香港本土全新輕鬆向小型賽事系列-【Devils Minor】上線啦!
成日都有人問幾時搞下屆【地伏盃】,可惜一次大型比賽唔係咁容易爆到出嚟。所以我決定舉辦一個新嘅比賽系列-【Devils Minor】畀大家玩下!
目的與特色:
如果整體實力水平要提高,就要睇多啲比賽打多啲比賽。但係一次性嘅大比賽時間長負擔大,預算都未必跟得上,倒不如頻密啲搞小型賽事,等大家可以習慣下打比賽嘅感覺,所以「每次Devils Minor只會進行兩日至一星期不等」。
而因為每次比賽賽期咁短,可以進行嘅比賽數目必然唔會多,時間亦都要盡量縮短;同埋相信各隊伍都希望得到一定嘅曝光率,所以決定「比賽將會全數直播 同埋 除決賽外全部都係BO1」。
因為呢個比賽系列嘅設計宗旨就係小型、快速、輕鬆,加上上面提到嘅賽期問題,報名隊伍上限真係冇辦法Set得太多,而隊伍數目少嘅同時仲玩先報先得就唔多實際,所以「隊伍上限係8隊 同埋 最終名單將由系統抽籤決定」。抽唔中/咁啱嗰一兩日唔得閒打嘅都唔洗太過唔開心,我哋會盡量搞多幾次,今次打唔到嘅下次再報過。
一開始都提到,呢個比賽系列係希望可以令大家熟悉比賽嘅要求、氣氛(即係儲Exp),唔同於一般大型電競比賽嘅目的:選強者。因為想盡量畀多啲唔同嘅選手/隊伍參與比賽,所以「來自於去屆Devils Minor中晉身四強的隊伍報名將會以較低優先度處理,以鼓勵不同人士參與比賽」。
最後呢個比賽始終都係輕鬆休閒為主,與其話係電競比賽,其實更近似於社群活動。一咁樣諗嘅其實個限制就即刻少咗好多,所以同大家講定:「唔排除未來會有特別模式嘅Devils Minor,例如係刀仔賽手槍賽等等」。都歡迎大家踴躍提出意見,最緊要大家玩得開心!
因為唔想喺撞正其他地區嘅比賽嗰陣冇辦法彈性去處理,所以未打算定一個固定嘅Schedule。盡量會喺星期五六搞,但係若果星期六日有其他比賽令到我唔得閒嘅,就有可能轉去其他日子。總之「關於個比賽嘅最新消息,請留意我個Page」
今次呢個【Devils Minor #1】已經可以報名喇,記得係抽籤決定,遲過其他隊報名係冇問題㗎,所以想打就好去CGA平台度報喇!
傳送門:
https://vs.cga.gg/tournament/devilsminor01