晌網上面有好多租車公司，可以直接同租車公司租，亦可以透過Agency，而今次我地就揀左租租車。第一，之前睇過有人話晌冰島租細公司可能會俾人呃，屈你整花架車之類，雞同鴨講又或者趕飛機果陣，可能要被迫接受，所以一開始就Target左一定要揀國際連鎖租車公司，最後揀左Budget。第二，有經驗分享自駕可能會遇到突發情況，封路、車門壞左，就好似我睇花漾青春冰島篇咁，對路車激起一舊石，就已經可以打爆你既車門玻璃窗，要即時聯絡車行送另一架車去目的地。所以今次揀左租租車，就係睇中佢有中文客服，可以直接打電話，又或者上到網既話，可以用網絡電話或者聊天室聯絡，萬一咁唔好彩真係遇到事，用中文講會安心啲同詳細啲。
冬天冰島自駕一定要租4X4，另外就係保險，我地買左全保，以防萬一，咁當然我地自己果份旅遊保險都有包埋自駕既。
晌網站同手機APPS都可以訂到車，有細節位唔明可以問左客服先再決定訂邊架。本身我地係想訂SUZUKI，因為覺得佢車尾箱大啲，但可惜無得指定車款只可以揀同級，最後黎左部KIA，好在我地四個人，1個30吋，1個28吋同1個26吋喼都放得落，仲有位可以放個40L背包同埋晌超市買既野，啲位都幾見駛。
雖然有好多租車公司都話自己晌機場，但真正晌機場大樓裡面既只係有Avis/Budget，Europcar同Hertz，一出海關轉左就見，其他公司都係要坐接駁巴士去，其實都唔係好遠，如果好天既話甚至可以行過去，估計都係十分鐘之內既路程。
拎車過程好順利，係等得耐少少，因為三間公司之中以我地果間最多人排，可能價錢平啲掛
但有一件事要留意既就係拎車果陣職員話我地無買保險，其實只係無直接同Avis/Budget買，無論係租租車定係晌RentalCar呢類Agency租都好，都係透過第三方保險承保，到時萬一要賠錢，都要先墊支，然後再同保險公司Claim返，所以如果你晌租車果陣買左保險，就千其唔好再買，如果唔係你就買左兩次保險架喇。為左安心，出發前都有將相關文件印出黎，包括租車確認書同埋保險既電郵。
還車一樣好順利，不過還車同拎車既地點唔一樣，晌google map都好清楚標示左rental car
return既位置。泊好車，將車匙交俾職員，佢地檢查完就走得，過程十分鐘都唔駛，仲有免費接駁小巴車返我地去機場大
樓
成個冰島旅程五日，其中有一日非常之大風，大風既程度係你開車門果陣，係會擔心度門會飛走，要用力拉實先可以。又有另一日，天氣好好，但由間歇泉返首都果程，啲風吹起地上面既雪，從右到左，成條行車線白濛濛一片，唔係有前車帶路都幾乎睇唔到條路晌邊
所以都係果句，晌冰島自駕真係要好小心，同埋出門前多啲留意路面既情況。除左上road.is之外，租租車APPS都有個群組，專係俾晌果個時段租左車既人交流，如果唔係就唔可以留言，果度除左可以交換關於自駕既資訊、路面狀況外，都有人會講下晌邊度睇到極光咁，幾實用架。
