牛奶雪糕



咁先舒服返少少

搭去前一日因為唔夠時間所以冇去到嘅能登中島
影埋花咲くいろは剩低嘅最後一個scene





回程嘅時候望一望月台，咦？
點解明明未夠鐘，月台會多咗架痛車時間表冇寫嘅痛車？



上前一問，原來哩架痛車係幾個同好自己集資增設嘅櫻花季特別班次
裝飾都有心機過普通版本好多，車內廣播係用緊普通痛車已經停用嘅角色聲優原聲版本
而且竟然係免費開放俾所有人乘坐！
係愛呀哈利......




日本阿宅嘅行動力真係非一般咁高


晚夜去到富山再搭去速星
冒住風雨行十五分鐘去一間大型購物中心
只係為咗影上次嚟富山聖巡true tears嘅時候剩低嘅最後一個scene







喺商場食完個好抵嘅晚飯(980yen)回程






結果呢，回程再冒住風雨行十五分鐘返速星站
去到車站先知JR因為太大風而停駛！

等咗個幾鐘唔見起色，問車站有冇人去富山
最後同一個越南留學生兩份搭咗4000yen的士返去
只係十分鐘車程已經4000yen喇！

有趣嘅係同個越南留學生講嘢全程都係用日文，因為佢唔識英文

大風到停駛

推post先

唔識日文 係咪去唔到咁耐

唔識日文主要係遇到突發情況麻煩啲
平時住酒店，出外睇google map，出發前揾定資料(或者起碼前幾日揾定)，唔打算即興去啲好偏僻嘅地方就冇問題

如果去偏遠地方一定要睇定巴士同電車班次，好多地方尾班車講緊四點幾五點錯過咗就走唔到

2018-04-15 高山
第24日

原本今日會住富山只係作為聽日個行程嘅士啤日
冇特別意外嘅話就hea遊富山市算數
點知臨瞓前睇facebook，見到幾年前like嘅高山市觀光page出post
話15號係春之高山祭嘅日子，咦？15號？
日子竟然撞到啱啱好，咁都唔去重等咩？

一朝早冒雨行去富山站趕特急去高山，心諗落雨落成咁連祭典搞唔搞得成都係問題
因為即興起行所以冇book指定席，實在太睇少大家對祭典嘅熱情
去到唔止指定席full book，連green都full book，甚至連自由席都爆滿，滿到走廊都企滿晒人




一企就企咗個半鐘先去到高山，出到車站....竟然停咗雨！



真係時來運轉

今次其實係已經係我第三次嚟高山
第二次重為咗聖巡冰菓而喺市內鑽竉鑽罅影場景
所以基本上唔睇地圖都識行








離祭典尚有唔少時間，所以沿宮川一路行散吓步
行到朝市盡頭見到嘅係.....櫻花！而且滿開中！


高山地區嘅櫻花一般比岐阜其他地區遲開一到兩星期
而天氣異常令全日本櫻花比往年早開一星期左右
真係敗也氣候成也氣候，誤打誤撞咁食正高山櫻花見頃中





時間差唔多，行返入市中心
由於祭典巡遊嘅關係，商店街實施封路變仍行人專用區
而且部份路段更成為祭典攤販嘅區域，重有starbuck派咖啡
我都忍唔住買咗個卷餅同炸雞做lunch

沿住人山人海嘅三町行去中橋





再等咗一陣，高山祭嘅主角出場！


高山祭係日本三大曳山祭之一
最大嘅特色就係華麗嘅人力山車巡遊以及身穿各色各樣傳統服飾嘅曳山行列





春之高山祭一共展出十二輛山車由市內唔同地點出發





離開巡遊行列，感受高山春天嘅氣息




而凡係山車經過嘅地方，都必定人山人海

2018-04-15 高山
第24日
part 2

去過高山嘅人應該都會明白
高山本線非特急停靠站嘅班次少到喊
例如去飛騨一ノ宮，講緊錯過朝早十點嗰班，下一班已經係下晝兩點半
所以睇睇吓高山祭都要離開趕去車站，出發去飛騨一ノ宮


目的就係樹齡超過1100年嘅臥龍桜


第一次嚟嘅時候係秋天，枯枝落葉
第二次嚟嘅時候係夏天，綠葉如常
嚟到第三次，終於見到滿開盛放嘅臥龍桜
雖然冇日本三大櫻咁壯觀，亦冇氷菓畫面咁如夢似幻
不過都總算係一償所願


影影吓樹見到附近嘅鏡頭全部轉向山邊
一望原來嚟咗隻野生日本鬣羚！
今日真係幾夠運




而且重未夠，影完鬣羚差唔多夠鐘回程嘅時候向臥龍桜一望
竟然！陽光普照！

前一日嘅倒楣就好似係假嘅咁
我哩一刻嘅心情同個天一樣，光晒

返去到高山，同一個地點，唔同嘅畫面


高山祭依然進行中，各處嘅行列由神社返回市內
比起朝早，哩個時候嘅山車更顯華美




嘗試喺市內尋找其他櫻花名勝
上到城山公園發現公園內嘅櫻花竟然已經全落
不過喺山腰望落去見有幾個唔錯哋地方
最後嚟到嘅就係飛騨護国神社





神社同櫻花果然永遠都係絕配

時近黃昏，巡遊亦正式完結
各個山車返回屋台蔵，靜待十月嘅秋祭
市內人潮亦逐漸散去




散咗去邊呢？當然就係去搭車
回程嘅特急重多人過去程，簡直就好似朝早8點嘅觀塘線咁
又企足個半鐘


本來以為富山好繁榮應該好易揾地方食嘢
點知行咗半個鐘，除咗居酒屋外只係揾到間中菜館營業中
不情不願入去食咗1000yen....




食完再夜遊富山


富山城




富山県庁觀景台(免費入場)





富岩運河環水公園



後來先知嗰度間starbucks吹到世界最靚點點點
但當時望落太普通所以影都冇影


之後就返酒店瞓，準備第二朝翻山越嶺！

50萬yen用到50日
佩服

pish

畢竟係背包遊
因為張ＪＲ　ＰＡＳＳ係喺香港買，所以其實５０萬yen都有少少超出原本個預計

我原本係預每日
4000yen 住
300yen 早餐
700yen 午餐
1000yen 晚餐
500yen 宵夜
500yen pass唔包嘅車費
1000yen 觀光設施費用

一日8000yen，全程大約40萬yen左右

晚餐咁少
個人認為搵當地美食都係旅行其中一個意義

每個人睇法唔同啫，我個人對食物執著唔大，比較鍾意睇唔同嘅景色同去唔地嘅地方遊覽

不過去日本我最鍾意就係食拉麵，每個地方每間鋪嘅湯頭、麵質、配料等等都唔一樣
基本上唔會係兩間唔同嘅拉麵店食到一模一樣嘅拉麵
食足一個月拉麵我都ｏｋ，而一碗拉麵大多數唔洗１０００ＹＥＮ

我試過160000yen 玩關西1個月全包
同樓主差不多玩法，不過3人行所以住果度平小小
而且日本食物份量..2人份量3人夠食

本來想打多日不過眼瞓頂唔順
番工老細又成日行嚟行去，睇嚟平日打一篇已經盡咗

加賀屋

能登水族館你都睇晒啦
有乜睇唔到？

迫過觀塘線真係慘