所以我希望開post講解/評論吓一D大家都會聽過嘅詞，希望一D本身唔係太了解廣東話歌詞嘅朋友可以借此增進認識，亦借機拋磚希望大家可以有高質討論。
第一次開post，梗係由夕爺嘅詞講起啦。
《一絲不掛》呢首歌自問都睇咗好多次先明個大概，當中仲參考咗其他人嘅評論文章，不過已經係好耐之前睇落，揾唔返個reference 出黎了。
希望呢個Post可以令大家更了解呢首詞，有咩錯漏歡迎各路高手指點
分手時內疚的你一轉臉
為日後不想有甚麼牽連
當我工作睡覺禱告娛樂那麼刻意過好每天
誰料你見鬆綁了又願見面
誰當初想擺脫被圍繞左右
過後誰人被遙控於世界盡頭
勒到呼吸困難才知變扯線木偶
這根線其實說到底誰拿捏在手
第一段文代咗故事背景，情人不甘束縛決定分手。「刻意」兩個字巧妙咁表達出「我」努力充實每一日，為嘅其實係想忘記舊情。正當佢以為自己已經overcome咗，對方又揾返佢。林夕好似對呢種欲斷難斷嘅舊情有一份執著，好似「必殺技」入面嘅「你近來又有空，我在防備別發功」，「春秋」「我沒權終止見面」，呢種明知無可能但係仲一直見面嘅場面成日係佢歌詞出現。當然，「我」肯見面亦代表仲未放得低，所以先會有後面欲斷難斷，飽受折磨嘅局面。
第二段有d難解，主要係好多個「誰」唔知邊個打邊個。第一句嘅誰明顯係對方，因為由上段可知係對方主動提出分手。第二三句係我被遙控變成扯線木偶。未句反問「誰拿捏在手」初時聽會好怪，上面「我」被你變扯線木偶，線梗係係「你」手上，仲有咩好問？其實林夕就係想講，線拿係「我」嘅手中。被牽引拉扯，呼吸困難嘅原因正正係自己唔肯放手。
不聚不散 只等你給另一對手擒獲
那時青絲 不會用上餘生來量度
但我拖著軀殼 發現沿途尋找的快樂
仍繫於你肩膊 或是其實在等我捨割
然後斷線風箏會直飛天國
「不聚不散」，既非聚又非散，就係藕斷絲連嘅狀態。直到你被另一隻手擒獲，同另外一個人一齊，「我」先會得到解脫。「那時青絲 不會用上餘生來量度」，呢度青絲應該唔解作頭髮，而係就咁一條絲。「量度」用得好，一生人被一條絲扯住行，就好似窮盡一生量度條絲有幾長咁。量度得嘅嘢一定有盡頭，同呢種欲斷難斷無窮無盡嘅煎熬又形成強烈對比，充滿諷刺。之後幾句寫「我」揾得到嘅快樂全部與「你」相關，但「你」唔再返黎，所以我永遠揾唔到真正快樂，除非「我」可以捨割。但如果真係捨割，「我」又會變成斷線風箏。一方面有自由，另一方面又完全失去人生嘅重心，直飛天國究竟係代表自由快樂，定魂歸天國呢，耐人尋味。
(其實林夕嘅邊個意思我都唔好肯定，又或者佢係特登要兩邊都解得通？)
這些年望你緊抱他出現
還憑何擔心再互相糾纏
給我找個伴侶找到留下你的足印也可發展
全為你背影逼我步步向前
如一根絲牽引著拾荒之路
結在喉嚨內痕癢得似有還無
為你安心我在微笑中想吐未吐
只想你和伴侶要好才頑強病好
Verse 2 開頭先交代故事發展，「你」己經另有對像，咁「我」係咪就此解脫，不再「互相糾纏」呢？梗係無咁易啦。我就算再揾個伴侶，佢身上始終有「你」嘅「足印」(呢度「足印」唔知有咩特別意思，我估係當「痕跡」咁解掛，巴打有更好解釋不妨下面話我知。
)，「我」嘅人生依然未能同「你」切割。
「如一根絲牽引著拾荒之路」呢句應該係最難解嘅地方，唔同人真係可以有唔同解法。我認為「拾荒之路」一句指「我」唯一擁有嘅只係「你」比「我」嘅殘破回憶同往事，己經過去嘅嘢對現在己經無實際價值，但「我」一生都只能如珍如寶地翻撿，充滿悲涼之感。「結在喉嚨」我初時只係諗到喉核，其實呢句一定要同後一句一齊解。喉嚨痕自然會令人想「吐」，呢層係表面意思，引伸出係有D說話「血梗在喉」，「吐」亦語帶雙關地解作吐露心聲。因為唔想破壞「你」同伴侶嘅關係，有D說話唔敢講，只希望你哋永遠一齊等「我」可以心死。
一直不覺 綑綁我的未可扣緊承諾
滿頭青絲 想到白了仍懶得脫落
被你牽動思覺 最後誰願纏繞到天國
然後撕裂軀殼 欲斷難斷在不甘心去捨割
難道愛本身可愛在於束縛
無奈你我牽過手 沒繩索
「綑綁我的未可扣緊承諾」，分手一刻承諾己經玩完，綑綁我嘅其實只係自己嘅執念。
之後用上「牽動思覺」、「撕裂軀殼」等激烈嘅字眼表示內心痛苦，呢種拉扯之下最終身心必定土崩瓦解。「難道愛本身可愛在於束縛」再次點出全歌主題。
出呢種手法大大深化一句嘅意思，畀人有深思想像嘅空間。大家聽歌時不妨多多留意。
