英超車路士尋晚喺倫敦打吡不敵阿仙奴,賽後,因為傳波準但冇腳關鍵嘅車路士中場佐真奴費路,又一次成為各界炮轟對象,話佢踢唔掂英超,甚至插佢只係主帥沙利契仔。事實上,睇番今場佐真奴費路數據,全場傳球81次,成功率85%,但關鍵傳球一欄,對唔係,係0次呀!
或者再睇埋著名數據網站whoscored資料,呢位意大利國腳今季喺英超出場22次,傳球次數去到2,078次,但開季到依家嘅關鍵傳球都只係得可憐嘅14次咁大把,要知道「車仔」舊年夏天係用咗高達5,700萬鎊簽佢返嚟,而至今都係1入球0助攻,係咪物有所值,真係你諗你喇!
依家成日去講波嘅曼聯名將里奧費迪南就寸爆佢廢,話佢跑動少,幫唔到防守,進攻又係差,簡直係中場隱患咁話。至於啲網友更加唔客氣,有人插佢:「佢喺意大利被高估咗,嚟到英超露晒底啦!」把口再衰啲嘅話:「畀個假髮佐真奴費路,佢完全可以過檔去踢車路士女子隊呀,呢條友喺球場根本完全冇作用。」真係聽到都心酸呀!