鍾言逆矣
2019-02-13 12:35:47
Ch.82 夜院斷情絲
萬楓院偏廳,搖曳的燈火在壁上把師徒兩人拉出兩道長長的影子。
而且,是對立的影子。
此時,包皮穿一身夜行衣站在偏廳中央。
這幾天以來,包皮一直被身體的暗傷與賜婚的事弄得心煩意亂,徹夜輾轉難眠所以萬火院接下一大堆懸賞任務,動動手腳,好讓自己暫時不去多想。
「不平,赤帝賜婚嘅事考慮成點?你唔會打算答應吧?赤帝係我大哥,過去頭腦比我好得多。自從妻子盡失之後,竟然變得遲鈍喇。」韓江宇坐在椅子上,為自己倒一杯熱茶。
「師父意思係......?」
韓江宇打一個呵欠,挑眉道:「我依然視赤帝大哥為至親。一日為兄,終身為兄,此情絕不變。不過,源神界十年,聖地十年。你同橄欖喺呢十年間,關係應該唔簡單吧?」
包皮不假思索地點頭。
「我同橄欖情投意合。」
「既然如此,拒絕大哥嘅婚事吧。其他事情你唔需要擔心,有師父喺度,無人可以逼你做你唔想做嘅事,娶一個唔想娶嘅妻子。」韓江宇笑道。
包皮聞言,遲遲沒有答話。
「嗯?不平,你應該唔會貪圖神木都駙馬嘅身份吧?」
「我當然唔希望同諾雅蒂成婚.......但........」
「但?」
「只要神木都同萬火皇城聯成一線,將來攻打源淵界,神木都亦會付出更多,我皇城有更大勝算。」
「師父覺得你操之過急。即使係天塌落嚟,師父單手都會為你托住,你毋須過份緊張吧。」
包皮皺緊眉頭:「我已經唔需要師父為我托住頭頂呢片天。我好快就會突破成王.........」